Author: rajaram

சன்ச்சர் நிகாம் ஓய்வூதியம் பெறுவோர் நலச் சங்கத்தின் சார்பாக முதல்வரின் கொரோனா நிவாரண நிதி

பயன்படுத்துகிறோம் – பயன்படுத்துவோம் – பயன்படுத்திக்கொண்டே இருப்போம்

கொரோனா சிறப்பு நிவாரண இரண்டாம் தவணை உதவித்தொகை

கொரோனா சிறப்பு நிவாரண இரண்டாம் தவணை உதவித்தொகை ரூ.2000 மற்றும் 14 மளிகைப் பொருட்கள் அடங்கிய தொகுப்பு வழங்கும் நிகழ்ச்சியை நேற்று அடையாறு – இந்திரா நகர், காந்தி நகர் ஆகிய பகுதிகளில் தமிழச்சி தங்கப்பாண்டியன் தொடங்கி வைத்தார்.


இந்தநிகழ்ச்சியில், பகுதிச் செயலாளர் துரைகபிலன், வட்டச் செயலாளர்கள், வழக்கறிஞர் சந்தானம், தனசேகரன், கழக நிர்வாகிகள், முன்னணியினர் கலந்துகொண்டனர்.

அம்மாகூட நானும் சேர்ந்து வளர்த்த கட்சி இது… இது வீணாகி கூடாது…!

வி.கே. சசிகலா ராணிப்பேட்டையை சேர்ந்த சுரேஷ் என்பவருடன் பேசுகையில், அ.தி.மு.க.வையும், அ.ம.மு.க.வையும் ஒன்றாக இணைக்கிற முயற்சியில் நான் ஈடுபட்டேன். அதுக்கு அவங்க ஒத்துவராம, ஒத்துழைப்பு தராம இருந்தாங்க. நாங்க தனியா நின்னு 150 தொகுதி வரைக்கும் ஜெயிப்போம்னு சொன்னாங்க. சரினு நானும் பொறுமையா இருந்தேன். ஆனால் இப்போ என்னாச்சு? நிலைமை ரொம்ப மோசமா இருக்கு.

அம்மாகூட நானும் சேர்ந்து வளர்த்த கட்சி இது. இது வீணாகி கூடாது. இனி அ.தி.மு.க.வை காப்பாற்றுவதே என் வேலை. இனி ஒதுங்கி இருப்பேன், விலகி இருப்பேனு நிச்சயம் நான் சொல்லவே மாட்டேன். தொண்டர்களோட நம்பிக்கை வீண் போகாது. நான் நிச்சயம் வந்துருவேன் என சசிகலா தெரிவித்தார்.

தமிழகத்தில் பெண் ஒருவருக்கு ‘டெல்டா பிளஸ்’

இந்தியா முழுவதும் ‘ஆல்பா’ வகை கொரோனா வைரஸ் லட்சக்கணக்கான மக்களிடம் பல்கி பெருகும்போது வைரஸ் கிருமி தன்னை காத்துக்கொள்ள உருமாற்றம் அடைய தொடங்கும். அவ்வாறு உருமாற்றமடைந்த வைரஸ்கள் ஏற்கனவே உள்ள வைரசை காட்டிலும், வீரியமிக்கதாகவும், அதிக பாதிப்பை ஏற்படுத்துவதாகவும் இருக்கும்.

இந்தியாவில் உருமாற்றம் அடைந்த அந்த வைரசை ‘டெல்டா’ வகை கொரோனா என்று உலக சுகாதார நிறுவனம் வகைப்படுத்தியது. அதன் தொடர்ச்சியாக அதிலிருந்தும் உருமாற்றம் அடைந்த புதிய வைரஸ் கண்டறியப்பட்டுள்ளது. அதற்கு ‘டெல்டா பிளஸ்’ என பெயரிடப்பட்டுள்ளது.

நாடு முழுவதும் 2-வது அலை ஏற்பட்டபோது தமிழகம், மராட்டியம், உள்ளிட்ட பல மாநிலங்கள் கடுமையான பாதிப்பை சந்தித்தன. இதையடுத்து வைரசின் மரபணுவை ஆய்வு செய்து தமிழகத்தில் எந்த வகையான கொரோனா பாதிப்பு ஏற்பட்டுள்ளது என்பதை கண்டறிய தமிழக பொது சுகாதாரத்துறை திட்டமிட்டது.

தமிழகம் முழுவதும் மொத்தம் 1,159 மாதிரிகள் சேகரிக்கப்பட்டு அவை கர்நாடக மாநிலம் பெங்களூருவில் உள்ள வைரஸ் மரபணு ஆய்வகத்துக்கு அனுப்பப்பட்டது. அதில் இதுவரை 772 மாதிரிகளின் முடிவுகள் வெளியாகி, அதில் 70 சதவீதத்துக்கும் மேற்பட்டோருக்கு ‘டெல்டா’ வகை கொரோனா வைரஸ் தொற்று இருப்பது தெரியவந்தது.

