திருநெல்வேலி மாவட்டத்தைச் சேர்ந்த லட்சுமணன் மகன் சுரேஷ் கண்ணன் ஹைதராபாத்தில் உள்ள சாக்லேட் நிறுவனத்தில் பணியாற்றி வருகிறார். இவர் திருமணத்திற்கான திருமண தகவல் மைய இணையதளங்களில் தனது வயது 25 என்று பொய் சொல்லி, பல பெண்களிடம் பணம் பறித்து மோசடி செய்து வந்துள்ளார். அந்த வகையில், சென்னையைச் சேர்ந்த இளம்பெண் ஒருவரைத் தொடர்பு கொண்டு திருமணம் செய்து கொள்வதாகக் கூறியுள்ளார்.
ஆனால், சுரேஷ் கண்ணாவின் நடவடிக்கையில் சந்தேகம் அடைந்த அந்தப் பெண், அவருடைய திருமண விருப்பத்தை நிராகரித்துவிட்டார். தன்னைத் திருமணம் செய்ய மறுத்த அந்தப் பெண்ணையும், அவரது குடும்பத்தையும் பழிவாங்க சுரேஷ் கண்ணா முடிவு செய்தார். இதற்காக அந்தப் பெண்ணின் தம்பியான ஸ்ரீராம் என்பவரைப் பொய் வழக்கில் சிக்க வைக்க சதித் திட்டம் தீட்டினார். இடைத்தரகர்கள் மூலமாக 17 வயதுடைய சிறுமி ஒருவரை ஏற்பாடு செய்த சுரேஷ் கண்ணா, அந்தச் சிறுமியை சமூக வலைதளம் வழியாக ஸ்ரீராமிடம் பழக வைத்துள்ளார்.
சுமார் மூன்று மாதங்களாக ஸ்ரீராமிடம் அந்தச் சிறுமி போனிலும் நேரிலும் நட்பாகப் பழகியுள்ளார். திட்டத்தின்படி, கடந்த ஆகஸ்ட் மாதம் 23-ந் தேதி சென்னை திருமங்கலத்தில் உள்ள பிரபல வணிக வளாகத்திற்கு வருமாறு ஸ்ரீராமை அந்தச் சிறுமி அழைத்துள்ளார். அங்கு சென்ற ஸ்ரீராம், பார்க்கிங் பகுதியில் வைத்துத் தன்னிடம் தவறாக நடந்து கொண்டதாகவும், பாலியல் தொல்லை கொடுத்ததாகவும் அந்தச் சிறுமி திருமங்கலம் அனைத்து மகளிர் காவல் நிலையத்தில் புகார் அளித்தார்.

இந்தப் புகாரைப் பெற்றுக்கொண்ட காவல் ஆய்வாளர் விஜயலட்சுமி, எந்தவிதத் தீர விசாரணையும் இன்றி ஸ்ரீராம் மீது போக்சோ சட்டத்தின் கீழ் வழக்குப் பதிவு செய்தார். இதற்காக சுரேஷ் கண்ணா தரப்பிலிருந்து இடைத்தரகர்கள் மூலம் காவல் ஆய்வாளர் விஜயலட்சுமி மற்றும் காவலர் வசந்தராஜா ஆகியோருக்கு ரூ.5 லட்சம் லஞ்சமாகக் கொடுக்கப்பட்டதாகக் கூறப்படுகிறது. ஆனால், காவல்துறையினர் ஸ்ரீராமை கைது செய்வதற்கு முன்பாக ஒரு திருப்பம் ஏற்பட்டது. புகார் அளித்த அந்த 17 வயதுச் சிறுமி, நடுரோட்டில் மதுபோதையில் வேறொரு பெண்ணுடன் ஆபாசமாகப் பேசி சண்டையிடும் வீடியோ ஒன்று இணையத்தில் வெளியாகி வைரலானது.
இதனால் சந்தேகமடைந்த காவல்துறையினர் ஸ்ரீராமை உடனடியாகக் கைது செய்யாமல் தற்காலிகமாக நிறுத்தி வைத்திருந்தனர். இந்தச் சூழலில், வேறொரு திருமண மோசடி வழக்கு தொடர்பாக கடலூர் மாவட்டம் நெய்வேலி காவல்துறையினர் சுரேஷ் கண்ணாவை அண்மையில் கைது செய்தனர். அவரிடம் தீவிர விசாரணை நடத்தியதில், சென்னையில் நடந்த இந்த சதித்திட்டம் அம்பலமானது. தன்னைத் திருமணம் செய்ய மறுத்த பெண்ணைப் பழிவாங்கவே, அவரது தம்பி ஸ்ரீராம் மீது போலியாக போக்சோ வழக்குப் போட வைத்ததாக சுரேஷ் கண்ணா வாக்குமூலம் அளித்தார்.

மேலும், ஸ்ரீராமை கைது செய்வதற்காக இடைத்தரகர்கள் மூலம் காவல்துறையினருக்கு ரூ.5 லட்சம் பணம் கொடுத்ததாகவும், பணம் கொடுத்தும் காவல்துறையினர் அவரைக் கைது செய்யவில்லை என்றும் அவர் விசாரணையில் தெரிவித்துள்ளார். சுரேஷ் கண்ணா அளித்த வாக்குமூலத்தின் அடிப்படையில் சென்னை காவல்துறை உயரதிகாரிகள் ரகசிய விசாரணை நடத்தினர். முதற்கட்ட விசாரணையில், பணம் பெற்றுக்கொண்டு பொய் வழக்குப் பதிவு செய்தது உறுதியானது.
இதனைத் தொடர்ந்து, காவல் ஆய்வாளர் விஜயலட்சுமி மற்றும் காவலர் வசந்தராஜா ஆகிய இருவரையும் பணியிடை நீக்கம் செய்து சென்னை காவல் ஆணையர் உத்தரவிட்டுள்ளார். பெண்கள் மற்றும் குழந்தைகளைப் பாதுகாக்க வேண்டிய போக்சோ போன்ற கடுமையான சட்டத்தை, தனிப்பட்ட பழிவாங்கலுக்காகவும் பணத்திற்காகவும் காவல்துறையினரே தவறாகப் பயன்படுத்திய சம்பவம் பொதுமக்களிடையே பெரும் அதிர்ச்சியை ஏற்படுத்தியுள்ளது.