Tag: லஞ்சம்

செங்கல்பட்டு மாவட்டம், தாம்பரம் காவல் ஆணையரக எல்லைக்கு உட்பட்ட மணிமங்கலம் பகுதியில், சாலையில் சென்று கொண்டிருந்த கார் மீது எதிர் திசையில் வந்த பைக் வேகமாக மோதியதாக கூறப்படுகிறது. இதனால் காரின் முன் பக்கம் முழுவதும் சேதம் அடைந்துள்ளது. இதனால் நொறுங்கிய காரை அங்கிருந்து பொத்தேரியில் இயங்கி வரும் தாம்பரம் போக்குவரத்து புலனாய்வுப் பிரிவு காவல் நிலையத்திற்கு பாதிக்கப்பட்டவர் எடுத்துச் சென்றுள்ளார்.

அப்போது அங்கிருந்த காவலர்கள் விபத்து குறித்து விசாரிக்க வேண்டுமென்றால் முதலில் பத்தாயிரம் ரூபாய் கொடுக்க வேண்டும் என கூறியுள்ளனர். இதில் பேரம் பேசப்பட்டதையடுத்து, கடைசியாக உரிமையாளர் ரூ.5 ஆயிரத்தை லஞ்சமாக காவலர் ஜெய்கணேஷ் என்பவருக்கு கொடுத்துள்ளார். இதில் காவலர் ஜெய்கணேஷ் லஞ்சம் பெறும் வீடியோ தற்போது சமூக வலைத்தளங்களில் வைரலாகியுள்ளது.

ராமநாதபுரம் நகர் சாலைத் தெருவில் ராமநாதபுரம் மற்றும் சிவகங்கை மாவட்டங்களுக்கான வீட்டு வசதி வாரிய கோட்ட அலுவலகம் இயங்கி வருகிறது. இங்கு சிவகங்கை மாவட்டம் காரைக்குடி பகுதியை சேர்ந்த முன்னாள் அரசு வாகன ஓட்டுநர் பழனிச்சாமி, தேவகோட்டை ராம்நகர் வீட்டு வசதி வாரிய குடியிருப்பில் கடன் தவணை முறையில் தனது பெயரில் வீட்டுடன் கூடிய நிலத்தை வாங்கி அனுபவித்து வந்துள்ளார்.

இந்நிலையில், பழனிச்சாமி கடந்த 2018-ம் ஆண்டு இறந்துவிட்டதால், அற்கான பாக்கி தொகையை முழுவதையும் அவரது மகன் பிரவீன்குமார் செலுத்திவிட்டு தனது தாயார் பெயருக்கு மாற்ற ராமநாதபுரம் வீட்டு வசதி வாரிய அலுவலகத்தில் மனு செய்திருந்தார். இது சம்பந்தமாக செயற்பொறியாளர் மற்றும் நிர்வாக அதிகாரி பாண்டியராஜன் மற்றும் பதிவறை எழுத்தர் ரவிச்சந்திரன் ஆகியோரை பிரவீன்குமார் பலமுறை அணுகியுள்ளார்.

அப்போது இடத்தின் அளவு தவறாக குறிப்பிடப்பட்டுள்ளது, அந்த நிலத்தை அளக்க வேண்டும், அதற்கு எங்களை தனியாக கவனிக்க வேண்டும். மேலும் நிலத்தை அளப்பதற்கு வாகனத்தில் செல்வதற்கான தொகையினையும் செலுத்த வேண்டும் எனக் கூறி ரூ.15 ஆயிரம் லஞ்சம் கேட்டுள்ளனர். பின்னர் ரூ.10 ஆயிரம் கொடுத்தால் வேலையை முடித்து தருவதாக கூறியுள்ளனர்.

இந்நிலையில், லஞ்சம் கொடுக்க விரும்பாத பிரவீன்குமார் ராமநாதபுரம் லஞ்ச ஒழிப்புதுறையில் புகார் அளித்தார். அதன்படி லஞ்ச ஒழிப்புதுறை ரசாயனம் தடவிய ரூ.10 ஆயிரம் மதிப்புள்ள ரூபாய் நோட்டுகளை பிரவீன்குமாரிடம் கொடுத்து, லஞ்சம் கேட்ட அலுவலர்களிடம் கொடுக்கச் சொல்லியுள்ளனர். அதன்படி நேற்றிரவு பிரவீன்குமார் லஞ்ச பணத்தை செயற்பொறியாளரிடம் கொடுக்கச் சென்றபோது, அவர் அங்குள்ள ஒப்பந்த பணியாளர் பாலாமணியிடம் கொடுக்கச் சொன்னார்.

