இந்தியா – Page 4

லக்னோ-பரவுனி எக்ஸ்பிரஸ் ரயில்: ரயில் ஒட்டுநர் லோகோ பைலட் கவனக்குறைவால் பறிபோன உயிர்..!

கடந்த சில மாதங்களாக இந்தியாவில் அடிக்கடி ரயில் விபத்துக்கள் நடந்து வரும் நிலையில், ரயில்வே துறை கூடுதல் கவனம் செலுத்தி ரயில் விபத்துக்களை தவிர்க்க வேண்டும் என்று எதிர்க்கட்சிகள் வலியுறுத்தி வருகின்றன. இந்நிலையில், லக்னோ-பரவுனி எக்ஸ்பிரஸ் ரயில் நேற்று பீகார் மாநிலம் பரவுனி சந்திப்பு ரயில் நிலையத்தை வந்தடைந்தது.

அமர் குமார் ராவ் என்ற ரயில்வே ஊழியர் இன்ஜினுடன் பெட்டியை இணைக்கும் கப்ளிங்-ஐ பிரிக்கும் பணியில் ஈடுபட்டபோது எதிர்பாராத விதமாக இரண்டுக்கும் இடையே சிக்கி உடல் நசுங்கி உயிரிழந்தார். ரயில் ஒட்டுநர் லோகோ பைலட் இன்ஜினை முன்னோக்கி இயக்குவதற்கு பதிலாக பின்னோக்கி இயக்கியதால் அமர் குமார் ராவ் பலியானது நாட்டு மக்களிடையே மிகுந்த வேதனையை ஏற்படுத்தி யுள்ளது.

ராஜ் தாக்கரே: மசூதிகளில் உள்ள ஒலிபெருக்கிகளை அகற்ற வேண்டும்..!

மகாராஷ்டிரா மாநிலத்திலுள்ள அனைத்து மசூதிகளிலும் பொருத்தப்பட்டுள்ள ஒலிபெருக்கிகளை அகற்ற வேண்டுமென மகாராஷ்டிரா நவ நிர்மாண் சேனா கட்சியின் நிறுவனத் தலைவர் ராஜ் தாக்கரே தெரிவித்துள்ளார்.

மகாராஷ்டிராவை ஆளும் ஏக்நாத் ஷிண்டே தலைமையிலான சிவசேனா, அஜித் பவார் தலைமையிலான தேசியவாத காங்கிரஸ், பாஜக ஆகிய கூட்டணி கட்சிகளான மஹாயுதி கூட்டணியின் பதவிக்காலம் நவம்பர் 26-ம் தேதியுடன் முடிவடைகிறது. இத்தனை தொடர்ந்து 288 உறுப்பினர்களைக் கொண்ட மகாராஷ்டிரா சட்டசபைக்கு வரும் 20-ஆம் தேதி ஒரே கட்டமாக வாக்கு பதிவு நடத்தப்பட்டு வரும் 23-ஆம் தேதி வாக்கு எண்ணப்பட்டு தேர்தல் முடிவுகள் வெளிவரவுள்ளது.

இந்நிலையில், மகாராஷ்டிராவில் அமைந்துள்ள மசூதிகளில் உள்ள அனைத்து ஒலிபெருக்கிகளையும் அகற்ற வேண்டும். மக்களுக்கு இடையூறு ஏற்படுத்தும் வகையிலான ஒலிபெருக்கிகளுக்கு அனுமதி இல்லை. கோயில்களில் ஆண்டு முழுவதும் ஒலிபெருக்கிகள் பொருத்தப்பட்டிருந்தால் அவற்றையும் அகற்ற வேண்டும். ஆனால், கோயில்களில் எல்லா நேரமும் ஒலிபெருக்கிகள் பயன்படுத்துவது இல்லை.

கோயிலுக்குச் செல்லும் மக்கள் சில நிமிடத்தில் இறைவனின் பாதத்தை தொட்டு வணங்கிவிட்டு வெளிவந்து விடுகின்றனர். பாலாசாஹேப் தாக்கரேவின் மகன் முதல்வராக இருந்த போதும் நான் ஒலிபெருக்கிகளை எதிர்த்தேன். எங்கள் கட்சியை சேர்ந்த சுமார் 17,000 பேர் மீது வழக்கு பதிவு செய்யப்பட்டது. ஒலிபெருக்கிகளை அகற்றாவிட்டால் மசூதிகளுக்கு முன்பாக அனுமன் சாலிசாவை பாடுவோம் என்று நான் சொல்லி இருந்தேன்” என மகாராஷ்டிரா சட்டப்பேரவை தேர்தல் பரப்புரையில் ராஜ் தாக்கரே தெரிவித்தார்.

மருது சகோதரர்கள் போல கே.கே.எஸ்.எஸ்.ஆரும் , தங்கம் தென்னரசும் விருதுநகர் மண்ணின் தூண்..!

