Category: தமிழகம்

Tamilnadu

அம்மாகூட நானும் சேர்ந்து வளர்த்த கட்சி இது… இது வீணாகி கூடாது…!

வி.கே. சசிகலா ராணிப்பேட்டையை சேர்ந்த சுரேஷ் என்பவருடன் பேசுகையில், அ.தி.மு.க.வையும், அ.ம.மு.க.வையும் ஒன்றாக இணைக்கிற முயற்சியில் நான் ஈடுபட்டேன். அதுக்கு அவங்க ஒத்துவராம, ஒத்துழைப்பு தராம இருந்தாங்க. நாங்க தனியா நின்னு 150 தொகுதி வரைக்கும் ஜெயிப்போம்னு சொன்னாங்க. சரினு நானும் பொறுமையா இருந்தேன். ஆனால் இப்போ என்னாச்சு? நிலைமை ரொம்ப மோசமா இருக்கு.

அம்மாகூட நானும் சேர்ந்து வளர்த்த கட்சி இது. இது வீணாகி கூடாது. இனி அ.தி.மு.க.வை காப்பாற்றுவதே என் வேலை. இனி ஒதுங்கி இருப்பேன், விலகி இருப்பேனு நிச்சயம் நான் சொல்லவே மாட்டேன். தொண்டர்களோட நம்பிக்கை வீண் போகாது. நான் நிச்சயம் வந்துருவேன் என சசிகலா தெரிவித்தார்.

தமிழகத்தில் பெண் ஒருவருக்கு ‘டெல்டா பிளஸ்’

இந்தியா முழுவதும் ‘ஆல்பா’ வகை கொரோனா வைரஸ் லட்சக்கணக்கான மக்களிடம் பல்கி பெருகும்போது வைரஸ் கிருமி தன்னை காத்துக்கொள்ள உருமாற்றம் அடைய தொடங்கும். அவ்வாறு உருமாற்றமடைந்த வைரஸ்கள் ஏற்கனவே உள்ள வைரசை காட்டிலும், வீரியமிக்கதாகவும், அதிக பாதிப்பை ஏற்படுத்துவதாகவும் இருக்கும்.

இந்தியாவில் உருமாற்றம் அடைந்த அந்த வைரசை ‘டெல்டா’ வகை கொரோனா என்று உலக சுகாதார நிறுவனம் வகைப்படுத்தியது. அதன் தொடர்ச்சியாக அதிலிருந்தும் உருமாற்றம் அடைந்த புதிய வைரஸ் கண்டறியப்பட்டுள்ளது. அதற்கு ‘டெல்டா பிளஸ்’ என பெயரிடப்பட்டுள்ளது.

நாடு முழுவதும் 2-வது அலை ஏற்பட்டபோது தமிழகம், மராட்டியம், உள்ளிட்ட பல மாநிலங்கள் கடுமையான பாதிப்பை சந்தித்தன. இதையடுத்து வைரசின் மரபணுவை ஆய்வு செய்து தமிழகத்தில் எந்த வகையான கொரோனா பாதிப்பு ஏற்பட்டுள்ளது என்பதை கண்டறிய தமிழக பொது சுகாதாரத்துறை திட்டமிட்டது.

தமிழகம் முழுவதும் மொத்தம் 1,159 மாதிரிகள் சேகரிக்கப்பட்டு அவை கர்நாடக மாநிலம் பெங்களூருவில் உள்ள வைரஸ் மரபணு ஆய்வகத்துக்கு அனுப்பப்பட்டது. அதில் இதுவரை 772 மாதிரிகளின் முடிவுகள் வெளியாகி, அதில் 70 சதவீதத்துக்கும் மேற்பட்டோருக்கு ‘டெல்டா’ வகை கொரோனா வைரஸ் தொற்று இருப்பது தெரியவந்தது.

