திருவள்ளூர் மாவட்டம் திருப்பாச்சூர் பகுதியை சேர்ந்த சிலம்பரசன் தனது தந்தை பெயரில் உள்ள நிலத்தின் பட்டாவை தனது பெயருக்கு மாற்றம் செய்ய சமீபத்தில் திருப்பாச்சூர் கிராம நிர்வாக அலுவலகத்தில் விண்ணப்பித்து இருந்தார். ஆனால், சிலம்பரசனிடம் விண்ணப்பத்தை பரிசீலனை செய்து, உரிய நடவடிக்கை எடுக்க ரூ.5 ஆயிரம் வழங்க வேண்டும் என திருப்பாச்சூர் கிராம நிர்வாக அலுவலர் திருமால் தெரிவித்துள்ளார்.
ஆனால் சிலம்பரசன் லஞ்சம் கொடுக்க விரும்பவில்லை எனவே திருவள்ளூர் லஞ்ச ஒழிப்பு காவல்துறையினரிடம் இதுகுறித்து புகார் அளித்துள்ளார். இதனையடுத்து ரசாயன பவுடர் தடவிய ரூ.5 ஆயிரம் நோட்டுகளை சிலம்பரசனிடம் லஞ்ச ஒழிப்பு காவல்துறையினர் கொடுத்து அனுப்பினர். அதன்பேரில் சிலம்பரசன், திருப்பாச்சூர் கிளை அலுவலகத்தில் கிராம நிர்வாக அலுவலர் திருமாலிடம் ரூ.5 ஆயிரத்தை லஞ்சமாக கொடுத்தார். அப்போது அங்கு ஏற்கனவே மறைந்திருந்த லஞ்ச ஒழிப்பு காவல்துறையினர் விரைந்து சென்று கையும் களவுமாக திருமாலை பிடித்து கைது செய்தனர்.
