இந்தியா – Page 5

சிலிண்டர் வெறும் 450..! நெல்லுக்கான குறைந்தபட்ச விலை ரூ.3,200..! ‘இந்தியா’ கூட்டணியின் வாக்குறுதிகள்!

சமையல் எரிவாயு சிலிண்டர் விலை ரூ.450 , ரூ.15 லட்சம் மருத்துவ காப்பீடு என பல தேர்தல் வாக்குறுதிகள். ஜார்க்கண்ட் சட்டசபைக்கு நவம்பர் 13-ஆம் தேதி , நவம்பர் 20-ஆம் தேதிகளில் 2 கட்டங்களாக வாக்கு பதிவு நடைபெற்று நவம்பர் 23-ந் தேதி எண்ணப்பட்டு முடிவுகள் அறிவிக்கப்பட உள்ளது.

இந்நிலையில், ஜார்க்கண்ட் தேர்தல் களத்தில் இந்தியா கூட்டணியாக ஆளும் ஜார்க்கண்ட் முக்தி மோர்ச்சா, காங்கிரஸ் மற்றும் ஆர்ஜேடி கட்சிகள் களம் காண்கின்றன. இந்த கூட்டணியின் சார்பாக தேர்தல் அறிக்கை வெளியிடப்பட்டது.

இந்த தேர்தல் அறிக்கையில் சமையல் எரிவாயு கேஸ் சிலிண்டர் ரூ.450-க்கு விற்பனை செய்யப்படும்; அனைத்து மாவட்டங்களிலும் மருத்துவ கல்லூரிகள், பொறியியல் கல்லூரிகள் மற்றும் 500 ஏக்கரில் தொழில் பூங்காக்கள் அமைக்கப்படும்; 10 லட்சம் பேருக்கு வேலை வாய்ப்புகள் வழங்கப்படும்; ரூ15 லட்சம் மருத்துவ காப்பீடு வழங்கப்படும் என்பது உள்ளிட்ட பல முக்கிய வாக்குறுதிகள் இடம் பெற்றுள்ளன.

மேலும் பழங்குடி மக்களுக்கான இடஒதுக்கீடு 28% ஆக அதிகரிக்கப்படும்; தலித்துகளுக்கான இடஒதுக்கீடு 12% உயர்த்தப்படும்; இதர பிற்டுததப்பட்ட ஜாதிகளுக்கான இடஒதுக்கீடு 27% ஆக உயர்த்தப்படும்; பிற்படுத்தப்பட்டோர் நலத்துறை அமைச்சகம் உருவாக்கப்படும்; சிறுபான்மையினர் உரிமைகள் பாதுகாக்கப்படும் எனவும் ‘இந்தியா’ கூட்டணி தேர்தல் அறிக்கையில் தெரிவிக்கப்பட்டுள்ளது.

அதேபோல, நியாய விலை கடைகளில் தற்போது வழங்கப்படும் 5 கிலோ உணவு தானியங்கள் 7 கிலோவாக அதிகரிக்கப்படும் என்பதும் இந்தியா கூட்டணியின் வாக்குறுதிகளில் ஒன்று. விவசாயிகளுக்கும் ஏராளமான வாக்குறுதிகளை இந்தியா கூட்டணி தேர்தல் அறிக்கை வாரி வழங்கி உள்ளது. நெல்லுக்கான குறைந்தபட்ச விலை ரூ2,400-ல் இருந்து ரூ3,200 ஆக உயர்த்தப்படும் எனவும் இந்தியா கூட்டணி கட்சிகளின் தேர்தல் அறிக்கையில் வாக்குறுதி அளிக்கப்பட்டுள்ளது.

ஜெகத்குரு பரமஹன்ஸ்: மோடியின் அரசியல் வாரிசு யோகி ஆதித்யநாத்..! அடுத்து யோகி ஆதித்யநாத் பிரதமராவதை யாராலும் தடுக்க முடியாது..!