குறைந்த மாதிரிகளில் மட்டுமே ‘ஆல்பா’ வகை கொரோனா வைரஸ் காணப்பட்டது. இந்நிலையில் முடிவுகள் வெளியான 772 மாதிரிகளில் அதிர்ச்சி தரும் தகவலாக பெண் ஒருவருக்கு ‘டெல்டா பிளஸ்’ பாதிப்பு ஏற்பட்டிருப்பது தெரிய வந்துள்ளது. அவரது சளி மாதிரி அடையாறு புற்றுநோய் சிகிச்சை மையத்திலிருந்து பெறப்பட்டதாக மருத்துவம் மற்றும் மக்கள் நல்வாழ்வுத் துறை செயலாளர் டாக்டர் ஜெ.ராதாகிருஷ்ணன் தெரிவித்துள்ளார்.

காவல் துறையினர் தாக்கியபோது மது போதையில் இருந்த விவசாயி கீழே விழுந்து மரணம்

சேலம் மாவட்டம் ஆத்தூர் அருகே உள்ள இடையப்பட்டியைச் சேர்ந்தவர் வெள்ளையன் என்ற முருகேசன் அந்த பகுதியில் மளிகை கடை நடத்தி வருகிறார். இவருடைய மனைவி அன்னக்கிளி. இவர்களுக்கு ஜெயப்பிரியா, ஜெயப்பிரதா ஆகிய 2 மகள்களும், கவிப்பிரியன் என்ற மகனும் உள்ளனர்.

முருகேசன் இவர் நேற்று முன்தினம் காலை கருமந்துறை பகுதிக்கு நண்பர்கள் சிவன் பாபு, ஜெயசங்கர் ஆகியோருடன் ஒரே மோட்டார் சைக்கிளில் சென்றார். அங்கு உறவினர் ஒருவரை பார்த்து விட்டு மாலையில் அவர்கள் திரும்பி உள்ளனர்.

வழியில் பாப்பிநாயக்கன்பட்டி வனத்துறை சோதனைச்சாவடி அருகே காவல்துறை வாகன சோதனையில் ஈடுபட்டு கொண்டிருந்தனர். அப்போது காவல்துறையினர் அவர்கள் வந்த மோட்டார் சைக்கிளை தடுத்து நிறுத்தி விசாரித்தனர். இதில் போலீசாருடன் அவர்கள் வாக்குவாதத்தில் ஈடுபட்டதாக கூறப்படுகிறது. மேலும் அவர்கள் மீது காவல் துறையினர் லத்தியால் தாக்கியுள்ளனர்.

அப்போது இடையப்பட்டியை சேர்ந்த முருகேசன் என்ற விவசாயக் கூலியை காவல்துறையினர் தள்ளிவிட்டதில், அதில் கீழே விழுந்து பின்மண்டையில் காயம் ஏற்பட்டதாகவும் கூறப்படுகிறது. இதையடுத்து வாழைப்பாடி ஆரம்ப சுகாதார நிலையத்திற்கு மருத்துவச் சிகிச்சைக்காக முருகேசன் அழைத்துச் செல்லப்பட்டுள்ளார். பின்னர் மேல் சிகிச்சைக்காக சேலம் அரசு மருத்துவமனையில் சிகிச்சைக்காக முருகேசன் அனுமதிக்கப்பட்டார். இந்நிலையில் சிகிச்சை பலனின்றி முருகேசன் உயிரிழந்தார்.

தந்தையை தாக்கிய காவல்துறையினர் மீது நடவடிக்கை கோரி தனி ஒருவராக போராடிய இளம்பெண்

தென்காசி மாவட்டம் செங்கோட்டை அருகே உள்ள புளியரை தாட்கோ நகரைச் சேர்ந்தவர் பிரான்சிஸ் அந்தோணி. இவர் கடந்த 18-ந் தேதி நியாய விலை கடையில் 20 கிலோ அரிசி வாங்கிக் கொண்டு தனது சித்தப்பா சின்னச்சாமி வீட்டிற்கு மோட்டார் சைக்கிளில் சென்றார்.

