Category: தமிழகம்

திருச்சி மாவட்டம், மருங்காபுரி வட்டம், மணப்பாறை அருகே உள்ள கண்ணூத்து கிராமத்தை சேர்ந்த பார்த்திபன் பொறியியல் படித்து முடித்து இவர் சொந்தமாக ஜே.சி.பி. இயந்திரம் வாங்கி வாடைக்கு விட்டு தொழில் செய்து வருகிறார். இந்நிலையில் விராலிமலையை சேர்ந்த ரங்கசாமி என்பவரிடம் கடந்த 2021 -ம் ஆண்டு மாத வாடகைக்கு தனது ஜேசிபி இயந்திர வாகனத்தை பார்த்திபன் கொடுத்திருக்கிறார்.

வண்டியை வாடகைக்கு எடுத்த ரங்கசாமி சில மாதங்கள் மட்டும் வாடகையை கொடுத்துவிட்டு வாகன உரிமையாளரான பார்த்திபனுக்கு தெரியாமலேயே வண்டியை விற்றுவிட்டார். இதனால் அதிர்ந்து போன பார்த்திபன் தன்னிடம் மோசடி செய்த ரங்கசாமி மீது புத்தாநத்தம் காவல் நிலையத்தில் புகார் அளித்தார்.

அதைத் தொடர்ந்து பார்த்திபனின் ஜே.சி.பி. இயந்திரத்தை மீட்டு அதனை மணப்பாறை நீதிமன்றத்தில் காவல்துறை ஒப்படைத்தது. அங்கிருந்து தனது வாகனத்தை மீட்பதற்கு பல்வேறு நடைமுறைகள் இருந்ததால், தனது ஜே.சி.பி.யை விரைந்து தன்னிடம் ஒப்படைக்கக் கோரி உயர்நீதிமன்ற கிளையில் வழக்குத் தொடர்ந்திருக்கிறார்.

அந்த மனு மீது தீர்ப்பளித்த உயர்நீதிமன்ற மதுரை கிளை, 5 லட்சம் ரூபாய் சொத்து மதிப்பு சான்றிதழை மணப்பாறை நீதிமன்றத்தில் கொடுத்துவிட்டு ஜேசிபியை மீட்டுச் செல்லலாம் என உத்தரவிட்டது. அதன் பேரில் சொத்து மதிப்புச் சான்றிதழ் கோரி மணப்பாறை தாசில்தார் அலுவலகத்தில் அவர் மனு கொடுத்திருக்கிறார். அந்த மனுவை விசாரித்து பரிந்துரை செய்யுமாறு கண்ணூத்து கிராம நிர்வாக அதிகாரி அமீர்கானுக்கு தாசில்தார் அலுவலகம் ஃபார்வாட் செய்திருக்கிறது.

ஆனால், பார்த்திபனிடம், கண்ணூத்து கிராம நிர்வாக அதிகாரி அமீர்கான் ரூ.5,000 லஞ்சம் கொடுத்தால் சொத்து மதிப்புச் சான்றிதழுக்கு உடனே பரிந்துரை செய்வதாக தெரிவித்துள்ளார். இதனால் கொதித்துப் போன பார்த்திபன் இது குறித்த தகவலை லஞ்ச ஒழிப்புத்துறை காவல் துறை ரசாயனம் தடவிய ரூ.5,000 பணத்தை பார்த்திபனிடம் கொடுத்து கிராம நிர்வாக அலுவலரிடம் கொடுக்கும் படி கூறியுள்ளனர்.

இதையடுத்து பார்த்திபன் கிராம நிர்வாக அலுவலரிடம் ரசாயனம் தடவிய பணத்தை லஞ்சமாக கொடுத்தபோது கிராம நிர்வாக அலுவலர் அதனை பெற்றதும் அங்கு மறைந்திருந்த லஞ்சம் ஒழிப்புத்துறை காவல்துறை கையும் களவுமாக கிராம நிர்வாக அலுவலர் அமீர்கானை கைது செய்தனர்.

விழுப்புரம் தாலுகா கெடார் அடுத்த அரியலூர் திருக்கை கிராம நிர்வாக அலுவலர் விழுப்புரத்தை சேர்ந்த சங்கீதா. திருக்கை அருகே நகர் கிராமத்தை சேர்ந்த அருளாந்து மனைவி அன்னம்மாள் என்பவரின் மாமனார் மாணிக்கம், அவரது கணவரின் அண்ணன் சவுரிமுத்து ஆகிய இருவரும் சுமார் 35 ஆண்டுகளுக்கு முன்பு இறந்துவிட்டனர். அப்போது இவர்கள் இறப்பு சான்றிதழ் பதிவு செய்ய தவறிவிட்டார்.