உத்தரப் பிரதேச முதலமைச்சர் யோகி ஆதித்யநாத் தான் பிரதமர் நரேந்திர மோடியின் வாரிசாக வளர்ந்திருப்பதாக என அயோத்தி மடத்தின் தலைவர் ஜெகத்குரு பரமஹன்ஸ் தெரிவித்துள்ளார். சில நாட்களுக்கு முன் முடிந்த தீபாவளியில் அயோத்தியின் தீப உற்சவத்தில் இரண்டு உலக சாதனை நிகழ்த்தப்பட்டன. இந்நிகழ்ச்சிக்கு அயோத்தி உள்ளடக்கிய பைஸாபாத் மக்களவை தொகுதி எம்பியான அவ்தேஷ் பிரஸாத் அழைக்கப்படவில்லை.

உத்தரப் பிரதேசத்தின் முக்கிய எதிர்க்கட்சியான சமாஜ்வாதியைச் சேர்ந்த அவ்தேஷ் இதற்காக, பாஜக அரசைக் கண்டித்து அறிக்கை வெளியிட்டிருந்தார். இதில், உத்தரப் பிரதேச முதலமைச்சர் யோகி ஆதித்யநாத்யுடன் அயோத்தியின் துறவிகளையும் மடங்களின் தலைவர்களையும் விமர்சித்து இருந்தார்.

இதை கண்டிக்கும் வகையில் அயோத்யாவின் ராம் ஜானகி கோயிலின் தபஸ்வீ மடத்தின் தலைவர் ஜெகத்குரு பரமஹன்ஸ் அறிக்கை ஒன்று வெளியிட்டுள்ளார். அதில், சமாஜ்வாதி எம்.பி.,யான அவ்தேஷை கண்டித்ததுடன் முதலமைச்சர் யோகி ஆதித்யநாத் தான் நாட்டின் அடுத்த பிரதமர் என்றும் தெரிவித்துள்ளார்.

இது குறித்து ஜெகத்குரு பரமஹ்ன்ஸ் தனது அறிக்கையில், அவ்தேஷ் பிரஸாத்தின் கருத்துக்களை எடுத்துக்கொள்ளத் தேவையில்லை. இவர் ஓர் ‘அழுகிய மாம்பழம்’ போல் இருப்பவர். அயோத்தியின் களங்கமாக இருப்பவருக்கு துறவிகளை விமர்சிக்கத் தகுதி இல்லை. உத்தரப் பிரதேசத்தின் திறமைப்படைத்த சிறந்த முதலமைச்சர் யோகி ஆதித்யநாத் குறித்து பேசவும் அவருக்கு அருகதை இல்லை.

பிரதமர் மோடியின் அரசியல் வாரிசாக வளர்ந்திருப்பவர் முதலமைச்சர் யோகி ஆதித்யநாத். பிரதமர் மோடிக்கு பின் அப்பதவியில் முதலமைச்சர் யோகி ஆதித்யநாத் அமர்த்தப்பட வேண்டும். இந்த கோரிக்கை நாடு முழுவதிலும் உள்ள பொதுமக்கள் இடையேயும் கிளம்பி வருகிறது. எனவே, உத்தரப் பிரதேச முதலமைச்சர் யோகி ஆதித்யநாத் நம் நாட்டின் பிரதமராவதை யாராலும் தடுக்க முடியாது என ஜெகத்குரு பரமஹன்ஸ் தெரிவித்துள்ளார்.

சல்மான் கானை பின்தொடரும் புல்வாய் இன மான்..! மன்னிப்பு கேளுங்கள் இல்லாவிட்டால்…!

புல்வாய் இன (black buck) மானைக் கொன்றதற்காக எங்கள் கோயிலுக்குச் சென்று மன்னிப்பு கேட்க வேண்டும் அல்லது ரூ. 5 கோடி தொகை வழங்க வேண்டும் என லாரன்ஸ் பிஷ்னோய் கும்பலிடம் இருந்து சல்மான் கானுக்கு புதிய மிரட்டல் விடுத்துள்ளது.