தமிழக முதலமைச்சர் மு.க.ஸ்டாலின் தமிழகம் முழுவதும் கள ஆய்வு பணிகளை மேற்கொண்டு வருகிறார். இதன் தொடர்ச்சியாக விருதுநகர் மாவட்டத்திற்கு 2 நாள் சுற்றுப்பயணமாக பல்வேறு அரசு நிகழ்ச்சியில் கலந்துக் கொள்வதற்காக முதலமைச்சர் மு.க.ஸ்டாலின் சென்றார். விருதுநகர் மாவட்ட புதிய ஆட்சியர் அலுவலகத்தைத் திறந்து வைத்து 40 ஆயிரம் நபருக்கு பட்டா வழங்கக் கூடிய இந்த மாபெரும் விழாவில் மு.க.ஸ்டாலின் கலந்துகொண்டு கொண்டார்.

மேலும், பட்டாம்புதூரில் நடைபெற்ற அரசு விழாவில் பங்கேற்ற தமிழ்நாடு முதலமைச்சர் மு.க.ஸ்டாலின் உரையாற்றினார். அப்போது, விருதுநகர் மாவட்டத்தின் புதிய ஆட்சியர் அலுவலகத்தைத் திறந்து வைத்து 40 ஆயிரம் நபருக்கு பட்டா வழங்கக் கூடிய இந்த மாபெரும் விழாவில் கலந்துகொண்டு உங்களையெல்லாம் சந்திக்கக்கூடிய வாய்ப்பைப் பெற்றமைக்கு நான் பெருமகிழ்ச்சி அடைகிறேன்.

மருது சகோதரர்கள் போல இந்த மண்ணுக்கு தூணாக விளங்கக்கூடிய மாவட்டச் செயலாளர்கள் கே.கே.எஸ்.எஸ்.ஆர். ராமச்சந்திரன் அவர்களையும், தங்கம் தென்னரசு அவர்களையும் நான் மனதார பாராட்டுகிறேன், வாழ்த்துகிறேன். அந்த இருவருக்கும் மாவட்ட வளர்ச்சித் திட்டங்களுக்கு துணை நிற்கக்கூடிய மாவட்ட ஆட்சியர் திரு.ஜெயசீலன் உள்ளிட்ட அரசு அதிகாரிகளுக்கும் என்னுடைய வாழ்த்துகளையும், பாராட்டுக்களையும் நான் தெரிவித்துக் கொள்கிறேன் என மு.க.ஸ்டாலின் தெரிவித்தார்.

நீட் மாணவியை பலாத்காரம் செய்த பயிற்சி ஆசிரியர்கள் மீண்டும் கைது.

உத்தரபிரதேச மாநிலம் கான்பூரிலுள்ள நீட் பயிற்சி மையத்திற்கு கடந்த 2022-ஆம் ஆண்டு மாணவி பயிற்சிக்காக சென்றார். கடந்த ஜனவரி மாதம் உயிரியல் பயிற்சி அளிக்கும் 32 வயதான ஆசிரியர் சாஹில் சித்திக், மாணவியை தனது வீட்டிற்கு விருந்துக்கு அழைத்தார். மாணவி அங்கு சென்ற போது யாரும் இல்லை. அந்த தனிமையை பயன்படுத்திய ஆசிரியர் சாஹில் சித்திக், மாணவியை பலாத்காரம் செய்து வீடியோவில் படம் பிடித்தார்.

பின்னர் அதை வைத்து மிரட்டி 6 மாதமாக ஆசைக்கு இணங்க வைத்தார். இதே போல் நடந்த மற்றொரு விருந்தில் 39 வயதான வேதியியல் ஆசிரியர் விகாஸ் போர்வால் என்பவரும் மாணவியை பலாத்காரம் செய்தார். இந்நிலையில் இதே போல் இன்னொரு மாணவியை ஆசிரியர் சாஹில் சித்திக் பலாத்காரம் செய்த காட்சிகள் வைரலாகி அவர் கைது செய்யப்பட்டார்.

பின்னர் ஜாமீனில் வெளிவந்த அவர் ஹோலி பண்டிகைக்காக சொந்த ஊருக்கு சென்ற மாணவியை உடனே கான்பூருக்கு வரும்படி மிரட்டினார். இதில் பயந்து போன மாணவி காவல் நிலையத்தில் மீண்டும் புகார் கொடுத்தார். அதை தொடர்ந்து காவல்துறையினர் மீண்டும் பயிற்சி ஆசிரியர்கள் சாஹில் சித்திக், விகாஸ் போர்வால் ஆகியோரை கைது செய்தனர்.

ஜம்மு – காஷ்மீர் சிறப்பு அந்தஸ்து தீர்மானத்துக்கு எதிராக அமளி பாஜக MLA க்கள் பேரவையிலிருந்து குண்டு கட்டாக வெளியேற்றம்..!

ஜம்மு – காஷ்மீருக்கு சிறப்பு அந்தஸ்து வழங்க கோரி தீர்மானம் நிறைவேற்றப்பட்டதற்கு எதிராக பாஜக MLA-க்கள் தொடர்ந்து 3-வது நாளாக அமளியில் ஈடுபட்டனர். இதையடுத்து 12 பாஜக MLA க்கள் மற்றும் அவாமி இதிஹாத் கட்சி MLA ஆகியோர் அவையில் இருந்து வெளியேற்றப்பட்டனர். சமீபத்தில் நடந்த ஜம்மு – காஷ்மீர் பேரவை தேர்தலில் தேசிய மாநாடு-காங்கிரஸ் கூட்டணி வெற்றி பெற்றது.தேசிய மாநாட்டு கட்சியின் மூத்த தலைவர் உமர் அப்துல்லா முதலமைசராக பதவியேற்றார்.