அதன்பின் ரூ.10 ஆயிரத்தை பாலாமணியிடம் கொடுத்தபோது மறைந்திருந்த, லஞ்ச ஒழிப்புதுறை பாலாமணியை கையும் களவுமாக பிடித்து கைது செய்தனர். மேலும் லஞ்சம் வாங்கச் சொன்ன செயற்பொறியாளர் பாண்டியராஜன், பதிவறை எழுத்தர் ரவிச்சந்திரன் ஆகியோரையும் கைது செய்து அவர்களிடம் தொடர்ந்து விசாரணை செய்து வருகின்றனர்.

திருவள்ளூர் மாவட்டம், திருத்தணி அருகே உள்ள மத்தூர் கிராமத்தைச் சேர்ந்த நிலத் தரகர் ஜெய்சங்கர். இவர், கடந்த 22-ம் தேதி பத்திரப்பதிவு செய்யப்பட்ட ஆர்.கே.பேட்டை அடுத்த விளக்கணாம்பூடி புதூரில் உள்ள 70 சென்ட் நிலத்துக்கு வழிகாட்டி மதிப்பீடு செய்வதற்காக சமீபத்தில் திருவள்ளூர் மாவட்டம் பள்ளிப்பட்டு அடுத்த ஆர்.கே.பேட்டை சார் பதிவாளர் அலுவலகத்தை அணுகினார்.

அப்போது, அந்த நில ஆவணத்தை வழிகாட்டி மதிப்பீடுக்காக மாவட்ட வருவாய் அலுவலர் அலுவலகத்துக்கு அனுப்பி வைக்க, ஆர்.கே.பேட்டை சார்பதிவாளரான, கடலூர் மாவட்டம், ஆலாடு கிராமத்தைச் சேர்ந்த செல்வராமச்சந்திரன் ரூ.50ஆயிரத்தை லஞ்சமாகக் கேட்டுள்ளார். அதற்கு ரூ.35 ஆயிரம்தருவதாக பேசப்பட்டது. ஆனால், லஞ்சம் கொடுக்கவிரும்பாத ஜெய்சங்கர், செல்வராமச்சந்திரன் மீது திருவள்ளூர் லஞ்ச ஒழிப்புத் துறைக்கு புகார் அளித்தார்.

இதனையடுத்து, லஞ்ச ஒழிப்புத் துறை ஆலோசனையின் படி, நேற்று செல்வராமச்சந்திரனிடம் ரசாயனபவுடர் தடவப்பட்ட ரூ.35 ஆயிரத்தை ஜெய்சங்கர் லஞ்சமாக அளிக்கச் சென்றார். அப்போது, செல்வராமச்சந்திரன் அறிவுறுத்தலின்படி, ஒப்பந்த ஊழியரான, கணினி இயக்கும் சிவலிங்கம் என்பவரிடம் ஜெய்சங்கர் ரூ.35 ஆயிரத்தை வழங்கினார். அப்போது, அங்கு மறைந்திருந்த லஞ்ச ஒழிப்புத் துறை செல்வராமச்சந்திரன், சிவலிங்கம் ஆகியோரை கைது செய்தனை தொடர்ந்து அங்கு பரபரப்பு ஏற்பட்டது.

வேலூர் மாவட்டம் குடியாத்தத்தை அடுத்த அக்ராவரம் ஊராட்சி ரங்கசமுத்திரம் கிராமத்தைச் சேர்ந்த போர்வெல் மெக்கானிக் மேகநாதன். இவர் தனது வீட்டுமனை பட்டாவிற்கு பெயர் மாற்றம் செய்ய அக்ராவரம் கிராம நிர்வாக அலுவலகத்தில் மனு செய்தார். இதனை பரிசீலித்து பெயர் மாற்றம் செய்து தருவதாக அவரிடம் கிராம நிர்வாக அலுவலரான கவசம்பட்டு கிராமத்தை சேர்ந்த ஜெயமுருகன் தெரிவித்தார்.

இதைத் தொடர்ந்து மேகநாதன் கிராம நிர்வாக அலுவலர் அலுவலகத்திற்கு பலமுறை சென்றும் பட்டா பெயர் மாற்றம் செய்து தரவில்லை. அது குறித்து கேட்டபோது கிராம நிர்வாக அலுவலர் ஜெயமுருகன் மற்றும் உதவியாளரான பெரும்பாடி கிராமத்தை சேர்ந்த தேன்மொழி ஆகியோர் ரூ.10 ஆயிரம் லஞ்சம் கேட்டதாக கூறப்படுகிறது. ஆனால் லஞ்ச பணம் கொடுக்க விரும்பாத மேகநாதன் அது குறித்து வேலூரில் உள்ள லஞ்ச ஒழிப்பு காவல்துறையில் புகார் செய்தார்.