இந்த மிரட்டல் சம்பவம் குறித்து மும்பை போக்குவரத்து பிரிவு காவல்துறைக்கு, “லாரன்ஸ் பிஷ்னோயின் சகோதரன் என்று கூறி ஒரு நபரிடமிருந்து எங்களுக்கு செய்தி ஒன்று வந்தது. அதில், சல்மான் கான் தொடர்ந்து உயிர்வாழ விரும்பினால் அவர் எங்களின் கோயில் ஒன்றுக்குச் சென்று மன்னிப்பு கேட்க வேண்டும் அல்லது ரூ.5 கோடி கொடுக்க வேண்டும். சல்மான் கான் அவ்வாறு செய்யவில்லையென்றால் கொலை செய்யப்படுவார். எங்களின் கும்பல் இப்போதும் செயல்பாட்டில் உள்ளது என்று கூறப்பட்டிருந்தது” என தெரிவித்தனர்.

பவன் கல்யாண் எச்சரிக்கை: எங்கு பார்த்தாலும் பலாத்காரம்..! உள்துறை அமைச்சர் அமைதியாக இருக்கிறார்..!

ஆந்திராவில் எங்கு பார்த்தாலும் பாலியல் பலாத்காரம் நடக்கிறது. உள்துறை அமைச்சர் அனிதா அமைதியாக இருந்தால், அவரது பதவியை நானே ஏற்பேன் என துணை முதலமைச்சர் பவன் கல்யாண் எச்சரிக்கை விடுத்துள்ளார்.

ஆந்திர மாநில துணை முதலமைச்சர் பவன் கல்யாண் தனது சொந்த தொகுதியான பிதாபுரத்தில் ரூ 5.52 கோடி மதிப்பில் நலத்திட்டம், வளர்ச்சி பணிகளுக்கு நேற்று அடிக்கல் நாட்டி தொடங்கி வைத்தார். இந்த நிகழ்ச்சியில் கலந்துகொண்டு பவன் கல்யாண் பேசுகையில், மாநிலத்தில் சட்டம் ஒழுங்கு சரியாக இருந்தால் மட்டுமே வளர்ச்சி பெற முடியும்.

எங்கு பார்த்தாலும் பாலியல் பலாத்காரம், பெண்களுக்கு எதிரான சம்பவங்கள் நடைபெற்று வருவது கவலை அளிக்கிறது. காவல்துறை குற்றவாளிகளை கைது செய்யாமல் உள்ளனர். சாதி, மதம் குற்றவாளிகளுக்கு கிடையாது. தவறு செய்தால் தண்டனை கிடைக்க வேண்டும். யாராக இருந்தாலும், உறவினர் என்றும் ரத்த பந்தம் என கூறி வந்தால் தவறு செய்திருந்தால் அவர்களையும் சேர்த்து அடித்து உதையுங்கள். ஆட்சி மாற்றம் ஏற்பட்டாலும் அதிகாரிகள் மத்தியில் எந்தவித மாற்றமும் ஏற்படவில்லை.

உள்துறை அமைச்சராக உள்ள அனிதாவும் பெரிய அளவில் எந்த மாற்றமும் செய்யாமல் அமைதியாக உள்ளார். நான் உள்துறை அமைச்சராக பதவி ஏற்றால் வேறு மாதிரி இருக்கும். என்னை அந்த நிலைக்கு கொண்டு வர வேண்டாம். தேவைப்பட்டால் உள்துறை அமைச்சர் பொறுப்பையும் நானே ஏற்பேன் என பவன் கல்யாண் எச்சரிக்கை விடுத்துள்ளார்.

பாஜக சுதாகர் ரெட்டி வலியுறுத்தல்: நடிகை கஸ்தூரி தெலுங்கு மக்களிடம் மன்னிப்பு கேட்க வேண்டும்..!

நடிகை கஸ்தூரி தமது கருத்தை திரும்பப் பெற வேண்டும்; தமது கருத்துகளுக்காக நடிகை கஸ்தூரி தெலுங்கு மொழி பேசும் மக்களிடம் மன்னிப்பு கேட்க வேண்டும் என பாஜக மூத்த தலைவர் சுதாகர் ரெட்டி கடும் கண்டனம் தெரிவித்துள்ளார்.