குறைந்த மாதிரிகளில் மட்டுமே ‘ஆல்பா’ வகை கொரோனா வைரஸ் காணப்பட்டது. இந்நிலையில் முடிவுகள் வெளியான 772 மாதிரிகளில் அதிர்ச்சி தரும் தகவலாக பெண் ஒருவருக்கு ‘டெல்டா பிளஸ்’ பாதிப்பு ஏற்பட்டிருப்பது தெரிய வந்துள்ளது. அவரது சளி மாதிரி அடையாறு புற்றுநோய் சிகிச்சை மையத்திலிருந்து பெறப்பட்டதாக மருத்துவம் மற்றும் மக்கள் நல்வாழ்வுத் துறை செயலாளர் டாக்டர் ஜெ.ராதாகிருஷ்ணன் தெரிவித்துள்ளார்.

காவல் துறையினர் தாக்கியபோது மது போதையில் இருந்த விவசாயி கீழே விழுந்து மரணம்

சேலம் மாவட்டம் ஆத்தூர் அருகே உள்ள இடையப்பட்டியைச் சேர்ந்தவர் வெள்ளையன் என்ற முருகேசன் அந்த பகுதியில் மளிகை கடை நடத்தி வருகிறார். இவருடைய மனைவி அன்னக்கிளி. இவர்களுக்கு ஜெயப்பிரியா, ஜெயப்பிரதா ஆகிய 2 மகள்களும், கவிப்பிரியன் என்ற மகனும் உள்ளனர்.

முருகேசன் இவர் நேற்று முன்தினம் காலை கருமந்துறை பகுதிக்கு நண்பர்கள் சிவன் பாபு, ஜெயசங்கர் ஆகியோருடன் ஒரே மோட்டார் சைக்கிளில் சென்றார். அங்கு உறவினர் ஒருவரை பார்த்து விட்டு மாலையில் அவர்கள் திரும்பி உள்ளனர்.

வழியில் பாப்பிநாயக்கன்பட்டி வனத்துறை சோதனைச்சாவடி அருகே காவல்துறை வாகன சோதனையில் ஈடுபட்டு கொண்டிருந்தனர். அப்போது காவல்துறையினர் அவர்கள் வந்த மோட்டார் சைக்கிளை தடுத்து நிறுத்தி விசாரித்தனர். இதில் போலீசாருடன் அவர்கள் வாக்குவாதத்தில் ஈடுபட்டதாக கூறப்படுகிறது. மேலும் அவர்கள் மீது காவல் துறையினர் லத்தியால் தாக்கியுள்ளனர்.

அப்போது இடையப்பட்டியை சேர்ந்த முருகேசன் என்ற விவசாயக் கூலியை காவல்துறையினர் தள்ளிவிட்டதில், அதில் கீழே விழுந்து பின்மண்டையில் காயம் ஏற்பட்டதாகவும் கூறப்படுகிறது. இதையடுத்து வாழைப்பாடி ஆரம்ப சுகாதார நிலையத்திற்கு மருத்துவச் சிகிச்சைக்காக முருகேசன் அழைத்துச் செல்லப்பட்டுள்ளார். பின்னர் மேல் சிகிச்சைக்காக சேலம் அரசு மருத்துவமனையில் சிகிச்சைக்காக முருகேசன் அனுமதிக்கப்பட்டார். இந்நிலையில் சிகிச்சை பலனின்றி முருகேசன் உயிரிழந்தார்.

தந்தையை தாக்கிய காவல்துறையினர் மீது நடவடிக்கை கோரி தனி ஒருவராக போராடிய இளம்பெண்

தென்காசி மாவட்டம் செங்கோட்டை அருகே உள்ள புளியரை தாட்கோ நகரைச் சேர்ந்தவர் பிரான்சிஸ் அந்தோணி. இவர் கடந்த 18-ந் தேதி நியாய விலை கடையில் 20 கிலோ அரிசி வாங்கிக் கொண்டு தனது சித்தப்பா சின்னச்சாமி வீட்டிற்கு மோட்டார் சைக்கிளில் சென்றார்.

அப்போது, புளியரை சோதனை சாவடியில் வாகன சோதனையில் ஈடுபட்டிருந்த புளியரை காவல்துறையினர், அரிசியை பறிமுதல் செய்ததுடன் பிரான்சிஸ் அந்தோணியை காவல் நிலையத்தில் வைத்து துணை ஆய்வாளர் முருகேசன், ஏட்டு மஜித் ஆகியோர் தாக்கியதாகவும் கூறப்படுகிறது. இதில் பலத்த காயம் அடைந்த அவர் செங்கோட்டை அரசு மருத்துவமனையில் அனுமதிக்கப்பட்டார்.