அப்போது, புளியரை சோதனை சாவடியில் வாகன சோதனையில் ஈடுபட்டிருந்த புளியரை காவல்துறையினர், அரிசியை பறிமுதல் செய்ததுடன் பிரான்சிஸ் அந்தோணியை காவல் நிலையத்தில் வைத்து துணை ஆய்வாளர் முருகேசன், ஏட்டு மஜித் ஆகியோர் தாக்கியதாகவும் கூறப்படுகிறது. இதில் பலத்த காயம் அடைந்த அவர் செங்கோட்டை அரசு மருத்துவமனையில் அனுமதிக்கப்பட்டார்.

இதையடுத்து பிரான்சிஸ் அந்தோணியின் 2-வது மகள் அபிதா தனது தந்தைய தாக்கிய காவல்துறையினர் மீது நடவடிக்கை கோரி அரசு மருத்துவமனை அருகில் இருந்த செல்போன் கோபுரத்தில் ஏறி தற்கொலை மிரட்டல் விடுத்தார். காவல்துறையினர் பேச்சுவார்த்தை நடத்தியதின்பேரில் அவர் கீழே இறங்கி வந்தார்.

தொடர்ந்து நேற்று முன்தினம் மாலை 4 மணிக்கு செங்கோட்டை அரசு மருத்துவமனையில் பரிசோதனைக்காக பிரான்சிஸ் அந்தோணி தனது குடும்பத்தினருடன் வந்தார். அப்போது, திடீரென்று அபிதா மருத்துவமனையின் மேல் தளத்தில் உள்ள குடிநீர் தொட்டி மீது ஏறி நின்று போராட்டத்தில் ஈடுபட்டார்.

தனது தந்தையை தாக்கிய காவல்துறையினர் மீது வழக்குப்பதிவு செய்து துறைரீதியாக நடவடிக்கை எடுக்க வேண்டும். இல்லையென்றால் தற்கொலை செய்து கொள்வேன் என்று மிரட்டல் விடுத்து போராட்டத்தில் ஈடுபட்டார்.

பெட்ரோல், டீசல் விலை உயர்வை கண்டித்து இந்திய கம்யூனிஸ்டு கட்சியினர் ஆர்ப்பாட்டம்


தென்காசி மாவட்டம் சிவகிரியில் பெட்ரோல், டீசல் விலை உயர்வை கண்டித்தும், தமிழக மக்களுக்கு தட்டுப்பாடின்றி தடுப்பூசி கிடைக்க வலியுறுத்தி இந்திய கம்யூனிஸ்டு கட்சியினர் ஆர்ப்பாட்டம் நடத்தினர்.

ஆட்டோக்களுக்கு வாடகை பாக்கி மாநகராட்சி அலுவலகத்தை ஓட்டுனர்கள் முற்றுகை

சேலம் மாநகராட்சி சார்பில் நடமாடும் வாகனங்கள் மூலம் பொதுமக்களுக்கு கொரோனா பரிசோதனை நடத்தப்பட்டது. இதற்காக வாடகைக்கு ஆட்டோக்கள் எடுத்து அதன்மூலம் வீதி, வீதியாக சென்று கொரோனா பரிசோதனையில் மாநகராட்சி ஊழியர்கள் ஈடுபட்டனர். 60 வார்டுகளிலும் கொரோனா பரிசோதனைக்காக 80 ஆட்டோக்கள் பயன்படுத்தப்பட்டன.

இதற்காக ஒரு ஆட்டோவுக்கு தினமும் ரூ.1000-ம் என வாடகை நிர்ணயம் செய்யப்பட்டு இருந்ததாக தெரிகிறது. 20 நாட்களுக்கு மேலாகியும் இதுவரை ஆட்டோக்களுக்கு வாடகை கொடுக்கப்படவில்லை என்றும் கூறப்படுகிறது. எனவே ஆட்டோக்களுக்கு வாடகை தொகையை உடனே வழங்க வலியுறுத்தி 30-க்கும் மேற்பட்ட ஆட்டோ டிரைவர்கள் நேற்று மாநகராட்சி ஆணையாளர் அலுவலகத்தில் முற்றுகையிட்டனர்.