சென்னையில் பிராமணர்கள் நேற்று பாதுகாப்பு வழங்க கோரி சென்னை எழும்பூர் ராஜரத்தினம் மைதானத்தில் ஆர்ப்பாட்டம் நடைபெற்றது. இந்த நிகழ்ச்சியில் பேசிய நடிகை கஸ்தூரி, தெரியாமத்தான் கேட்கிறேன்.. 300 வருஷம் முன்னாடி ஒரு ராஜாவுக்கு கூட சேர்த்துகிட்ட அந்தப்புர மகளிரோ சேவைகள் செய்ய வந்தவர்கள் எல்லாம் தெலுங்கு பேசுகிறவர்கள் எல்லாம் இன்னைக்கு வந்து தமிழர்கள் இனம் அப்படின்னு சொல்லும்போது எப்பவோ வந்த பிராமணர்களை நீங்கள் தமிழர்கள் இல்லை என்று சொல்ல நீங்கள் யார்? நீங்கள் யார் தமிழர்கள்? என கேள்வி எழுப்பி இருந்தார்.

இந்த சூழ்நிலையில் தமிழ்நாடு மற்றும் கர்நாடகா பாஜகவின் டெல்லி மேலிட இணை பொறுப்பாளரான சுதாகர் ரெட்டி வீடியோ வெளியிட்டார். அதில் நடிகை கஸ்தூரியின் இழிவான விமர்சனங்களுக்கு கடு கண்டனம் தெரிவித்துள்ளார். மேலும் நடிகை கஸ்தூரி தமது கருத்தை திரும்பப் பெற வேண்டும்; தமது கருத்துகளுக்காக நடிகை கஸ்தூரி தெலுங்கு மொழி பேசும் மக்களிடம் மன்னிப்பு கேட்க வேண்டும்; அண்ணன் தம்பியாக பாசத்துடன் பழகிவரும் தமிழர்களுக்கும் தெலுங்கு மொழி பேசும் மக்களுக்கும் இடையேயான ஒற்றுமையை நடிகை கஸ்தூரியின் இத்தகைய பேச்சுகள் பாதிக்கும் என்றும் சுதாகர் ரெட்டி அந்த வீடியோவில் சுட்டிக்காட்டி உள்ளார்.

அமலாக்கத் துறை அறிவுரை: ‘டிஜிட்டல் அரெஸ்ட்’ விவகாரத்தில் ஏமாற வேண்டாம்..!

செல்போன், சமூக வலைதளங்களில் யாரிடமும் ஏமாறக் கூடாது, ‘டிஜிட்டல் அரெஸ்ட்’ விவகாரத்தில் பொதுமக்கள் எச்சரிக்கையாக இருக்க வேண்டும் என அமலாக்கத் துறை அறிவுறுத்தி உள்ளது. கடந்த சில ஆண்டுகளாக இந்தியாவில் ‘டிஜிட்டல் அரெஸ்ட்’ என்ற பெயரில் பொதுமக்களை மிரட்டி பணம் பறிக்கும் சம்பவங்கள் அதிகரித்து வருகின்றன. குறிப்பாக கடந்த 10 ஆண்டுகளில் மட்டும் நாடு முழுவதும் 65,000-க்கும் மேற்பட்ட வழக்குகள் பதிவு செய்யப்பட்டு உள்ளன. சுமார் ரூ.4.69 லட்சம் கோடிக்கும் அதிகமாக மோசடி நடைபெற்று வருகிறது.

இந்த விவகாரம் தொடர்பாக ‘மனதின் குரல்’ நிகழ்ச்சி வாயிலாக பிரதமர் நரேந்திர மோடியும் பொதுமக்களிடம் விழிப்புணர்வை ஏற்படுத்தி உள்ளார். இதுகுறித்து அமலாக்கத் துறை வட்டாரங்கள் கூறிகையில், குஜராத்தின் வடோதராவில் அண்மையில் ‘டிஜிட்டல் அரெஸ்ட்’ கும்பலை பிடித்தோம். அப்போது தைவான் நாட்டை சேர்ந்த 4 பேர் உட்பட 18 பேர் கைது செய்யப்பட்டனர். வடோதராவின் பிரபல வணிக வளாகத்தில் சிறிய அறையை வாடகைக்கு எடுத்து ‘டிஜிட்டல் அரெஸ்ட்’ கும்பல் செயல்பட்டு வந்துள்ளது.