இதனைத் தொடர்ந்து லஞ்ச ஒழிப்பு காவல்துறையினரின் ஆலோசனைப்படி ரசாயனம் தடவிய 500 ரூபாய் நோட்டுகள் 20 என மொத்தம் 10 ஆயிரம் ரூபாயை நேற்று மதியம் அக்ராவரம் கிராம நிர்வாக அலுவலர் அலுவலகத்தில் வைத்து கிராம நிர்வாக அலுவலர் ஜெயமுருகன் மற்றும் தேன்மொழியிடம் மேகநாதன் வழங்கினார்.

அப்போது அங்கு மறைந்திருந்த வேலூர் லஞ்ச ஒழிப்பு காவல்துறை கிராம நிர்வாக அலுவலர் ஜெயமுருகன் மற்றும் உதவியாளர் தேன்மொழியை கையும் களவுமாக பிடித்து கைது செய்து விசாரணை நடத்தி வருகிறார். லஞ்சம் வாங்கியதாக கிராம நிர்வாக அலுவலர் மற்றும் பெண் உதவியாளர் கைது செய்யப்பட்ட சம்பவம் பெரும் பரபரப்பை ஏற்படுத்தி உள்ளது.

திண்டுக்கல் அருகே உள்ள அடியனூத்து கிராமத்தை சேர்ந்த வரதராஜ் கடந்த 2003-ம் ஆண்டு இறந்துவிட்டார். இதனைத்தொடர்ந்து இவரது மனைவி அன்னலட்சுமி. இவர் தனது பெயரில் வாரிசு சான்றிதழ் வழங்கக்கோரி கடந்த 27.7.2023 இணையதளம் மூலம் அடியனூத்து கிராம நிர்வாக அலுவலகத்தில் மனு செய்தார்.ஆனால் அவருக்கு வாரிசு சான்றிதழ் கிடைக்கவில்லை.

இதனைத்தொடர்ந்து அன்னலட்சுமி தனது பேரன் கோபி நாகராஜ் மூலம் அடியனூத்து கிராம நிர்வாக அலுவலர் முருகானந்தத்தை பலமுறைநேரில் சந்தித்து தனக்கு வாரிசு சான்றிதழ் வழங்க கோரி வலியுறுத்தியுள்ளார். இதனை அடுத்து வாரிசு சான்றிதழ் வழங்குவதற்கு 2000 ரூபாய் லஞ்சம் தருமாறு கோபி நாகராஜிடம் கிராம நிர்வாக அலுவலர் கேட்டுள்ளார்.

லஞ்சம் கொடுக்க விரும்பாத கோபி நாகராஜ் திண்டுக்கல் லஞ்ச ஒழிப்பு காவல்துறையினரிடம் புகார் அளித்தார். லஞ்ச ஒழிப்புத்துறை காவல்துறையினரின் ஆலோசனைப்படி கோபிநாத்திடம் ரசாயனம் தடவிய ரூபாய் நோட்டுக்களை, கிராம நிர்வாக அலுவலரிடம் கொடுக்கும் போது மறைந்திருந்த லஞ்ச ஒழிப்புத்துறை காவல்துறையினர் கிராம நிர்வாக அலுவலர் முருகானந்தம், உதவியாளர் செந்தில்குமார் ஆகியோரை மடக்கிப்பிடித்தனர்.

தேனி மருத்துவக்கல்லூரி மருத்துவமனை முதல்வர் மீனாட்சி சுந்தரம், மருத்துவமனையில் உள்ள உணவக உரிமையாளர் மாரிசாமியிடம் லஞ்சம் கேட்டு பெற்றதாக புகார் எழுந்தது. இது தொடர்பான வீடியோ பரவியது. இதனையடுத்து அமைச்சர் மா. சுப்பிரமணியன் உத்தரவின்பேரில், மாவட்ட இணை மருத்துவ இணை இயக்குநர் நேரில் சென்று, உணவக உரிமையரிடம் விசாரணை நடத்தினர்.

அதன் அடிப்படையில், தேனி மருத்துவக் கல்லூரி மருத்துவமனையின் முதல்வர் மீனாட்சி சுந்தரம் லஞ்சம் வாங்கியது உண்மையென தெரியவந்ததாக மருத்துவத்துறை தெரிவித்துள்ளது. இதனையடுத்து மீனாட்சி சுந்தரம் மீது துறை ரீதியான நடவடிக்கை மேற்கொள்ள, பணியிடை நீக்கம் செய்து அமைச்சர் மா.சுப்பிரமணியன் உத்தரவிட்டுள்ளார்.