கணவன் மீது அளவுக்கு அதிகமான பாசம் வைத்திருந்த பெண்ணின் வீடியோவை கண்டு போலீசார் திகைத்து விட்டார்கள். இது தொடர்பான விசாரணை நடந்து வந்தபோதிலும், வடமாநில மக்கள் கடுமையான அதிர்ச்சியில் உறைந்து போயிருக்கிறார்கள்.
நம்ம ஊரில் சுமங்கலி பூஜைகள் செய்யப்படுவதை போல வட இந்தியாவில் “கர்வா சவுத்” கொண்டாடப்படும் பண்டிகையாகும். கணவன்மார்கள் நீண்ட ஆயுளுடன் ஆரோக்கியமாக வாழ வேண்டும் என்பதற்காக, மனைவிமார்கள் விரதமிருந்து இந்த பண்டிகையை கொண்டாடுவார்கள். இந்த நாளில் பெண்கள் சூரிய உதயம் முதல் சந்திரன் உதயம் வரை கடுமையான விரதமிருப்பார்கள்.
இதன்மூலம், தங்களது கணவர்களின் ஆயுள் கூடும் என்பது அவர்களின் நம்பிக்கையாகும். இந்த ஆண்டு இப்பண்டிகை நேற்றைய தினம் கொண்டாடப்பட்டது. அந்தவகையில், உத்தரப்பிரதேசத்திலும் ஒரு பெண் இந்த பண்டிகைக்காக விரதமிருந்து வந்தார். கௌசாம்பி மாவட்டத்தில் உள்ள இஸ்மாயில்பூர் பகுதியை சேர்ந்த ஷைலேஷ் குமார் மனைவி சவிதா தன்னுடைய கணவரின் நீண்ட ஆயுளுக்காக, விரதம் மேற்கொண்டு வந்துள்ளார். தனக்காக தன்னுடைய மனைவி விரதமிருப்பதை பார்த்து பூரித்து போனார் கணவர்.
எனவே, இந்த பிரார்த்தனைக்காக மனைவிக்கு உதவியாக ஷைலேஷ்குமார் இருந்து வந்துள்ளார். நேற்று மாலையில் இந்த கர்வா சவுத் விரதம் முடிவடைந்தது. எனவே தம்பதி இருவரும் உணவு சாப்பிட்டுள்ளனர். கணவனுக்காக சாப்பாடு பரிமாறிய மனைவி, அவர் சாப்பிட்டுக் கொண்டிருக்கும்போதே, பக்கத்து வீட்டுக்கு சென்று வருகிறேன் என்று சொல்லிவிட்டு சென்றுள்ளார். அப்போது சாப்பிட்டு கொண்டிருந்த ஷைலேஷ்குமார் திடீரென மயங்கி விழுந்துவிட்டார்.
இதைப்பார்த்து அவரது சகோதரர் அகிலேஷ்குமார், உடனடியாக ஷைலேஷ்குமாரை மீட்டு மருத்துவமனைக்கு தூக்கி சென்றுள்ளார். ஆனால், மருத்துவர்கள் போராடியும் ஷைலேஷ்குமாரை காப்பாற்ற முடியவில்லை. சிறிது நேரத்திலேயே ஷைலேஷ்குமார் உயிர் பிரிந்தது. இதையடுத்து காவல்துறை வழக்குப்பதிவு செய்து விசாரணை நடத்தினர்.
அப்போது திடீரென சவிதா வீடியோ ஒன்றை அனுப்பினார். அந்த வீடியோவில், “என்னுடைய கணவருக்கும், இன்னொரு பெண்ணுக்கும் கள்ளக்காதல் இருந்தது. இந்த தகாத உறவு காரணமாகவே அவரை விஷம் வைத்துக் கொன்றேன்” என்று தெரிவித்திருந்தார். இதைப்பார்த்து அதிர்ச்சியடைந்த காவல்துறை உடனடியாக சவிதா கைது செய்து விசாரணை மேற்கொண்டும் வருகிறார்கள்.