இதையடுத்து பிரான்சிஸ் அந்தோணியின் 2-வது மகள் அபிதா தனது தந்தைய தாக்கிய காவல்துறையினர் மீது நடவடிக்கை கோரி அரசு மருத்துவமனை அருகில் இருந்த செல்போன் கோபுரத்தில் ஏறி தற்கொலை மிரட்டல் விடுத்தார். காவல்துறையினர் பேச்சுவார்த்தை நடத்தியதின்பேரில் அவர் கீழே இறங்கி வந்தார்.

தொடர்ந்து நேற்று முன்தினம் மாலை 4 மணிக்கு செங்கோட்டை அரசு மருத்துவமனையில் பரிசோதனைக்காக பிரான்சிஸ் அந்தோணி தனது குடும்பத்தினருடன் வந்தார். அப்போது, திடீரென்று அபிதா மருத்துவமனையின் மேல் தளத்தில் உள்ள குடிநீர் தொட்டி மீது ஏறி நின்று போராட்டத்தில் ஈடுபட்டார்.

தனது தந்தையை தாக்கிய காவல்துறையினர் மீது வழக்குப்பதிவு செய்து துறைரீதியாக நடவடிக்கை எடுக்க வேண்டும். இல்லையென்றால் தற்கொலை செய்து கொள்வேன் என்று மிரட்டல் விடுத்து போராட்டத்தில் ஈடுபட்டார்.

திருச்சி எல்ஃபின் நிதி நிறுவனம் மீது மேலும் ஒரு மோசடி புகார்

திருச்சிராப்பள்ளி மாநகரம் மன்னார்புரத்தில் எல்ஃபின் நிதி நிறுவனம் மற்றும் அறம் மக்கள் நலச் சங்கம் செயல்பட்டு வருகின்றன. இவற்றின் மீது பல்வேறு மோசடி புகார்கள் தொடர்ந்து வருகின்றன. வருமான வரித்துறை, பொருளாதார குற்றப்பிரிவு போலீசார் ஏற்கனவே விசாரணையும் நடத்தியுள்ளனர்.

இந்நிலையில், திருச்சிராப்பள்ளி பிராட்டியூரைச் சேர்ந்த பொறியாளர் மிதுன் சமேஷ் என்பவர், திருச்சிராப்பள்ளி மாநகர காவல் ஆணையரிடம் புகார் ஒன்றை அளித்துள்ளார். இதில், ‘எல்பின் நிறுவனத்தில் முதலீடு செய்தால் 10 மாதத்திற்குள் 3 மடங்கு திருப்பித் தருவதாக கூறியதை நம்பி, இந்த நிறுவனத்தில் கடந்த 2019 நவம்பர் மாதம் முதல் கடந்த மார்ச் மாதம் வரை பல்வேறு கட்டங்களாக ரூ. 72.82 லட்சம் முதலீடு செய்தேன்.

நண்பர்கள், உறவினர்கள் மூலம் மொத்தம் ரூ. 2 கோடியே 18 லட்ச முதலீடு செய்துள்ளோம். இதை இரண்டு, மும்மடங்காக, 4 கோடியே 68 லட்ச ரூபாயை தருவேன் என்று ஆசை வார்த்தைகளைக் கூறினர். அதற்குரிய காசோலைகள் வழங்கினார்கள்.

ஆனால் அதை வங்கியில் செலுத்த சென்ற போது, அந்த அக்கவுண்ட்டில் பணம் இல்லை என்று சொல்லி விட்டார்கள். பணத்தை நேரடியாக சென்று கேட்டபோது, பலமுறை அலைகழித்து, திரும்ப தராமல் மோசடி செய்து விட்டனர். கடந்த மாதம் சென்று பணத்தைக் கேட்ட போது, அடியாட்களை வைத்து கொலை மிரட்டல் விடுத்தார்கள் என்று அந்த புகாரில் கூறியுள்ளார்.

பெட்ரோல், டீசல் விலை உயர்வை கண்டித்து இந்திய கம்யூனிஸ்டு கட்சியினர் ஆர்ப்பாட்டம்


தென்காசி மாவட்டம் சிவகிரியில் பெட்ரோல், டீசல் விலை உயர்வை கண்டித்தும், தமிழக மக்களுக்கு தட்டுப்பாடின்றி தடுப்பூசி கிடைக்க வலியுறுத்தி இந்திய கம்யூனிஸ்டு கட்சியினர் ஆர்ப்பாட்டம் நடத்தினர்.