உமர் அப்துல்லா முதலமைசரான பின் நடந்த முதல் அமைச்சரவை கூட்டத்தில் காஷ்மீருக்கு மாநில அந்தஸ்து வழங்குவதற்கான தீர்மானம் நிறைவேற்றப்பட்டது. இத்தனை தொடர்ந்து நடந்த சட்டமன்ற கூட்டத்தில் காஷ்மீருக்கு மீண்டும் சிறப்பு அந்தஸ்தை ஏற்படுத்துவதற்கான புதிய தீர்மானத்தை துணை முதலமைசர் சுரீந்தர் சவுத்ரி கொண்டு வந்தார். இந்த தீர்மானம் அவையில் நிறைவேற்றப்பட்டது. ஆனால் இந்த தீர்மானத்தை எதிர்த்து பாஜக MLA க்கள்,தேசிய மாநாட்டு கட்சி உறுப்பினர்களுடன் கைகலப்பில் ஈடுபட்டனர்.

இந்நிலையில், மூன்றாவது நாளான நேற்றும் இந்த விவகாரத்தை பாஜக MLA க்கள் எழுப்பினர்.பாகிஸ்தானின் திட்டம் இந்தியாவில் செல்லுபடியாகாது என்று கூறி அவையின் மைய பகுதிக்கு வந்து கோஷங்களை எழுப்பினர். இதனால் அவையில் அமளி ஏற்பட்டது. இதையடுத்து சபாநாயகர் அப்துல் ரஹீம் ராதர் அமளியில் ஈடுபட்ட 12 பாஜக MLA க்கள் மற்றும் அவாமி இதிஹாத் கட்சி உறுப்பினர் ஷேக் குர்ஷித்தை அவையில் இருந்து வெளியேற்ற அவை காவலர்களுக்கு உத்தரவிட்டார். இதையடுத்து அவர்கள் குண்டு கட்டாக வெளியேற்றப்பட்டனர்.

ராகுல் காந்தி: நாங்கள் உங்களை ‘பழங்குடியினர்’ என்கிறோம்…! ஆங்கிலேயரை போல பாஜக ‘வனவாசி’ என்கின்றனர் ..!

நாங்கள் உங்களை ‘பழங்குடியினர்’ என்கிறோம். ஆனால் பாஜக உங்களை ‘வனவாசி’ என்கிறது. ஆங்கிலேயர்கள் உங்களை வனவாசிகள் என்றும் அழைத்தார்கள். என மக்களவை எதிர்க்கட்சித் தலைவர் ராகுல் காந்தி விமர்சித்துள்ளார்.

ஜார்க்கண்ட் சட்டப்பேரவைத் தேர்லை முன்னிட்டு சிம்டேகா மற்றும் லெஹெர்டேகா நகரங்களில் நடைபெற்ற பிரச்சார பொதுக் கூட்டத்தில் ராகுல் காந்தி உரையாற்றினார். அப்போது, “நாட்டில் இன்று இரண்டு சித்தாந்தங்களுக்கு இடையே சண்டை நடக்கிறது. ஒரு பக்கம் – இண்டியா கூட்டணி. மறுபக்கம் பாஜக மற்றும் RSS. இண்டியா கூட்டணி அரசியலமைப்பைப் பாதுகாக்க முயல்கிறது. பாஜகவும் RSS அமைப்பும் அரசியல் சட்டத்தை ஒழிக்க விரும்புகின்றன.

அரசியலமைப்பு என்பது வெறும் புத்தகம் அல்ல. இதில் பிர்சா முண்டா, அம்பேத்கர், ஜோதிராவ் பூலே, மகாத்மா காந்தி ஆகியோரின் சிந்தனைகள் உள்ளன. இந்த அரசியலமைப்புச் சட்டம்தான் நாட்டின் பழங்குடியினர், தலித்துகள், பிற்படுத்தப்பட்ட மக்கள் மற்றும் ஏழைகளை பாதுகாக்கிறது. எனவே, அரசியலமைப்புச் சட்டத்தின் மூலம் நாட்டை இயக்க வேண்டும் என்று இண்டியா கூட்டணி விரும்புகிறது.

நாங்கள் உங்களை ‘பழங்குடியினர்’ என்கிறோம். ஆனால் பாஜக உங்களை ‘வனவாசி’ என்கிறது. ஆங்கிலேயர்கள் உங்களை வனவாசிகள் என்றும் அழைத்தார்கள். உங்கள் தண்ணீர், காடுகள் மற்றும் நிலங்களை பாதுகாக்க பிர்சா முண்டா ஆங்கிலேயர்களுடன் போராடினார். இன்று நாங்களும் உங்கள் உரிமைக்காக போராடுகிறோம். உங்கள் தண்ணீர், காடு, நிலம் ஆகியவற்றை பாஜக பறிக்க நினைக்கிறது. அதனால்தான் உங்களை வனவாசி என்று அழைக்கிறது. ஆதிவாசி என்றால் நாட்டின் முதல் உரிமையாளர் என்று பொருள். அதேசமயம் வனவாசியாக இருப்பது உங்களுக்கு நாட்டில் எந்த உரிமையும் இல்லை என்று அர்த்தம்.

