தமிழ்நாட்டைப் பாருங்கள். தமிழர்கள், இந்திக்கு வேண்டாம் என்று தைரியமாக சொல்கிறார்கள். நீங்கள் மகாராஷ்டிராவில் அனைவரும் மராத்திக்காக உறுதியாக நிற்க வேண்டும் என நவநிர்மாண் சேனா தலைவர் ராஜ் தாக்கரே தெரிவித்துள்ளார். மகாராஷ்டிரா மாநிலம் மும்பையிலிள்ள சிவாஜி பூங்காவில் நேற்று நடந்த பேரணியில் ராஜ் தாக்கரே உரையாற்றினார். அப்போது, “எங்கள் மும்பையில், அவர்கள் மராத்தி பேச முடியாது என்று சொல்கிறார்கள். அவர்கள் முகத்தில் அறையப்படுவார்கள். நாட்டைப் பற்றியும் மற்ற அனைத்தையும் பற்றியும் என்னிடம் சொல்லாதீர்கள். ஒவ்வொரு மாநிலத்திற்கும் அதன் சொந்த மொழி உண்டு, அது மதிக்கப்பட வேண்டும். மும்பையில், மராத்தி மதிக்கப்பட வேண்டும்.
மராத்தி பயன்படுத்தப்படுகிறதா என்பதை உறுதிப்படுத்த இன்று முதல் ஒவ்வொரு வங்கி மற்றும் நிறுவனத்தையும் கண்காணிக்க கட்சித் தொண்டர்களை அறிவுறுத்துகிறேன். நீங்கள் அனைவரும் மராத்திக்காக உறுதியாக நிற்க வேண்டும். தமிழ்நாட்டைப் பாருங்கள். தமிழர்கள், இந்திக்கு வேண்டாம் என்று தைரியமாக சொல்கிறார்கள், கேரளாவும் தமிழர்களைப் போலவே இந்திக்கு வேண்டாம் தெரிவிகின்றனர். மேலும், நீங்கள் மராத்தியர்களாக ஒன்று சேர்வதைத் தடுக்க சில அரசியல் தலைவர்கள் மகாராஷ்டிராவில் நிலவும் ஜாதி மற்றும் மத அடிப்படையிலான பிரிவினை செய்கிறார்கள். முதலில் வாட்ஸ்அப்பில் வரலாற்றைப் படிப்பதையும், சாதிக் கண்ணோட்டத்தில் படிப்பதையும் நிறுத்துமாறு மகாராஷ்டிர இளைஞர்களிடம் நான் வேண்டுகோள் விடுக்கின்றேன்.
இது உங்களை அரசியல் ரீதியாகப் பிரிக்கவும், மராத்தியர்களாக ஒன்று சேர்வதைத் தடுக்கவும் செய்யப்படுகிறது. இது எங்கள் கவனத்தைத் திசை திருப்புகிறது, மேலும் அதானிக்கு நிலங்களை வழங்குவது போன்ற பணிகள் அமைதியாக செய்யப்படுகின்றன” என ராஜ் தாக்கரே எச்சரித்தார். அதைத்தொடர்ந்து “மராட்டியர்களால் தோற்கடிக்கப்பட்டவர்களின் அதாவது அவுரங்கசீப் கட்டமைப்புகளை நாம் அழிக்கக்கூடாது. நாம் அவர்களை நல்லடக்கம் செய்தோம் என்பதை உலகம் அறிய வேண்டும். ஒரு படம் பார்த்துவிட்டு விழித்துக்கொள்ளும் இந்துவால் எந்தப் பயனும் இல்லை. வரலாற்றை வாட்ஸ்அப் மூலம் கற்றுக்கொள்ள முடியாது. அதற்கு நீங்கள் புத்தகங்களைப் படிக்க வேண்டும் என ராஜ் தாக்கரே தெரிவித்தார்.