கடந்த 2020-ம் ஆண்டு டிசம்பர் மாதம் இருவருக்கும் இறப்பு சான்றிதழ் கேட்டு தனித்தனியே விழுப்புரம் கோட்டாட்சியரிடம் மனுக்கள் கொடுத்துள்ளார். அரியலூர் கிராம நிர்வாக அலுவலர் சங்கீதாவை நேரில் சந்தித்து இறப்பு சான்றிதழ் சம்பந்தமாக ஆன்லைனில் பதிவு செய்ய அன்னம்மாள் கேட்டுள்ளார். அப்போது அன்னம்மாளிடம் மனு கொடுத்து கண்டுகொள்ளாமல் விட்டால் எப்படி, ஆன்லைனில் பதிவு செய்வது நான் தான் என்றும் ஆன்லைனின் பதிவு செய்ய தலா 500 வீதம் இருவருக்கும் ரூ.1,000 லஞ்சமாக கேட்டுள்ளார்.

லஞ்சம் தர விருப்பமில்லாததால் அன்னம்மாள், விழுப்புரம் ஊழல் தடுப்பு மற்றும் கண்காணிப்பு அலுவலகத்தில் நேற்று முன்தினம் புகார் அளித்துள்ளார். விழுப்புரம் லஞ்ச ஒழிப்புத்துறை டிஎஸ்பி பால்சுதர் தலைமையிலான காவல்துறை ரசாயனம் தடவிய ரூ.1,000 பணத்தை அன்னம்மாளிடம் கொடுத்து கிராம நிர்வாக அலுவலரிடம் கொடுக்கும் படி கூறியுள்ளனர்.

இதையடுத்து நேற்று மதியம் அன்னம்மாள் கிராம நிர்வாக அலுவலரிடம் ரசாயனம் தடவிய பணத்தை லஞ்சமாக கொடுத்தபோது கிராம நிர்வாக அலுவலர் அதனை பெற்றதும் அங்கு மறைந்திருந்த லஞ்சம் ஒழிப்புத்துறை காவல்துறை கையும் களவுமாக கிராம நிர்வாக அலுவலர் சங்கீதாவை பிடித்து கைது செய்தனர். மேலும் அவரை விழுப்புரம் ஊழல் தடுப்பு மற்றும் கண்காணிப்பு பிரிவு அலுவலகத்திற்கு அழைத்து சென்று விசாரணை செய்து வருகின்றனர்.

திருப்பூர் மாவட்டம் பல்லடத்தை சேர்ந்த கார்த்திக் பனியன் நிறுவன தொழிலாளி இவரது மனைவி கவிதா. திருப்பூரில் உள்ள ஆன்லைன் டிரேடிங் நிறுவனத்தில் பணியாற்றி வந்தார். கடந்த 8 மாதங்களுக்கு முன்பு கவிதாவின் செல்போனுக்கு ஒரு கடன் செயலி நிறுவனத்தில் இருந்து லிங்க் வந்தது. அதனை கிளிக் செய்து பார்த்தபோது , குறைந்த வட்டியில் ரூ.5ஆயிரம் கடன் வாங்கி கொள்ளலாம் என்ற தகவல் இருந்தது. இதையடுத்து இதற்காக அவரது புகைப்படம், ஆதார் எண், வீட்டு முகவரி உள்ளிட்ட தகவல்களை கடன் செயலியில் பதிவேற்றி கவிதா அந்த கடன் செயலி மூலம் ரூ.5 ஆயிரம் கடன் பெற்றார்.

இதைத்தொடர்ந்து மாதந்தோறும் ரூ.5ஆயிரத்திற்கான தவணை தொகையை செலுத்தி வந்தார். 8 மாதங்களில் அசல், வட்டியுடன் பணத்தை முழுவதுமாக செலுத்தி முடித்தார். இந்நிலையில் கடன் செயலியை சேர்ந்த கும்பல் கவிதாவின் செல்போனுக்கு ஒரு லிங்கை அனுப்பினர். அதனை கவிதா பார்த்தபோது அவரது ஆபாச புகைப்படங்கள் இருந்தது. இதனால் அதிர்ச்சியடைந்த அவர் கடன் செயலியை சேர்ந்த கும்பலை செல்போன் மூலம் தொடர்பு கொண்டு பேசினார். அப்போது அவர்கள் நீங்கள் கூடுதல் வட்டி செலுத்த வேண்டியது உள்ளது. அதனை செலுத்துங்கள். இல்லையென்றால் உங்களது ஆபாச புகைப்படங்களை இணையதளம் மற்றும் உறவினர்களின் வாட்ஸ் அப் எண்ணுக்கு அனுப்பி விடுவோம் என்று மிரட்டியுள்ளனர்.