நீங்கள் பழங்குடியினர். நாட்டின் மீது உங்களுக்கே முதல் உரிமை உள்ளது. அரசமைப்புச் சட்டத்தில் எங்கும் ‘வனவாசி’ என்ற வார்த்தையை நீங்கள் காண முடியாது. அரசமைப்புச் சட்டத்தை உருவாக்கியவர்களும் வனவாசி என்பதற்குப் பதிலாக ‘பழங்குடியினர்’ என்ற வார்த்தையையே பயன்படுத்தினார்கள். ஏனென்றால், நீர், காடு, நிலம் ஆகியவற்றின் உண்மையான உரிமையாளர்கள் பழங்குடியினர் என்று அவர்கள் கூற விரும்பினர். பிர்சா முண்டாவும், அதற்காகவே போராடினார். ஆனால், பாஜகவோ பழங்குடியினரிடம் இருந்து நீர், காடு, நிலம் ஆகியவற்றைப் பறிக்க முயற்சிக்கிறது.

நாட்டில் 50% ஓபிசி, 15% தலித், 8% பழங்குடியினர் மற்றும் 15% சிறுபான்மை சமூக மக்கள் உள்ளனர். இந்த மக்கள் தொகை மொத்தத்தில் 90% ஆகும். ஆனால் நாட்டின் பெரிய நிறுவனங்களின் நிர்வாகத்தில் ஓபிசி, தலித் மற்றும் பழங்குடி வகுப்பைச் சேர்ந்த ஒருவரைக்கூட நீங்கள் பார்க்க முடியாது. பாஜகவினர் எங்கு சென்றாலும் ஒரு சகோதரரை இன்னொரு சகோதரருடனும், ஒரு மதத்தை இன்னொரு மதத்துடனும், ஒரு மொழியை இன்னொரு மொழியுடனும் சண்டையிட வைக்கிறார்கள்.

மணிப்பூர் இவ்வளவு நாட்களாக எரிந்து கொண்டிருக்கிறது. ஆனால் பிரதமர் இன்றுவரை அங்கு செல்லவில்லை. ஏனெனில் அவரது சித்தாந்தத்தால்தான் அங்கு வன்முறை பரவியது. அதனால்தான் நாங்கள் ‘இந்திய விழிப்புணர்வு யாத்திரை’ நடத்தினோம். அதில் ‘வெறுப்பின் சந்தையில் அன்பின் கடையைத் திறப்போம்’ என்ற முழக்கம் இருந்தது. நாட்டில் தலித்துகள், பிற்படுத்தப்பட்டோர், பழங்குடியினருக்கு உரிய பங்கேற்பு இல்லை. நாட்டின் தலித், பிற்படுத்தப்பட்ட மற்றும் பழங்குடியினர் பிரிவைச் சேர்ந்தவர்கள் திறமையானவர்கள். உங்களிடம் எந்த குறையும் இல்லை. நீங்கள் எந்த வகையான வேலையையும் செய்யலாம். ஆனால் உங்களுக்கான பாதை தடுக்கப்பட்டுள்ளது.

சாதிவாரி கணக்கெடுப்பு விவகாரத்தை நான் நாடாளுமன்றத்தில் எழுப்பியபோது, நரேந்திர மோடி அமைதியாகி விட்டார். உரிய பங்கேற்பு இல்லாத 90% மக்களுக்கு பங்கேற்பு வழங்கப்பட வேண்டும் என்று நான் விரும்புகிறேன். ஆனால் நரேந்திர மோடி, அமித் ஷா, அம்பானி – அதானி போன்ற ஒரு சிலரால் நாட்டை நடத்த வேண்டும் என்று பாஜக விரும்புகிறது. ஒரு சில கோடீஸ்வரர்களின் ரூ.16 லட்சம் கோடி கடனை நரேந்திர மோடி தள்ளுபடி செய்தார்.

ஜார்க்கண்டில் எத்தனை பேருக்கு நரேந்திர மோடி கடன்களை தள்ளுபடி செய்தார்? நமது அரசுகள் விவசாயிகளின் கடனை தள்ளுபடி செய்யும்போது, விவசாயிகளின் பழக்கத்தை காங்கிரஸ் கெடுப்பதாக பாஜக கூறியது. ஆனால், கோடீஸ்வரர்களின் கடன்கள் தள்ளுபடி செய்யப்படும் போது, அவர்களின் பழக்கவழக்கங்கள் கெட்டுப் போகவில்லையா? பணக்காரர்களின் பாக்கெட்டுகளுக்கு பணம் சென்றால், அது விவசாயிகளின் பாக்கெட்டுகளுக்கும் செல்லும் என்று நாங்கள் நம்புகிறோம்” என ராகுல் காந்தி தெரிவித்தார்.

நரேந்திர மோடி விமர்சனம்: சக்கரமும் பிரேக்கும் இல்லாத வாகனத்தைப் போன்றது மகாராஷ்டிர எதிர்க்கட்சி கூட்டணி..!

