தமிழ்நாட்டில் நாடாளுமன்ற தேர்தல் நடைபெற இன்னும் 6 நாட்களே உள்ள நிலையில் அரசியல் கட்சி தலைவர்கள் சூறாவளி சுற்றுப்பயணம் செய்து பரபரப்பான பிரசாரத்தில் ஈடுபட்டு வருகிறார்கள். அந்த வகையில், பிரதமர் மோடி, பா.ஜ. மற்றும் அதன் கூட்டணிக் கட்சி வேட்பாளர்களுக்கு ஆதரவு கோரி கடந்த சில தினங்களுக்கு முன்னர் 2 நாள் சுற்றுப் பயணமாக தமிழகம் வந்தார். குறிப்பாக, பிரதமர் மோடி தி.நகரில் ரோடு ஷோ நிகழ்ச்சியில் பங்கேற்றார். தியாகராய நகர் பனகல் பூங்கா முதல் தேனாம்பேட்டை சிக்னல் வரையிலான பாண்டி பஜார் சாலையில் சுமார் 2 கி.மீ. தூரத்துக்கு ‘ரோடு ஷோ’ பிரசாரம் மேற்கொண்டார்.
அப்போது, கூட்டத்தில் இருந்த பாஜக பிரமுகர் ஒருவர், மோடியை சந்தோஷப்படுத்த ‘‘அப் கி பார்… சாக்கோ பார்” என முழக்கமிட்டார். இதனை தொடர்ந்து மற்ற பாஜக பிரமுகர்களும், இந்தி வாசகம் புரியாததால், “அப் கி பார்.. சாக்கோ பார்…” என உணர்ச்சி பொங்க முழக்கமிட்டனர். இது தொடர்பான வீடியோ சமூக வலைதளத்தில் தற்போது வைரலாகி வரும் நிலையில், இணையவாசிகள் மத்தியில் பெரும் சிரிப்பலையை ஏற்படுத்தி உள்ளது.