இதனால் என்ன செய்வதென்று தெரியாமல் தவித்த கவிதா, கடன் செயலி மோசடி கும்பல் கேட்கும் பணத்தை அவர்களின் வங்கி கணக்கில் செலுத்தியுள்ளார். 8 மாதங்களாக மிரட்டி கவிதாவிடம் இருந்து ரூ.26 லட்சம் வரை பறித்துள்ளனர். பணம் இல்லாதபட்சத்தில் கவிதா வீட்டில் இருந்த நகைகளை அடகு வைத்து பணம் செலுத்தி வந்துள்ளார். தொடர்ந்து மோசடி கும்பல் பணம் கேட்டு மிரட்டி வந்த நிலையில், பணம் இல்லாததால் இதுபற்றி தனது கணவர் கார்த்திக்கிடம் தெரிவித்துள்ளார்.

உடனே இதுகுறித்து அவர் திருப்பூர் மாவட்ட சைபர் க்ரைம் காவல்துறைக்கு புகார் செய்தார். காவல்துறையினர் கவிதாவிடம் பணம் கேட்டு மிரட்டிய கடன் செயலி மோசடி கும்பல் யாரென்று விசாரணை நடத்தி அவர்களை தேடி வருகின்றனர். மேலும் கவிதா, மோசடி கும்பலுக்கு செலுத்திய வங்கி கணக்குகளை ஆய்வு செய்தனர். அப்போது இந்த மோசடி செயலில் வடமாநில கும்பல் ஈடுபட்டுள்ளது தெரிய வர அந்த செயலின் கணக்குகள் குஜராத், மேற்கு வங்காளம், அசாம், புதுடெல்லி உள்ளிட்ட இடங்களில் உள்ள வங்கி கணக்குகள் என தெரிய வந்தது. இதையடுத்து அந்த வங்கி கணக்குகளை காவல்துறை முடக்கி, இந்த சம்பவம் குறித்து விசாரணை நடத்தப்பட்டு வருகிறது.

பொள்ளாச்சி நகர கிழக்கு காவல் நிலைய உதவி ஆய்வாளர் பழனி அவர்களிடம் பொள்ளாச்சி சூளேஸ்வரன்பட்டி, கட்டபொம்மன் வீதியில் வசித்து வரும் இப்ராகிம் மகன் அஜ்மத்துல்லா என்பவர் பொள்ளாச்சி தாலுக்கா, ஜாமீன் ஊத்துக்குளி கிராமத்தில் வீட்டுமனை விற்பனை செய்வதாக கூறி கோவை, சுந்தராபுரம், அசோக் நகரில் வசித்து வரும் அப்துல் ரஹமான் மகன் அப்துல் பாரி என்பவரும் அவரது உறவினர் கோவை தெற்கு மாவட்டம் தமுமுக மமக மாவட்ட தலைவர் M.S. அகமது கபூர் ஆகிய இருவரும் சேர்ந்து ஒரு செண்ட் ரூ. 80,000 வீதம் 3 செண்ட் ரூ. 2,40,000 திற்கு பேசி 12-08-2010 அன்று ரூ.1,00,000 அட்வான்சாக பெற்றனர்.

மேலும் மீதி செலுத்த வேண்டிய தொகையில் 01-12-2013 அன்று ரூ.1,15,000 பெற்றனர் என்றும் இதுநாள் வரைக்கும் அப்துல் பாரி அவர்கள் அஜ்மத்துல்லாவிற்கு வீட்டுமனை கொடுக்காமல் இழுத்தடித்து வந்தால் கோவை, பொள்ளாச்சி நகர கிழக்கு நிலையத்தில் அப்துல் பாரி மற்றும் அவரது உறவினர் M.S. அகமது கபூர் மீது நில மோசடி வழக்கு பதிவு செய்யப்பட்டுள்ளன என்பது குறிப்பிடத்தக்கது.

