திண்டுக்கல் மாவட்டம் வேடசந்தூர் வட்டாரத்தில் வணிகவரித்துறையை சேர்ந்த ஊழியர் ஒருவர், அங்குள்ள கடைகளில் தீபாவளி வசூலில் ஈடுபடுவதாக லஞ்ச ஒழிப்பு காவல்துறைக்கு தகவல் வந்ததை தொடர்ந்து லஞ்ச ஒழிப்பு காவல்துறை வேடசந்தூர் பகுதியில் தீவிர கண்காணிப்பில் ஈடுபட்டனர்.
அப்போது வட்டார வரிவிதிப்பு அலுவலக உதவியாளர் ஒருவர் அங்குள்ள கடைகளில் பணம் வசூலிக்கும் போது கையும், களவுமாக சிக்கினார். ஆனால் உடனடியாக அவர் இரு சக்கர வாகனத்தில் தப்பித்தார் அதனைத்தொடர்ந்து லஞ்ச ஒழிப்பு காவல்துறை அவரது வாகனத்தை பின்தொடர்ந்து சென்றனர்.
பின்னர் அவர் திண்டுக்கல் வணிகவரித்துறை அலுவலகத்துக்குள் சென்றதும் லஞ்ச ஒழிப்பு காவல்துறை அவரது அவரை மடக்கிப்பிடித்து சோதனையிட்டனர். அப்போது அவருடைய சட்டை பையில் ரூ.31 ஆயிரத்து 100 இருந்ததை லஞ்ச ஒழிப்பு காவல்துறை கண்டுபிடித்தனர். இதுகுறித்து வழக்குப்பதிவு செய்த லஞ்ச ஒழிப்பு காவல்துறை இந்த வசூல் வேட்டையில் வேறு யாருக்கேனும் அவருடன் தொடர்பு உள்ளதா? என்று தீவிர விசாரணை நடத்தி வருகின்றனர்.