செருப்பை வைத்து இடம் பிடித்த பொதுமக்கள்

சேலம் மாவட்டத்தில் கொரோனா தடுப்பூசி போடும் பணி முழுவதும் தீவிரமாக நடைபெற்று வருகிறது. இந்நிலையில் பனமரத்துப்பட்டியில் உள்ள மேம்படுத்தப்பட்ட அரசு ஆரம்ப சுகாதார நிலையத்திலும் மற்றும் மல்லூர், தும்பல்பட்டி, கொண்டலாம்பட்டி ஆரம்ப சுகாதார நிலையங்களிலும் கொரோனா தடுப்பூசி போடப்பட்டு வருகிறது.

இந்நிலையில் நேற்று பனமரத்துப்பட்டி பேரூராட்சிக்குட்பட்ட பழனி ஆண்டவர் திருமண மண்டபத்தில் காலை 8 மணி அளவில் தடுப்பூசி முகாம் நடைபெறும் என அறிவிக்கப்பட்டிருந்தது. இதனையடுத்து பேரூராட்சியில் வசிக்கும் பொதுமக்கள் காலை 6 மணிக்கு திருமண மண்டபத்தின் முன் குவிய தொடங்கினர்.

அப்போது அவர்கள் கூட்டமாக நின்றதால் பேரூராட்சி அலுவலர்கள் அவர்களை சமூக இடைவெளியை பின்பற்றி தனித்தனியே நிற்குமாறு கூறினர். ஆனால் தடுப்பூசி போட வந்தவர்கள் டோக்கன் பெறுவதற்காக தங்களது செருப்புகளை வரிசையில் வைத்து இடம் பிடித்தனர்.

விவசாய பிரச்சினைகளுக்கு தனி துறை அமைக்க உழவர் உழைப்பாளர் கட்சி வேண்டுகோள்

திருப்பூர் மாவட்டம் பல்லடத்தில் உழவர் உழைப்பாளர் கட்சி மாநில தலைவர் செல்லமுத்து நிருபர்களுக்கு பேட்டி அளித்தார். அப்போது, சட்டமன்ற முதல் கூட்டத்தொடரில் கவர்னர் உரையில் தமிழக அரசு விவசாயத்திற்கு என்று தனியாக பட்ஜெட் தாக்கல் செய்யப்படும் என்று அறிவித்து இருப்பது விவசாயிகளுக்கு மிகவும் மகிழ்ச்சியை அளித்துள்ளது.


இதனை உழவர் உழைப்பாளர் கட்சி சார்பில் வரவேற்கின்றோம். தற்போது விவசாயிகள் வாய்க்காலில் பிரச்சினை என்றால் ஒரு துறையிலும், குளத்திற்கு பிரச்சினை என்றால் வேறு துறையிலும், என பல்வேறு துறைகளுக்கு சென்று தீர்வு கண்டு வருகிறார்கள். ஒட்டுமொத்தமாக விவசாய பிரச்சினைகளுக்கு தனி துறை ஏற்படுத்தினால் பயனுள்ளதாக இருக்கும் என தெரிவித்தார்.

பெண் ஆட்சியர் அதிரடி: அனுமதியின்றி மண் ஏற்றி வந்த லாரி பறிமுதல்

நாமக்கல் மாவட்டத்தில் கடந்த 17-ந் தேதி புதியதாக பொறுப்பேற்று ஆட்சியர் ஸ்ரேயா சிங் 3-வது பெண் ஆட்சியர் ஆவார். ஸ்ரேயா சிங் தொடர்ந்து பல்வேறு பகுதிகளுக்கு சென்று ஆய்வு நடத்தி வருகிறார். அதன்வரிசையில் நேற்று கொல்லிமலைக்கு ஆய்வு கொண்டு, அலுவலகத்திற்கு திரும்பி கொண்டிருந்தார்.

அப்போது சேந்தமங்கலம் ராமநாதபுரம்புதூர் பகுதியில் வந்தபோது, அந்த வழியாக மண் ஏற்றி வந்த லாரியை மடக்கி நிறுத்தி சோதனை செய்தார். அப்போது உரிய அனுமதியின்றி மண் ஏற்றி வருவதை அறிந்த அவர் லாரியை பறிமுதல் செய்து, வழக்குப்பதிவு செய்ய காவல்துறைக்கு உத்தரவிட்டார்.