சக்கரமும் பிரேக்கும் இல்லாத வாகனத்தைப் போன்றது மகா விகாஸ் அகாதி கூட்டணி என பிரதமர் நரேந்திர மோடி விமர்சித்துள்ளார். மகாராஷ்டிராவை ஆளும் ஏக்நாத் ஷிண்டே தலைமையிலான சிவசேனா, அஜித் பவார் தலைமையிலான தேசியவாத காங்கிரஸ், பாஜக ஆகிய கூட்டணி கட்சிகளான மஹாயுதி கூட்டணியின் பதவிக்காலம் நவம்பர் 26-ம் தேதியுடன் முடிவடைகிறது. இத்தனை தொடர்ந்து 288 உறுப்பினர்களைக் கொண்ட மகாராஷ்டிரா சட்டசபைக்கு வரும் 20-ஆம் தேதி ஒரே கட்டமாக வாக்கு பதிவு நடத்தப்பட்டு வரும் 23-ஆம் தேதி வாக்கு எண்ணப்பட்டு தேர்தல் முடிவுகள் வெளிவரவுள்ளது.

இந்நிலையில், மஹாயுதி கூட்டணிக்கும், உத்தவ் தாக்கரே தலைமையிலான சிவசேனா, சரத் பவார் தலைமையிலான தேசியவாத காங்கிரஸ், காங்கிரஸ் ஆகிய கூட்டணி கட்சிகளான மகா விகாஸ் அகாடி கூட்டணிக்கும் ஆட்சியை கைப்பற்றுவதில் கடும் போட்டி நிலவுகிறது. இந்நிலையில், மகாராஷ்டிர சட்டப்பேரவைத் தேர்தலை முன்னிட்டு துலேயில் நடைபெற்ற தேர்தல் பிரச்சார பொதுக்கூட்டத்தில் பிரதமர் நரேந்திர மோடி உரையாற்றினார்.

அப்போது, “மகாராஷ்டிராவிடம் நான் எதை கேட்டபோதும், மகாராஷ்டிரா மக்கள் எனக்கு தாராளமாக தங்கள் ஆசீர்வாதங்களை வழங்கி இருக்கிறார்கள். 2014 சட்டமன்றத் தேர்தலின் போது இந்த துலே நகருக்கு வந்து, மகாராஷ்டிராவில் பாஜக ஆட்சி அமைக்க வேண்டும் என்று உங்களிடம் கோரிக்கை வைத்தேன். மகாராஷ்டிராவில் 15 ஆண்டுகால அரசியல் சுழற்சியை முறியடித்து பாஜகவை வரலாறு காணாத வெற்றிக்கு அழைத்துச் சென்றீர்கள்.

இன்று நான் மீண்டும் இங்கு துலே வந்துள்ளேன். மகாராஷ்டிராவில் துலேயில் இருந்தே தேர்தல் பிரசாரத்தை தொடங்குகிறேன். இந்த கூட்டம், இந்த உற்சாகம் உண்மையில் அதிக நம்பிக்கையை அளிக்கிறது. பாஜக அங்கம் வகிக்குமு் மஹாயுதி கூட்டணியின் ஒவ்வொரு வேட்பாளருக்கும் உங்கள் ஆசிர்வாதம் தேவை. கடந்த 2.5 ஆண்டுகளில் மகாராஷ்டிராவின் வளர்ச்சி அடைந்துள்ள வேகத்தை நிறுத்த அனுமதிக்க மாட்டோம் என்று நான் உறுதியளிக்கிறேன். அடுத்த 5 ஆண்டுகளில் மகாராஷ்டிராவின் முன்னேற்றத்தை புதிய உயரத்திற்கு கொண்டு செல்வோம். மகாராஷ்டிராவுக்குத் தேவையான நல்லாட்சியை மகாயுதி அரசால் மட்டுமே வழங்க முடியும்.

மற்றொரு புறம் மகா விகாஸ் அகாதி கூட்டணி உள்ளது. அந்த வாகனத்தில் சக்கரங்களும் இல்லை, பிரேக்குகளும் இல்லை. ஓட்டுநர் இருக்கையில் உட்காரக்கூட சண்டை. அரசியலுக்கு வரும் ஒவ்வொருவருக்கும் அவரவருக்கென்று இலக்கு இருக்கும். எங்களைப் போன்றவர்கள் பொதுமக்களை கடவுளின் வடிவமாகக் கருதி பொதுமக்களுக்கு சேவை செய்ய அரசியலுக்கு வந்தவர்கள்.

அதே சமயம் சிலரது அரசியலின் அடிப்படையே ‘மக்களை கொள்ளையடிப்பது’ தான். மக்களை கொள்ளையடிக்கும் எண்ணம் கொண்ட மகா விகாஸ் அகாதி போன்றவர்கள் ஆட்சிக்கு வந்ததும், வளர்ச்சியை நிறுத்திவிட்டு ஒவ்வொரு திட்டத்திலும் ஊழலில் ஈடுபடுகிறார்கள். மகா விகாஸ் அகாதி கூட்டணியின் 2.5 வருட மோசடி அரசாங்கத்தை நீங்கள் பார்த்திருப்பீர்கள். இவர்கள் முதலில் அரசைக் கொள்ளையடித்துவிட்டு, பிறகு மகாராஷ்டிரா மக்களைக் கொள்ளையடிக்கத் தொடங்கினர்.

