சென்னை மாநரக போக்குவரத்து கழகம் சார்பில் சென்னையின் பல்வேறு பகுதிகளுக்கு ஏசி மின்சார பேருந்துகள் இயக்கப்பட்டு வருகின்றன. சென்னை அசோக் நகர் செல்லும் ஏசி மின்சார பேருந்தில் ஒன்றில் நேற்று இரவு இளம்பெண் ஒருவர் ஏறியுள்ளார். பேருந்து சிறிது தூரம் சென்ற நிலையில் பேருந்துக்குள் திடீரென இளம்பெண் ரகளையில் ஈடுபட்டார்.
தட்டிக்கட்ட பயணிகளிடமும் ஆவேசமாக சண்டையிடுவது போல பேசிக்கொண்டு, பேருந்தின் முன்பக்கத்தில் இருந்து கொண்டு பயணிகளிடம் கடுமையாக வாக்குவாதம் செய்தார். நான் கேப்பில் போக வேண்டியவள்.. இங்கே ஏன் வந்தேன் என்று கத்தி கூச்சல் போட்டார். அந்த பெண் போதையில் இருந்ததை கவனித்த பெண் ஒருவர், இளம்பெண்ணை தட்டிக்கேட்டார். ஆனால் அவரது அறிவுரையை மீறி அந்த பெண், பயணியை தாக்க முற்பட்டார். அதோடு நிற்காமல் பேருந்துக்குள் இருந்த பயணிகள் ஒருவர் விடாமல் வம்பிழுத்த அந்த பெண் ஒருமையிலும் பேசினார்.
இதனால் பொறுமை இழந்த பயணிகள் சிலர் அவரிடம் வாக்குவாதம் செய்தனர். எல்லை மீறி போன அந்த பெண் பயணியால் நொந்து போன சக பயணிகள் என்ன செய்வதென்றே தெரியாமல் தவித்து போயினர். ஒரு கட்டத்தில் இதற்கு மேலும் விட்டால் சரிவராது என்று உணர்ந்த பேருந்து ஓட்டுனரும், நடத்துனரும் இளம்பெண்ணை இறக்கி காவல்துறையினருடன் ஒப்படைத்தனர். காவல்துறையினரும் அந்த பெண் குறித்து விசாரணை நடத்தி வருவதாக தெரிகிறது. சென்னையில் பேருந்துக்குள் இளம்பெண் பயணி போதையில் அநாகரீமாக நடந்து கொண்ட காட்சிகள் சமூக வலைத்தளங்களில் வைரலாகி வருகின்றன.