அங்கு அதிநவீன செல்போன்களில் சுமார் 20 பேர் நாள்தோறும் பொதுமக்களை தொடர்பு கொண்டு மிரட்டல் விடுத்து பணம் பறிந்து வந்துள்ளனர். இதேபோல டெல்லி, பெங்களூரு, மும்பை உள்ளிட்ட நகரங்களிலும் ‘டிஜிட்டல் அரெஸ்ட்’ கும்பல்கள் செயல்பட்டு உள்ளன. வடோதரா கும்பலிடம் இருந்து 761 சிம் கார்டுகள், 120 செல்போன்கள், 96 காசோலை புத்தகங்கள், 92 டெபிட் கார்டுகள், 42 வங்கி கணக்கு புத்தகங்கள் கைப்பற்றப்பட்டன.

பெரும்பாலும் தைவான், சீனா, தாய்லாந்து உள்ளிட்ட நாடுகளை சேர்ந்த கும்பல்கள் இந்தியாவில் சைபர் குற்றங்களில் ஈடுபட்டு வருகின்றன. இந்தியா மட்டுமன்றி தெற்கு ஆசியா முழுவதும் சுமார் 50-க்கும் மேற்பட்ட ‘டிஜிட்டல் அரெஸ்ட்’ கும்பல்கள் செயல்பட்டு வருகின்றன. ஒரு மையத்தில் இருந்து நாள்தோறும் ரூ.10 கோடி வரை மோசடி செய்ய இலக்கு நிர்ணயிக்கப்பட்டு உள்ளது. அந்த வகையில் இந்தியாவில் நாள்தோறும் ‘டிஜிட்டல் அரெஸ்ட்’ என்ற பெயரில் பல கோடி ரூபாய் மோசடி செய்யப்பட்டு வருகிறது.

இதுகுறித்து பொதுமக்கள் எச்சரிக்கையாக இருக்க வேண்டும். செல்போன், சமூக வலைதளங்களில் யாரிடமும் ஏமாறக்கூடாது. எந்தவொரு அரசு அமைப்பும் செல்போனில் தொடர்பு கொண்டு பொதுமக்களுக்கு மிரட்டல் விடுக்காது. காணொலி வாயிலாகவும் விசாரணை நடத்தப்படாது. இதை மக்கள் தெளிவாக புரிந்து கொள்ள வேண்டும். சட்ட விதிகளின்படி ‘டிஜிட்டல் அரெஸ்ட்’ என்பதே கிடையாது என அமலாக்கத் துறை தெரிவித்து உள்ளது.

நாய்களுக்கு பிஸ்கெட் போட்டு லஷ்கர்-இ-தொய்பா தளபதி வீழ்த்திய பாதுகாப்பு படையினர்..!

வடிவேல் காமெடி பாணியில் நாய்களுக்கு பிஸ்கெட்டு போட்டு குரைக்கவிடாமல் தடுத்து லஷ்கர்-இ-தொய்பா தளபதி உஸ்மானை சுற்றிவளைத்து பாதுகாப்பு படையினர் சுட்டுக் கொன்றுள்ளனர். இதுகுறித்து பாதுகாப்பு படை உயரதிகாரிகள் கூறிகையில், பாகிஸ்தானைச் சேர்ந்த லஷ்கர்-இ-தொய்பா அமைப்பின் முக்கிய தளபதியான உஸ்மான் ஸ்ரீநகரில் உள்ள கன்யார் பகுதியில் பதுங்கியிருப்பதாக ரகசியமான உளவுத் தகவல் கிடைத்தது.

அந்தப் பகுதியில் உள்ள குடியிருப்புகள் மக்கள் மிக நெருக்கமாக வசிக்கும் பகுதியாகும். இதனால், அங்கு தேடுதல் வேட்டை மேற்கொள்வது மிகவும் கடினமான பணியாக இருந்தது. சேதத்தை குறைத்து அதேநேரம் வெற்றியினை பதிவு செய்வதற்கு துல்லியமான ஒன்பது மணி நேரம் திட்டமிடல் அவசியமாக இருந்தது.