மகாராஷ்டிரா முதலமைச்சர் ஏக்நாத் ஷிண்டே தலைமையில் 2.5 ஆண்டுகளில் மகாராஷ்டிரா, தனது பெருமையையும் வளர்ச்சியின் நம்பிக்கையையும் மீட்டெடுத்துள்ளது. வளர்ந்த மகாராஷ்டிரா மற்றும் வளர்ந்த இந்தியாவிற்கு, நமது சகோதரிகள் மற்றும் மகள்களின் வாழ்க்கையை எளிதாக்குவது மற்றும் அவர்களுக்கு அதிகாரம் அளிப்பது மிகவும் முக்கியம்.

பெண்கள் முன்னேறினால், ஒட்டுமொத்த சமூகமும் வேகமாக முன்னேறும். எனவே, கடந்த 10 ஆண்டுகளில் பெண்களை மையமாக வைத்து மத்திய அரசு முக்கிய முடிவுகளை எடுத்துள்ளது. பெண்களுக்கு அதிகாரம் அளிக்க எங்கள் அரசு எடுத்து வரும் நடவடிக்கைகளை காங்கிரசாலும், அதன் கூட்டணியாலும் பொறுத்துக்கொள்ள முடியவில்லை.

தகுதிவாய்ந்த பெண்களுக்கு மாதம் ரூ. 1,500, ஆண்டுக்கு 3 இலவச காஸ் சிலிண்டர், ஓபிசி மற்றும் பொருளாதார ரீதியாக பின்தங்கிய உயர்சாதி மாணவிகளுக்கான உயர்கல்விக் கடன் தள்ளுபடி ஆகியவற்றை வழங்கும் மஜ்ஹி லட்கி பஹின் திட்டம் (Majhi Ladki Bahin Yojana) பற்றி எவ்வளவு விவாதம் நடக்கிறது என்பது உங்களுக்குத் தெரியும்.

இந்த திட்டத்தை நிறுத்த காங்கிரஸ் சதி செய்கிறது. காங்கிரஸும் அதன் கூட்டணிக் கட்சிகளும் ஆட்சிக்கு வந்தால், இந்தத் திட்டத்தை முதலில் நிறுத்த முடிவு செய்துள்ளனர். எனவே, மகாராஷ்டிராவின் ஒவ்வொரு பெண்ணும் இவர்களிடம் எச்சரிக்கையாக இருக்க வேண்டும். பெண் சக்தி வலுப்பெறுவதை இவர்களால் ஏற்க முடியவில்லை.

மராத்தி மொழிக்கு நமது அரசு உயர் அந்தஸ்தை வழங்கியதில் பெருமை கொள்கிறேன். மராத்தி உயர்தர மொழி அந்தஸ்தைப் பெற வேண்டும் என்பதே மக்களின் விருப்பம். மகாராஷ்டிராவிலும் மத்தியிலும் காங்கிரஸ் கட்சி ஒரே நேரத்தில் ஆட்சி அமைத்தது. ஆனால், மராத்தி ஒரு உயர்தர மொழி அந்தஸ்தைப் பெற வேண்டிய அவசியம் இருப்பதாக அவர்கள் உணரவில்லை. மராத்தி மொழிக்கு மரியாதை வேண்டும் என்ற கோரிக்கையை அவர்கள் எப்போதும் புறக்கணித்தே வந்துள்ளனர். மகாராஷ்டிரா என்ற பெயரில் அரசியல் செய்யும் இவர்களின் உண்மை முகம் இதுதான்.

பாஜக எப்போதும் ‘அனைவருடனும் இணைந்து அனைவருக்குமான வளர்ச்சி’ என்ற நோக்கத்துடன் செயல்பட்டு வருகிறது. இந்த தீர்மானத்தில் நமது பழங்குடி சமூகமும் முக்கிய அங்கம் வகிக்கிறது. நாட்டின் சுதந்திரம் மற்றும் வளர்ச்சியில் முக்கிய பங்களிப்பை வழங்கிய சமுதாயம் இது.

ஆனால் காங்கிரஸும் அதன் கூட்டணிக் கட்சிகளும் பழங்குடியினரின் பெருமை மற்றும் பழங்குடியினரின் சுயமரியாதைக்கு ஒருபோதும் முக்கியத்துவம் கொடுத்ததில்லை. அடல் பிஹாரி வாஜ்பாய் தலைமையில் பாஜக அரசு வந்தபோது, பழங்குடியினருக்கு தனி அமைச்சகம் உருவாக்கப்பட்டது. அப்போதுதான் முதன்முறையாக இந்த சமுதாயத்தின் நலன்களும் எதிர்பார்ப்புகளும் முக்கியத்துவம் பெற்றன. பிர்சா முண்டா பிறந்த நாளை நமது அரசாங்கம் ‘பழங்குடியினரின் பெருமை தினமாக’ கொண்டாடத் தொடங்கியுள்ளது. பழங்குடி பாரம்பரியத்திற்கு அங்கீகாரம் அளிப்பதே இதன் நோக்கம்.

