டெல்லி மதுபான கொள்கை ஊழல் தொடர்பாக கைது செய்யப்பட்ட ஆம் ஆத்மி தேசிய ஒருங்கிணைப்பாளர் அர்விந்த் கெஜ்ரிவாலுக்கு உச்ச நீதிமன்றம் கடந்த 13-ஆம் தேதி ஜாமீன் வழங்கியது.
இந்நிலையில் வரும் 2025 பிப்ரவரியில் டெல்லியில் நடைபெறவிருக்கும் சட்டமன்ற தேர்தலில் போட்டியிட்டு மக்களிடம், ‘நேர்மைக்கான சான்றிதழ்’ பெற்று மீண்டும் பதவியில் அமர்வதாக சபதம் எடுத்து, முதலமைச்சர் பதவியை அவர் ராஜினாமா செய்தார். இதையடுத்து டெல்லியின் புதிய முதலமைச்சராக ஆம் ஆத்மி கட்சியின் அதிஷி மர்லினா சிங் பொறுப்பேற்றார்.
இதனையொட்டி அர்விந்த் கேஜ்ரிவால் அதிஷி மர்லினா சிங்குடன் இணைந்து டெல்லி நகரின் சாலைகளை நேற்று பார்வையிட்டார். மூத்த ஆம் ஆத்மி தலைவர் மணீஷ் சிசோடியா, எம்எல்ஏ திலீப் பான்டே உள்ளிட்டோர் உடனிருந்தனர்.
அப்போது அர்விந்த் கெஜ்ரிவால் பேசுகையில், நான் திரும்ப வந்துவிட்டேன் என்பதையும் முடக்கி வைக்கப்பட்ட பணிகள் மீண்டும் தொடங்கப்படும் என்பதையும் டெல்லி மக்களுக்கு உறுதிப்படுத்த விரும்புகிறேன். அவர்களின் அனைத்து சிக்கல்களும் தீர்க்கப்படும். நாள் முழுவதும் பம்பரம் போல் சுழன்று செயலாற்றிக் கொண்டிருக்கிறோம். சிறையில் அடைக்கப்பட்டிருந்தபோதும் நான் துடிப்புடன்தான் இருந்தேன்.
சில தினங்களுக்கு முன்பு அவர்களின் (பாஜக) பெரிய தலைவரை சந்தித்துப் பேசினேன். என்னை கைது செய்ததால் உங்களுக்கு என்ன கிடைத்துவிட்டது என்று அவரிடம் கேட்டேன். குறைந்தபட்சம் டெல்லி அரசை தடம்புரளச் செய்து நகரத்தை ஸ்தம்பிக்க வைத்தோம் இல்லையா என்று அதற்கு அவர் அளித்த பதில் என்னை அதிர்ச்சியில் ஆழ்த்தி சோகத்தில் மூழ்கடித்தது.
அவர்களது நோக்கம் ஆம் ஆத்மி அரசுக்கு அவப்பெயர் உண்டாக்கி டெல்லியில் நடைபெறும் பணிகளை முடக்குவதுதான். ஆனால், மக்களின் பணிகள் தடைப்பட ஒருபோதும் ஆம் ஆத்மி அரசு அனுமதிக்காது என அர்விந்த் கெஜ்ரிவால் பேசினார்.