இருப்பினும், அந்த குடியிருப்பு பகுதியில் உள்ள தெரு நாய்கள்தான் இந்த தேடுதல் நடவடிக்கைக்கு பெரும் சவாலாக விளங்கியது. ஏனெனில் அசாதாரணமான ஆள்நடமாட்டத்தை கண்டு நாய்கள் குரைத்தால் அதனால் தீவிரவாதிகள் உஷாராகி எளிதாக தப்பிச் செல்வதற்கு வழிவகுத்துவிடும். எனவே. இந்த சிக்கலை எதிர்கொள்ள நாய்கள் உள்ள பகுதியை நெருங்கும்போது அவற்றை சமாதானப்படுத்த தேடுதல் குழுவினர் கையில் பிஸ்கட் பாக்கெட்டுகளுடன் சென்றனர்.

நாய்களை பார்க்கும்போது பிஸ்கெட்டுகளை வீசி அவற்றை குரைக்க விடாமல் தடுத்தனர். சுமார் 30 நிமிடங்கள் உஸ்மான் வீட்டை சுற்றிவளைத்த பாதுகாப்பு படையினர் மீது ஏகே-47, கையெறி குண்டுகளை வீசி தாக்குதல் நடத்தப்பட்டது என அந்த அதிகாரிகள் தெரிவித்தனர்.

அரவிந்த் கெஜ்ரிவால்: பாஜக உங்கள் பிள்ளைகளுக்காக என்ன செய்தார்கள் என கேளுங்கள்..!

உங்கள் பிள்ளைகளுக்காக என்ன செய்தார்கள் என்று பாஜகவிடம் கேளுங்கள். டெல்லி மக்களுக்காக அவர்கள் செய்த ஒரு வேலையையாவது அவர்களால் காட்ட முடியுமா” என அரவிந்த் கெஜ்ரிவால் கேள்வி எழுப்பினார். டெல்லி டிரான்ஸ்போர்ட் நகரில் விஸ்வகர்மா தினத்தை முன்னிட்டு நடைபெற்ற நிகழ்ச்சியில் பங்கேற்று அரவிந்த் கெஜ்ரிவால் பேசினார்.

அப்போது, “மற்ற கட்சி தலைவர்களைப் போல் நான் அரசியல்வாதி இல்லை. கடந்த 10 ஆண்டுகளாக மக்களின் வளர்ச்சிக்காக உழைத்தேன். நாட்டின் கல்வி நிறுவனத்தில் படித்தவன் நான், அதனால் எப்படி வேலை செய்ய வேண்டும் என எனக்குத் தெரியும். டெல்லி மதுபானக் கொள்கை ஊழல் வழக்கு தொடர்பாக நான் சிறையில் இருந்தபோது, துணைநிலை ஆளுநர்தான் ஆட்சியை நடத்தினார்.

அப்போது, தண்ணீர் மற்றும் மின்சாரக் கட்டணங்கள் உயர்த்தப்பட்டன. ஆனால் அதுகுறித்து கவலைப்பட வேண்டாம். இப்போது நான் வெளியே வந்துவிட்டேன். அடுத்த ஆண்டு பிப்ரவரியில் ஆம் ஆத்மி கட்சி மீண்டும் ஆட்சிக்கு வந்ததும் உங்கள் கட்டணங்கள் தள்ளுபடி செய்யப்படும்.

டெல்லியில் கல்வி, சுகாதாரம், பெண்களுக்கு இலவச பேருந்துகள் என அனைத்து வகையான வளர்ச்சியையும் டெல்லியில் உள்ள ஆம் ஆத்மி கட்சியின் அரசாங்கம் ஏற்படுத்தி இருக்கிறது. உழைத்தவர்களுக்கு வாக்களியுங்கள். ஆம் ஆத்மி கட்சிக்கு வாக்களியுங்கள் என்று நான் கூறவில்லை. உங்கள் பிள்ளைகளுக்காக என்ன செய்தார்கள் என்று பாஜகவிடம் கேளுங்கள். டெல்லி மக்களுக்காக அவர்கள் செய்த ஒரு வேலையையாவது அவர்களால் காட்ட முடியுமா” என அரவிந்த் கெஜ்ரிவால் கேள்வி எழுப்பினார்.