ஒரு சாதியை இன்னொரு சாதியை எதிர்த்துப் போராட வைக்கும் ஆபத்தான ஆட்டத்தை காங்கிரஸ் ஆடுகிறது. தலித்துகள், பிற்படுத்தப்பட்டோர் மற்றும் பழங்குடியினர் முன்னேறுவதை காங்கிரஸால் ஏற்க முடியாது என்பதால் இந்த ஆட்டம் ஆடப்படுகிறது. இதுதான் காங்கிரஸின் வரலாறு. சுதந்திரத்தின் போது, காங்கிரஸின் காலத்தில், பாபா சாகேப் அம்பேத்கர், சுரண்டப்பட்ட மற்றும் தாழ்த்தப்பட்டோருக்கு இடஒதுக்கீடு கிடைக்க வேண்டும் என்று கடுமையாக முயற்சி செய்தார்.

ஆனால், தலித்துகள், பிற்படுத்தப்பட்டோர் மற்றும் பழங்குடியினருக்கு இடஒதுக்கீடு வழங்கப்பட மாட்டாது என்பதில் நேரு உறுதியாக இருந்தார். மிகுந்த சிரமத்துடன் தலித்துகள் மற்றும் பிற்படுத்தப்பட்ட வகுப்பினருக்கு அம்பேத்கர் இடஒதுக்கீடு வழங்கினார். இந்திரா காந்தி, ராஜீவ் காந்தி வந்த பிறகும் காங்கிரசின் சிந்தனை மற்றும் அணுகுமுறையில் மாற்றம் ஏற்படவில்லை. ராஜீவ் காந்தியும் ஓபிசி இடஒதுக்கீட்டை வெளிப்படையாக எதிர்த்தார். SC, ST மற்றும் OBC சமூகங்கள் அதிகாரம் பெற்றால், அவர்களின் அரசியல் கடையின் ஷட்டர் இழுத்து மூடப்படும் என்பது அவர்களுக்கு தெரியும்.

ராஜீவ் காந்திக்குப் பிறகு, இப்போது இந்தக் குடும்பத்தின் நான்காம் தலைமுறை பட்டத்து இளவரசரும் அதே ஆபத்தான மனப்பான்மையுடன் செயல்படுகிறார். SC/ST சமுதாயத்தின் ஒற்றுமையை உடைப்பதும், OBC சமுதாயத்தின் ஒற்றுமையை சிதைப்பதும்தான் காங்கிரஸின் ஒரே நோக்கம். SC சமூகம் பல்வேறு சாதிகளாக சிதறி இருக்க வேண்டும் என்று காங்கிரஸ் விரும்புகிறது. இதனால் SC சமூகத்தின் கூட்டு சக்தி பலவீனமடைகிறது.

OBC மற்றும் ST சமூகங்களை பல்வேறு சாதிகளாக பிரிக்க காங்கிரஸ் முயற்சிக்கிறது. அதனால்தான் சொல்கிறேன் – உங்களிடம் ஒற்றுமை இருப்பதால் நீங்கள் பாதுகாப்பாக இருக்கிறீர்கள். நாம் ஒற்றுமையாக இருந்து காங்கிரஸின் ஆபத்தான விளையாட்டை முறியடித்து வளர்ச்சிப் பாதையில் முன்னேற வேண்டும். காங்கிரஸின் தேச விரோத உணர்வுதான் அதன் வேரில் உள்ளது. நாட்டை உடைக்கும் சதிகளில் காங்கிரஸ் எப்போதும் அங்கம் வகிக்கிறது” என நரேந்திர மோடி உரையாற்றினார்.

ராகுல் காந்தி: இண்டியா கூட்டணி அரசியலமைப்பைப் பாதுகாக்க முயல்கிறது..! பாஜக, RSS அரசியல் அரசியலமைப்பை ஒழிக்க முயல்கிறது..!

இண்டியா கூட்டணி அரசியலமைப்பைப் பாதுகாக்க முயல்கிறது. பாஜகவும் RSS அமைப்பும் அரசியல் சட்டத்தை ஒழிக்க விரும்புகின்றன என மக்களவை எதிர்க்கட்சித் தலைவர் ராகுல் காந்தி விமர்சித்துள்ளார்.

ஸ்மிருதி இராணி: சிறப்பு அந்தஸ்தை காஷ்மீருக்கு மீண்டும் இனி எந்த காலத்திலும் கொண்டு வர முடியாது..!

ஜம்மு – காஷ்மீருக்கு சிறப்பு அந்தஸ்து அளித்த 370-வது சட்டப்பிரிவை இனி எந்த காலத்திலும் மீண்டும் கொண்டு வர முடியாது என முன்னாள் ஒன்றிய அமைச்சர் ஸ்மிருதி இராணி தெரிவித்துள்ளார். கடந்த 2019-ஆம் ஆண்டு ஆகஸ்ட் 5-ஆம் தேதி ஜம்மு – காஷ்மீருக்கான சிறப்பு அந்தஸ்தை ரத்து செய்யும் தீர்மானம் நாடாளுமன்றத்தில் நிறைவேற்றப்பட்டு மறுநாள் குடியரசு தலைவரின் ஒப்புதல் பெறப்பட்டது. இதன் மூலம் இந்தியர்கள் யார் வேண்டுமானாலும் காஷ்மீரில் சொத்து வாங்கலாம் என்ற நிலை ஏற்பட்டது. சட்டமன்றத்துடன் கூறிய யூனியன் பிரதேசமாக மாற்றப்பட்ட அங்கு உமர் அப்துல்லா தலைமையிலான தேசிய மாநாட்டு கட்சி ஆட்சி அமைத்தது.