தமிழ்நாட்டில் கடந்த சில நாட்களாக போக்குவரத்து விதிகளை மீறுபவர்கள் கடுமையாக தண்டிக்கப்படுவார்கள் என்று சமீபத்தில் தமிழ்நாடு போக்குவரத்து துறை காவல்துறையினரும் எச்சரிக்கை விடுத்து இருந்தனர். இந்த நிலையில்தான் தமிழ்நாட்டில் சாலை போக்குவரத்து விதிகளை மீறுபவர்களை கண்டுபிடிக்க முக்கியமான நடைமுறை ஒன்று கடைபிடிக்கப்பட்டு வருகிறது. அதன்படி போக்குவரத்து விதிமீறல் செய்பவர்களை பிடித்து அவர்களிடம் அபராதம் வசூலிக்க நேரம் செலவழிக்காமல், அவர்களை போட்டோ எடுத்து நேரடியாக அவர்களின் வாகன எண்ணில் இணைக்கப்பட்டு இருக்கும் விலாசத்திற்கும், போன் எண்ணிற்கும் அபராதம் அனுப்பப்படும் முறை கொண்டு வரப்பட்டு உள்ளது.

நீங்கள் வேகமாக ஹெல்மெட் போடாமல் பைக்கில் செல்கிறீர்கள். காவல்துறை உங்களை பிடிக்க முடியவில்லை என்றாலும், அவர் போட்டோ எடுத்தால் போதும் அபராதம் உங்களை தேடி வருகிறது. பெங்களூர் போன்ற நகரங்களில் ஏற்கனவே இந்த முறை நடைமுறையில் உள்ளது. ஆனால் சென்னையில் இதில் கூடுதல் ஒரு வழிமுறையும் சேர்க்கப்பட்டு உள்ளது. சென்னையில் காவல்துறை மட்டுமின்றி மக்களும் போட்டோ எடுக்க முடியும். மக்களும் போட்டோ எடுத்து ட்விட்டர் பக்கத்தில் பதிவு செய்ய முடியும். அதில் இருக்கும் நம்பரை பார்த்து.. ஹெல்மெட் இல்லாமல் பைக் ஓட்டுபவர்கள் சென்றால்.. அந்த நம்பருக்கு தானாக அபராதம் அனுப்பப்படும்.

இந்த நடைமுறையை கடந்த சில நாட்களாக காவல்துறை பின்பற்றி வருகின்றனர். ஆனால் இந்த புதிய முறை தற்போது கடுமையான விமர்சனங்களை சந்தித்து வருகிறது. அதன்படி சில இளைஞர்கள் பெண்களை தவறான கோணத்தில் ஆபாசமாக படம் எடுத்து.. அதை இணையத்தில் போஸ்ட் செய்து.. இவர் ஹெல்மெட் போடவில்லை என்பது போல போஸ்ட் செய்கின்றனர்.

அதற்கு காவல்துறையினருக்கு அந்த இளைஞர்களை கண்டிக்காமல்.. ஹெல்மெட் போடாத ஓட்டுனருக்கு அபராதம் விதிக்கப்படும் என்று தெரிவித்துள்ளனர். அந்த இளைஞரின் செயலும், காவல்துறையினரின் பதிலும் கடும் விமர்சனங்களை சந்தித்து வருகிறது. சாலை விதிகளை மதிக்க வேண்டும் என்ற நல்ல எண்ணத்திற்காக காவல்துறை இந்த விதிகளை கொண்டு வந்து இருக்கலாம். ஆனால் இதை சில இளைஞர்கள் தவறாக பயன்படுத்தி அதை வைத்து பெண்களை புகைப்படம் எடுக்கிறார்கள். அதை காவல்துறை கண்டிப்பது இல்லை என்று விமர்சனங்கள் வைக்கப்படுகின்றன.

அதேபோல் சாலை விதிகளை மீறுபவர்களை கண்டிப்பது காவல்துறையினரின் வேலை. அதை மக்கள் கையில் கொடுப்பது தவறு. தேவையில்லாத மோதல்களுக்கு இது வழி வகுக்கும் என்று கூறி உள்ளனர். மேலே காட்டப்பட்டுள்ள டீவிட்டில் கூட இளைஞர் ஒருவர் மாடர்ன் உடை அணிந்துள்ள பெண்ணை புகைப்படம் எடுத்துள்ளார். ஆனால் அவர் அருகே இருக்கும் ஹெல்மெட் அணியாத மற்ற ஆணை எடுக்கவில்லை. இதை காவல்துறையினரும் கண்டிக்காமல் அந்த பெண் சென்ற பைக்கிற்கு அபராதம் விதித்துள்ளனர். இதை நெட்டிசன்கள் பலரும் கடுமையாக வறுத்தெடுத்து வருகின்றனர்.

ஈரோடு மாவட்டம், சத்தியமங்கலம்-மைசூர் தேசிய நெடுஞ்சாலையில் தமிழக, கர்நாடக எல்லையில் உள்ள பண்ணாரியில் சத்தியமங்கலம் வனத்துறைக்கு சொந்தமான சோதனைச்சாவடி உள்ளது. வனப்பகுதியில் பயணிக்கும் வாகனங்களுக்கு நுழைவு கட்டணம் வசூலிக்கப்படுகிறது. கட்டணம் வசூலிக்காமல் இருப்பதற்காக வனத்துறை ஊழியர்கள் லஞ்சம் கேட்பதாக அடிக்கடி குற்றச்சாட்டு எழுந்தது.

