உத்தரபிரதேச மாநிலம் ரேபரேலியின் நசிராபாத் சிஸ்னி புவல்பூர் கிராமத்தில் ஆகஸ்ட் 11-ஆம் தேதி இரவு அர்ஜுன் பாசி என்ற இளைஞர் சுட்டுக் கொல்லப்பட்டார். குற்றம் சாட்டப்பட்ட 6 பேரை சிறைக்கு அனுப்பிய காவல்துறை, முக்கிய குற்றவாளியான விஷால் பிரதாப் சிங்கை இதுவரை பிடிக்க முடியாமல் போனதால், அவர்களது குடும்பத்தினர் உள்ளிட்ட கிராம மக்கள் மத்தியில் கோபம் ஏற்பட்டுள்ளது.
இந்நிலையில் மக்களவை எதிர்கட்சி தலைவரும் ரேபரேலி எம்பியுமான ராகுல்காந்தி பாதிக்கப்பட்ட குடும்பத்தை நேரில் சந்தித்து ஆறுதல் கூறினார். இதனை தொடர்ந்து செய்தியாளர்களை சந்தித்த ராகுல்காந்தி, முடிதிருத்தும் தொழிலாளியான அர்ஜூனின் சகோதரருக்கு தர வேண்டிய பணம் தொடர்பாக ஏற்பட்ட தகராறில் தான் அர்ஜூன் கொல்லப்பட்டதாக அவரது தாயார் தெரிவித்துள்ளார்.
ஒரு தலீத் கொல்லப்பட்டதால் இங்குள்ள மக்கள் நீதி கேட்கிறார்கள். அவரது முழு குடும்பமும் அச்சுறுத்தப்பட்டுள்ளது. ஆனால் காவல்துறை எந்த நடவடிக்கையையும் எடுக்கவில்லை. இந்த கொலைக்கு மூளையாக செயல்பட்டவர் மீது நடவடிக்கை எடுக்கவில்லை. உத்தரப்பிரதேசத்தில் சமூகத்தின் ஒவ்வொரு பிரிவினரும் மதிக்கப்பட வேண்டும். அனைவருக்கும் நீதி கிடைக்க வேண்டும் என்று நான் நம்புகிறேன்.
அர்ஜுன் கொலைக்கு மூளையாக செயல்பட்டவரை காவல் கண்காணிப்பாளர் பாதுகாக்கிறார். ஆனால் இதை நடக்க விடமாட்டோம். இந்த குடும்பத்துக்கு நீதி கிடைக்கும் வரை நாம் பின்வாங்க கூடாது” என ராகுல்காந்தி தெரிவித்தார்.