பாஜக MLA களின் கடும் அமளிக்கு நடுவே ஜம்மு – காஷ்மீருக்கு மீண்டும் சிறப்பு அந்தஸ்து கோரி அதன் சட்டப்பேரவையில் நேற்று முன்தினம் தீர்மானம் நிறைவேற்றப்பட்டது. இந்நிலையில், டெல்லியில் செய்தியாளர்களை சந்தித்த முன்னாள் ஒன்றிய அமைச்சர் ஸ்மிருதி இராணி, இந்த தீர்மானத்தின் மூலம் காங்கிரசும் அதன் கூட்டணி கட்சிகளும் தீவிரவாதத்தை ஆதரிப்பது உறுதிப்படுத்தப்பட்டுள்ளது என்றும் அவர்களின் முயற்சி ஒருபோதும் வெற்றி பெறாது என தெரிவித்தார்.

மேலும், சிறப்பு அந்தஸ்து ரத்து மூலம் காஷ்மீரில் அனைத்து தரப்பு மக்களுக்கான உரிமைகள் உறுதி செய்யப்பட்டுள்ளதாகவும் என தெரிவித்துள்ளார். இதனிடையே மீண்டும் சிறப்பு அந்தஸ்து கோரும் தீர்மானத்திற்கு எதிர்ப்பு தெரிவித்துள்ள கூர்க்கா சமூகத்தினர், ஜம்முவை தனி மாநிலமாக அறிவிக்க வேண்டும் என ஸ்மிருதி இராணி வலியுறுத்தி உள்ளனர்.

10 வயது சிறுவன் நடுரோட்டில் பெண்ணுக்கு பாலியல் சீண்டல்..!

கர்நாடகா மாநிலம் பெங்களூரு நகரில் 10 வயது சிறுவன் ஒருவன் தனக்கு பாலியல் துன்புறுத்தல் கொடுத்ததாக பெண் ஒருவர் வீடியோ வெளியிட்டு பரபரப்பை ஏற்படுத்தியுள்ளார். நேஹா பிஸ்வால் என்ற பெண் பெங்களூரு நகர சாலையில் நடந்தபடியே வீடியோ பதிவு செய்து கொண்டிருக்கிறார். அப்போது அவ்வழியே வந்த சிறுவன் ஒருவன் அப்பெண்ணை தகாத முறையில் தொட்டு விட்டு அங்கிருந்து செல்கிறார். இந்த சம்பவம் அந்த வீடியோவில் பதிவாகியுள்ளது.

அந்த வீடியோவில் பேசிய நேஹா பிஸ்வால், “எனக்கு இந்த மாதிரி ஒரு சம்பவம் இதற்கு முன்பு நடந்ததில்லை. நான் சாலையில் நடந்து கொண்டே வீடியோ பதிவு செய்து கொண்டு இருக்கும்போது எனக்கு பின்னால் இருந்து சைக்கிளில் வந்த சிறுவன் ஒருவன் என்னை கடந்து சென்றவுடன் சைக்கிளை திருப்பி கொண்டு என்னை நோக்கி வந்தான். என அருகில் வந்த சிறுவன் என்னை கிண்டலடித்தான். என்னை போலவே பேசி மிமிக்ரி செய்தான். பின்னர் தகாத முறையில் என்னை சீண்டினான்.

உடனே நான் சத்தம் போட்டதும் அக்கம் பக்கத்தினர் அந்த சிறுவனை பிடித்தனர். அவர்களிடம் நான் நடந்ததை கூற, அவர்களோ இவன் சிறுவன் வேண்டுமென்றே இவ்வாறு செய்திருக்க மாட்டான் என்று அவன் மீது கருணை காட்டினார்கள். நான் எனக்கு நடந்த பாலியல் சீண்டல் தொடர்பான வீடியோவை அவர்களிடம் காட்டிய பிறகு தான் அவர்கள் அதை நம்பினார்கள். ஆனாலும் கூட சிலர் சிறுவன் மீது இரக்கம் காட்டினார்கள். நான் அந்த சிறுவனை அடித்தேன். என்னுடைய நிலையை உணர்ந்து அங்கிருந்த சிலரும் அந்த சிறுவனை அடித்தார்கள். ஆனால் அந்த இடத்தில் நான் பாதுகாப்பாக உணரவில்லை.

அந்த சிறுவனின் மீது காவல்துறையில் புகார் கொடுத்து அவனது எதிர்காலத்தை அழிக்க விரும்பவில்லை. ஆனால் அந்த சிறுவனை இது தொடர்பாக கண்டிக்க வேண்டும் என்று விரும்புகிறேன்” என்று தெரிவித்தார். இந்த வீடியோ தொடர்பாக தானாக முன்வந்து பெங்களூரு காவல்துறையினர் விசாரணை மேற்கொண்டு வருகின்றனர்.