ஒரு சொத்தின் உரிமை எப்படி ஒரு நபரிடமிருந்து மற்றொரு நபருக்கு மாறியது என்பதையே Parent Documents காட்டுகின்றன. இந்த ஆவணங்களின் தொடர்ச்சியில் இடைவெளி இருந்தாலோ அல்லது ஒரு ஆவணம் சட்டப்படி செல்லாததாக இருந்தாலோ, பின்னர் செய்யப்பட்ட அனைத்து பதிவுகளும் சந்தேகத்திற்கு உள்ளாகும். அதாவது 1975-ல் சொத்து வாங்கியவர் 2015-ல் சொத்தை விற்றுள்ளார். ஆனால் 1975-க்கு முன் அவர் எப்படி உரிமை பெற்றார் என்பதை நிரூபிக்கும் ஆவணம் இல்லையென்றால், உரிமைச் சங்கிலி முழுமையற்றதாக கருதப்பட்டு மூல உரிமை ஆவணங்களில் குறைபாடு இருப்பதால் பிரச்சனை ஏற்படும்.
வாரிசு சான்று பெறாமல் விற்றிருப்பது, போலியான Power of Attorney மூலம் விற்றிருப்பது, கூட்டுப் பட்டா சொத்தில் மற்ற உரிமையாளர்களின் சம்மதம் இல்லாமல் விற்றிருப்பது, போன்ற சூழ்நிலைகளில் ஒரு நபர் சொத்தை விற்றார் என்பதற்காக அவர் உரிமையாளர் என்று கருத முடியாது. அவருக்கு அந்த சொத்தை விற்கும் சட்டப்பூர்வ அதிகாரம் இருந்ததா என்பதே முக்கியம்.
ஒருவர் இறந்த பிறகு அவரது சொத்தில் அனைத்து சட்டப்பூர்வ வாரிசுகளுக்கும் உரிமை உண்டு. அனைத்து சட்டப்பூர்வ வாரிசுகளும் சேர்க்கப்படாமல் ஒருவரின் சம்மதம் இல்லாமல் அல்லது அவரை மறைத்து சொத்து விற்கப்பட்டால், அவர் பின்னர் நீதிமன்றத்தில் வழக்கு தொடரலாம். பல ஆண்டுகள் கழித்தும் இப்படிப்பட்ட வழக்குகள் வருவது அரிதல்ல. வாங்கியவர் நல்ல நம்பிக்கையில் வாங்கியிருந்தாலும், உரிமை தொடர்பான சிக்கலை சந்திக்க நேரிடலாம்.
ஒரு சொத்து தொடர்பாக ஏற்கனவே நீதிமன்றத்தில் வழக்கு நிலுவையில் இருந்தால் அல்லது தடை உத்தரவு (Injunction) இருந்தால், அந்த சொத்தை வாங்குவது மிகுந்த ஆபத்தானது. சில நேரங்களில் வில்லங்கச் சான்றிதழில் (EC) எல்லா விவரங்களும் உடனடியாக தெரியாமல் இருக்கலாம். எனவே, தேவையான இடங்களில் நீதிமன்ற வழக்குகள் உள்ளனவா என்பதையும் சரிபார்ப்பது நல்ல நடைமுறையாகும்.
பத்திரத்தில் 2,400 சதுர அடி, பட்டாவில் 2,000 சதுர அடி, FMB-ல் வேறு எல்லை, பத்திரத்தில் உள்ள சர்வே எண், பரப்பளவு, எல்லைகள் ஆகியவை பட்டா, சிட்டா, அடங்கல், A-Register மற்றும் FMB வரைபடத்துடன் பொருந்த வேண்டும். இல்லையென்றால் எதிர்காலத்தில் உரிமை பிரச்சினைகள் உருவாக வாய்ப்பு அதிகம்.
சில மோசடி கும்பல்கள் போலியான ஆதார், போலி கையெழுத்து அல்லது ஆள் மாறாட்டம் மூலம் சொத்துகளை பதிவு செய்து விடுகின்றனர். பதிவு அலுவலகத்தில் பதிவு செய்யப்பட்டுவிட்டது என்பதற்காக மட்டும் அந்த ஆவணம் எப்போதும் செல்லுபடியாகும் என்று கருத முடியாது. மோசடி நிரூபிக்கப்பட்டால், நீதிமன்றம் அந்த ஆவணத்தை செல்லாது என்று அறிவிக்கலாம்.
பலர் ஆவணங்களை மட்டும் பார்த்து நேரில் சென்று பார்க்காமல் வாங்கிவிடுகிறார்கள்.வேறு ஒருவர் பல ஆண்டுகளாக அனுபவத்தில் இருக்கலாம், ஆக்கிரமிப்பு இருக்கலாம், எல்லைக் கற்கள் மாறியிருக்கலாம், அரசு நிலத்துடன் கலந்திருக்கலாம், சாலை விரிவாக்க திட்டம் இருக்கலாம். இப்படிப்பட்ட பிரச்சினைகள் பின்னர் தெரிய வந்தால், வாங்கியவரே பாதிக்கப்படுவார்.
– குறைந்தபட்சம் 30 ஆண்டுகளுக்கான Parent Documents ஆய்வு செய்யுங்கள். – வில்லங்கச் சான்றிதழை முழுமையாக சரிபாருங்கள். – பட்டா, சிட்டா, A-Register, FMB ஆகியவற்றை ஒப்பிட்டு பாருங்கள். – அனைத்து சட்டப்பூர்வ வாரிசுகளின் உரிமையையும் உறுதி செய்யுங்கள். – நிலத்தை நேரில் பார்வையிட்டு, எல்லைகளை சரிபாருங்கள். – தேவையானால் அரசு அங்கீகாரம் பெற்ற நில அளவையர் மூலம் அளவீடு செய்து கொள்ளுங்கள். பத்திரம் என்பது சொத்து உரிமையை நிரூபிக்கும் முக்கியமான ஆவணங்களில் ஒன்று.
ஆனால் அது மட்டுமே இறுதியான ஆதாரம் அல்ல. உண்மையான உரிமை என்பது ஆவணங்களின் தொடர்ச்சி, விற்றவரின் அதிகாரம், வாரிசு உரிமை, வருவாய் பதிவுகள், நிலத்தின் உண்மை நிலை மற்றும் சட்டப்பூர்வ ஆய்வு ஆகிய அனைத்தும் சரியாக இருக்கும் போது மட்டுமே வலுவாகும். “பத்திரம் இருப்பது முக்கியம்; ஆனால் பத்திரத்தின் பின்னால் இருக்கும் சட்டப்பூர்வ உரிமையே அதைவிட முக்கியம்.” இதை மனதில் வைத்துக் கொண்டு ஒவ்வொரு சொத்து பரிவர்த்தனையையும் கவனமாக மேற்கொள்ளுங்கள்.
