தமிழ்நாடு பதிவெண் கொண்ட பைக்கில் பெட்ரோல் டேங்க் மீது இளம்பெண்ணை அமரவைத்துக் கொண்டு போக்குவரத்து நெரிசலான சாலையில் இளைஞர் ஒருவர் உல்லாச பயணம் மேற்கொண்ட நிகழ்வு சமூக வலைத்தளங்களில் பரவி வருகிறது.
இன்றைய 2k கிட்ஸ்கள் பலரும் சாலைகளில் விதிகளை மீறி ரேஸ் களத்தில் செய்ய வேண்டிய சாகசங்களை சாலையில் செய்வது, காரை ஓட்டிகொண்டே லேப்டாப்பில் வேலை பார்ப்பது, சில வாகன ஓட்டிகள் வாகனத்தை ஓட்டுவது சாலையில் வாகன ஓட்டிகளுக்கு பெரும் அச்சுறுத்தலாக இருக்கும். சில நேரங்களில் காதல் ஜோடிகள் பொது இடம் பைக்கில் செல்கிறோம் என்பதை பற்றி கவலைப்படாமல், யார் என்ன நினைத்தால் எங்களுக்கு என்ன? என பெட்ரூமை போல பைக்கை பயன்படுத்தும் நிகழ்வுகளும் அவ்வப்போது நடைபெற்று கொண்டும் வருகின்றது.
நாட்டிலேயே அதிகம் போக்குவரத்து நெரிசல் காணப்படும் நகரங்களில் ஒன்று பெங்களூர். பெங்களூரிலுள்ள பிரதான சாலைகளில் சில கிலோ மீட்டர் தொலைவுக்கு செல்வதற்கு கூட பல சிக்னல்களில் காத்துக்கிடக்க வேண்டி இருக்கும். போக்குவரத்து நெரிசல் என்பது விடுமுறை நாட்களில் கூட அதிகமாக இருக்கும். ஆனால் இப்படி கடுமையான போக்குவரத்து நெரிசலில் ஜோடி ஒன்று பைக்கில் செல்லும்போது பைக்கை பெட்ரூமை போல பயன்படுத்தியது சாலையில் சென்ற வாகன ஓட்டிகளை முகம் சுளிக்க வைத்தது.
பெங்களூர் சர்ஜாபூர் சாலையில் தமிழ்நாடு பதிவெண் கொண்ட பைக்கில் பெட்ரோல் டேங்கில் இளம்பெண்ணை உட்கார வைத்துக்கொண்டு கட்டிப்பிடித்தபடி இளைஞர் ஒருவர் பைக்கை ஓட்டிச் சென்றார். தங்களுக்கு மட்டும் இன்றி சாலையில் செல்லும் சக வாகன ஓட்டிகளுக்கு கூட ஆபத்தாக இருக்கும் என்பதை பற்றி கொஞ்சம் கூட கவலைப்படாமல் இந்த ஜோடி உல்லாச பயணம் மேற்கொண்டது சக வாகன ஓட்டிகளுக்கு முகம் சுளிக்க வைக்கும் வகையில் இருந்ததோடு, ஆபத்தை ஏற்படுத்தும் விதமாகவும் இருந்தது. இது தொடர்பான வீடியோ வைரலான நிலையில் காவல்துறையினர் வாகன பதிவெண்ணை வைத்து தீவிரமாக தேடி வருகிறார்கள்.