Tag: Thalaivasal

சேலம் மாவட்டம் தலைவாசல் அருகிலுள்ள திருச்சுழியூர் கிராமத்தை சேர்ந்த விஜயபிரபாகரன் என்ற இளைஞர் நெல் அறுவடை எந்திரங்களை வாடகைக்கு விடும் தொழில் செய்து வருகிறார். விஜயபிரபாகரன் சேலத்தில் இருந்து ஆந்திரா நோக்கி சென்று கொண்டிருந்தார். வேலூர் மாவட்டம் காட்பாடி ஆர்.டி.ஓ. சோதனைச்சாவடியில் வாகனங்களுக்கு ஆந்திரா செல்ல பர்மிட் வாங்கினார்.

பர்மிட் உடன் ஒவ்வொரு வாகனத்துக்கும் தலா ரூ.500 என சோதனைச் சாவடி ஊழியர் ரூ.2500 லஞ்சமாக கேட்டார். அந்த பணத்தை ஊழியரிடம் கொடுக்கும்போது வீடியோவை எடுத்துள்ளனர். பின்னர் அங்கிருந்து தமிழக எல்லையான கிறிஸ்டியான்பேட்டை செல்லும்போது காட்பாடி சிறப்பு உதவி காவல் ஆய்வாளர் பிரகாஷ் என்பவர் இவர்களை மடக்கி பணம் கேட்டு, நெல் அறுவடை எந்திர தொழிலாளர்களிடம் இடம் வாக்குவாதம் செய்துள்ளார்.

மேலும் சிறப்பு உதவி காவல் ஆய்வாளர் சோதனை சாவடியில் ஒரு வாகனத்துக்கு ரூ.500 கொடுக்கிறீர்கள். எனக்கு கொடுக்க கசக்கிறதா என கேட்கிறார். பணம் கொடுக்கவில்லை என்றால் வழக்குப் பதிவு செய்வேன் என மிரட்டுகிறார். இதனால் அவர்கள் பணத்தை கொடுக்கின்றனர். பணம் கொடுப்பதை வீடியோ எடுத்துள்ளனர். பின்னர் அவர்கள் ஆந்திராவிற்கு சென்று விட்டனர்.

இந்த இரண்டு வீடியோக்களையும் சமூக வலைதளங்களில் பதிவிட்டு வீடியோ வைரலானது. இதனைத்தொடர்ந்து வேலூர் மாவட்ட காவல் கண்காணிப்பாளர் நெல் அறுவடை எந்திர தொழிலாளியிடம் லஞ்சம் வாங்கிய சிறப்பு உதவி காவல் ஆய்வாளரை பணியிடை நீக்கம் செய்து உத்தரவிட்டார்.