உதயநிதி ஸ்டாலின்: தமிழ்நாடு, கேரளா ஒருபோதும் மதவாத சக்திகளுக்கு இடம் அளித்தது இல்லை…!

தமிழ்நாடு மற்றும் கேரளாவும்தான் மதவாத சக்திகளுக்கு ஒருபோதும் இடம் அளித்தது இல்லை. பாஜகவின் பாசிசத்துக்கு எதிராக ஓரணியில் திரள வேண்டும் என துணை முதல்வர் உதயநிதி ஸ்டாலின் தெரிவித்துள்ளார். கேரளாவில் இந்திய ஊடகத்துறையின் மூத்த செய்தித்துறை நிறுவனமான மலையாள மனோரமா நடத்திய இலக்கிய கலாச்சார நிகழ்ச்சி யில், தமிழ்நாடு துணை முதலமைச்சர் உதயநிதி ஸ்டாலின் சிறப்பு விருந்தினராக கலந்து கொண்டார்.

இந்த நிகழ்ச்சியில் கலந்துகொண்டு பேசிய துணை முதலமைச்சர் உதயநிதி ஸ்டாலின், “தமிழ்நாட்டின் திராவிட அரசியல் முன்னெடுப்புகள் என்பது மொழி உணர்வையும், பண்பாட்டு உணர்வையும் மையப்படுத்தியது. தமிழ்நாட்டின் ஆழமிக்க மொழி மற்றும் பண்பாடு அடிப்படையிலான வரலாறு, அதன் சமூக அரசியலுக்கு அடித்தளமாகவும் விளங்கி வருகிறது.

மொழி, இலக்கியம் மற்றும் அரசியலின் அடிப்படையில், தமிழ்நாட்டிற்கும் கேரளத்திற்கும் இணக்கமான வரலாறு உண்டு. 1924-ஆம் ஆண்டு கேரளத்தில் நடந்த வைக்கம் போராட்டத்தை முன்நின்று நடத்தி தந்தை பெரியார் வெற்றி பெற்றார். அதே போல, கேரளாவில் பிறந்த டி.எம்.நாயர், தமிழ்நாட்டில் நீதிக்கட்சியின் தொடக்கப்புள்ளியாக இருந்த தென் இந்திய நல உரிமை சங்கத்தை தொடங்கினார். அது தமிழ்நாட்டில் புது அரசியல் எழுச்சியை ஏற்படுத்தியது.

அதன் தொடர்ச்சியாகவே, தற்போது இந்தியாவின் வளர்ச்சி பெறும் மாநிலங்களில் முன்னணி இடத்தை தமிழ்நாடும், கேரளமும் பெற்று வருகிறது. இரு மாநிலங்களிலும் வெற்றிகரமான முறையில், பாசிச – வகுப்புவாத நடவடிக்கைகளுக்கு முட்டுக்கட்டையிடப்பட்டு வருகின்றன. தமிழ்நாட்டில் திராவிட இயக்கம் தோன்றுவதற்கு முன்பு, தமிழ் இலக்கிய பெருமை என்பது பக்தி, புராணம் சார்ந்ததாக தான் இருந்தது. ஆனால், எங்கள் தலைவர்களான அறிஞர் அண்ணா, முத்தமிழறிஞர் கலைஞர் உள்ளிட்டோரின் முன்னெடுப்புகளால், பகுத்தறிவு மற்றும் அறிவியல் சிந்தனை சார்ந்த தமிழ் இலக்கியங்களின் புகழ் மேலோங்க தொடங்கின.