இந்நிலையில் நேற்று முன்தினம் இரவு பண்ணாரி வன சோதனைச்சாவடி வழியாக வாகனத்தில் சென்ற கர்நாடக மாநிலத்தைச் சேர்ந்த டிரைவரிடம் வனத்துறை ஊழியர் லஞ்சம் கேட்டுள்ளார். அவர் தரமறுக்கவே வனத்துறை ஊழியர், அந்த டிரைவரை சோதனைச்சாவடி கட்டிடத்துக்குள் அழைத்துச் சென்று சரமாரியாக தாக்கியதாக கூறப்படுகிறது. தகவல் அறிந்த வாகன ஓட்டுனர்கள் சோதனைச்சாவடியை முற்றுகையிட்டு வனத்துறை ஊழியர்களிடம் கடும் வாக்குவாதத்தில் ஈடுபட்டது, தற்போது சமூக வலைதளங்களில் வைரலாகி வருகிறது.

திருவாரூர் மாவட்ட ஆயுதப்படை பிரிவில் பணியாற்றி வரும் 22 வயதான பெண் காவலர் ஒருவர், பணி நிமித்தமாக கடந்த 18-ம் தேதி, தஞ்சாவூர் சென்றுவிட்டு மீண்டும் திருவாரூருக்கு பேருந்தில் சென்றார். அப்போது அதே ஆயுதப்படை பிரிவில் எழுத்தராக பணிபுரிந்து வரும் காவலர் சற்குணம் என்பவர் வழியில் கொரடாச்சேரி என்ற இடத்தில் இறங்கி தனது பைக்கில் திருவாரூர் நோக்கி அழைத்து சென்றார். அப்போது அந்த பெண் காவலரிடம் சற்குணம் பாலியல் ரீதியாக தவறாக நடக்க முயன்றதாக கூறப்படுகிறது.

இது தொடர்பாக பாதிக்கப்பட்ட பெண் காவலர் கொடுத்த புகாரின் பேரில் விசாரணை மேற்கொண்ட எஸ்பி சுரேஷ்குமார், ஆயுதப்படை காவலர் சற்குணத்தை கடந்த 20-ம் தேதி அதிரடியாக சஸ்பெண்ட் செய்து உத்தரவிட்டார். இந்நிலையில் பெண் காவலர் புகார் தொடர்பாக, திருவாரூர் தாலுகா காவல்துறை வழக்குப்பதிவு செய்து ஆயுதப்படை காவலர் சற்குணத்தை நேற்று கைது செய்தனர்.

சென்னை, பெங்களூரு, திருச்சி மாவட்டம் சிறுகனூர் ஆகிய இடங்களில் சென்னை முகப்பேர் பகுதியை சேர்ந்த ஹேமலதா என்பவர் ‘ஹேமாஸ் கிச்சன்’ என்ற பெயரில் உணவகங்கள் நடத்தி வருகிறார். இந்நிலையில், ஹேமலதா, திருச்சி மத்திய மண்டல ஐஜி கார்த்திகேயனிடம் புகார் மனு ஒன்றை அளித்தார்.

அதில், ‘திருச்சி சத்திரம் பேருந்து நிலையத்தில் உள்ள பெரியசாமி டவர்ஸ் உரிமையாளர், பெரியசாமி தங்கராஜன் என்கின்ற பி.டி. ராஜன் என்பவருக்கு சொந்தமான, சிறுகனூரில் உள்ள இடத்தில் ரூ.52 லட்சம் பணம் பெற்றுக் கொண்டு உணவகம் நடத்த அனுமதி கொடுத்தார். ஆனால் தற்போது, உணவகத்தை நடத்த விடாமல் அடியாட்களை வைத்து மிரட்டி வருகிறார்.

மேலும் இரண்டாவது முறையாக அடியாட்களை வைத்து உணவகத்தை பூட்டிவிட்டார். இது குறித்து சிறுகனூர் காவல் நிலையத்தில் புகார் கொடுத்தும் எவ்வித நடவடிக்கையும் இல்லை. எனவே, பி.டி.ராஜன் மற்றும் அவரது அடியாட்கள் மீது கடும் நடவடிக்கை எடுக்க வேண்டும். எனது பணத்தை மீட்டுத் தர வேண்டும்’ என்று அதில் குறிப்பிட்டுள்ளார்.