அண்ணாமலை நாடாளுமன்ற தேர்தலில் போட்டியிடவில்லை என அறிவிப்பு

தமிழக பாஜக தலைவர் அண்ணாமலை 6-ம் நாள் பாத யாத்திரை, நேற்று புதுக்கோட்டை மாவட்டம் திருமயம் பகுதிக்கு வந்தது. திருமயத்திற்கு காலை 9 மணிக்கு யாத்திரை வருவதாக இருந்தது. இதனால் கட்சி நிர்வாகிகள், கிராமப்புற பெண்களை 8 மணிக்கே வேன்களில் அழைத்து வந்தனர். பெண்களுக்கு யூனிபார்ம் சேலை வழங்கப்பட்ட நிலையில்,காரைக்குடியில் உள்ள ஓட்டலில் தங்கி இருந்த அண்ணாமலை வழக்கம் போல 10.30 மணிக்கு வந்தார்.

அங்கு கடியாபட்டி விலக்கு ரோட்டில் இருந்து திருமயம் கோட்டை வழியாக திருமயம் பேருந்து நிலையத்திற்கு நடந்து சென்று, பிரசார வாகனத்தில் இருந்தவாறு பேசினார். பின்னர் விராச்சிலை கிராமத்தில் உள்ள பாஜக நிர்வாகி வீட்டில் அண்ணாமலைக்கு மதிய விருந்து ஏற்பாடு செய்யப்பட்டிருந்த நிலையில் வெயிலில் தாக்கத்தால் அங்கிருந்து காரில் கடியாப்பட்டியில் உள்ள உணவு விடுதியில் மதிய உணவு அருந்த சென்றார்.

பின்னர் அண்ணாமலை அளித்த பேட்டியில், ‘கொடநாடு கொலை, கொள்ளை வழக்கை நடுநிலையாக நடத்த வேண்டும். யார் தவறு செய்திருந்தாலும் நடவடிக்கை எடுக்க வேண்டும். எங்கள் கூட்டணிக்கு யார் வந்தாலும் ஏற்றுக் கொள்வோம். வரும் நாடாளுமன்றத் தேர்தலில் நான் போட்டியிடவில்லை’ என தெரிவித்தார்.