தமிழ்நாட்டின் திராவிட இயக்கங்கள், தமிழ் மொழியை அடிப்படை அடையாளமாக வைத்து செயல்படத் தொடங்கியதற்கு, தமிழ் மொழி என்பது வெறும் தகவல் பரிமாற்ற கருவியாக மட்டுமல்லாமல், பெருமை மிகுந்த தனித்துவத்தை நிலைநாட்டும் வகையிலும் அமைந்துள்ளதே காரணம். அதற்கான எடுத்துக்காட்டு தான் இந்தி திணிப்புக்கு எதிரான நடவடிக்கையாகவும் உள்ளது” என உதயநிதி ஸ்டாலின் தெரிவித்தார். மேலும் இந்தி எனும் மொழியை எதிர்க்கவில்லை; இந்தி திணிப்பைத்தான் எதிர்க்கிறோம். இந்தியாவில் மாநில மொழிகள் உயிரோடு இருக்கிறது என்றால் அதற்கு திராவிட இயக்கம்தான் காரணம்.

மாநில மொழிகளின் உரிமையை காப்பதில் இந்தி திணிப்புக்கு எதிரான போராட்டம் முக்கிய பங்கு வகித்தது. இந்தி திணிப்புக்கு எதிராக திராவிட இயக்கம் நடத்திய போராட்டம் மிக முக்கியமானது. முற்போக்கு மற்றும் அறிவியல் கருத்துகளை திராவிட இலக்கியம் வளர்த்தது. மூட நம்பிக்கைகளை களைவதற்கான பணிகளை திராவிட இயக்கம் வளர்த்தெடுத்தது. சமத்துவத்துக்கு எதிராகவும் ஏழை, எளிய மக்களின் நலனுக்கு எதிராகவும் சமஸ்கிருதம் இருந்தது. சமஸ்கிருதம் தெரிந்தால்தான் மருத்துவம் படிக்க முடியும் என்ற நிலையை மாற்றியது நீதிக்கட்சிதான்.

சமஸ்கிருத ஆதிக்கத்தை எதிர்த்து குரல் கொடுத்தவர் தந்தை பெரியார். இந்தி திணிப்புக்கு எதிராக தந்தை பெரியார் நடத்திய போராட்டங்கள் சமூகத்தில் மாற்றங்களை ஏற்படுத்தின. தமிழ் மக்களின் உணர்வுகளுக்கு எதிரானதாக சமஸ்கிருதம் இருந்தது; சம உரிமையை மறுத்தது. முற்போக்கு கருத்துகளை வளர்த்தெடுப்பதில் தமிழ்த் திரைப்படங்கள் முக்கிய பங்காற்றின. திரைப்படங்கள் மூலமாகவும் சமூக சீர்த்திருத்தங்களை திமுக மேற்கொண்டது. பேரறிஞர் அண்ணா, கலைஞரின் திரை வசனங்கள் சமூகத்தில் பெரும் மாற்றங்களை ஏற்படுத்தின.

நீட் நுழைவுத் தேர்வு என்பது மாநில சுயாட்சிக்கு எதிராக உள்ளது. ஒரே நாடு, ஒரே தேர்தல் என்ற பாஜக அரசின் திட்டத்தை தமிழ்நாடும், கேரளாவும் இணைந்து முறியடிக்க வேண்டும். தமிழ்நாடு மற்றும் கேரளாவும்தான் மதவாத சக்திகளுக்கு ஒருபோதும் இடம் அளித்தது இல்லை. பாஜகவின் பாசிசத்துக்கு எதிராக ஓரணியில் திரள வேண்டும் என உதயநிதி ஸ்டாலின் தெரிவித்தார்.

உதயநிதி ஸ்டாலின் பெருமிதம்: பகுத்தறிவையும் அறிவியல் பூர்வ வளர்ச்சியையும் திராவிட இயக்கம்தான் வளர்த்து வருகிறது..!

திராவிட இயக்கம்தான் பகுத்தறிவையும் அறிவியல் பூர்வ வளர்ச்சியையும் வளர்த்து வருகிறது என துணை முதல்வர் உதயநிதி ஸ்டாலின் தெரிவித்துள்ளார். கேரளாவில் இந்திய ஊடகத்துறையின் மூத்த செய்தித்துறை நிறுவனமான மலையாள மனோரமா நடத்திய இலக்கிய கலாச்சார நிகழ்ச்சி யில், தமிழ்நாடு துணை முதலமைச்சர் உதயநிதி ஸ்டாலின் சிறப்பு விருந்தினராக கலந்து கொண்டார்.