கடலூர் மாவட்டம் வடலூர் நகராட்சியில் உள்ள 27 வார்டுகளில் சுமார் ஒரு லட்சத்திற்கும் மேற்பட்ட குடும்பங்கள் வசித்து வருகின்றனர். நகரத்தில் உள்ள அனைத்து அடிப்படை கட்டமைப்பு வசதிகளும் நகராட்சி கட்டுப்பாட்டில் உள்ள நிலையில், நகராட்சியில் தற்காலிக ஊழியராக பணிபுரிந்து வரும் அன்னலட்சுமி என்பவர், நகராட்சியின் சூப்பர்வைசராக உள்ளார்.
இந்நிலையில் இவர் தனது சொந்த வேலைக்காக, நகராட்சி ஊழியர்களை அழைத்துக் கொண்டு , பார்வதிபுரம் கிராமத்தில் உள்ள அவரது விவசாய நிலத்தில், மல்லாட்டை செடி பிடுங்க வைத்து, விவசாய வேலை செய்ய சொன்ன வீடியோ சமூக வலைதளத்தில் வெளியாகி, பொது மக்களிடையே கடும் கொந்தளிப்பை ஏற்படுத்தி உள்ளது.
வடலூர் நகரத்தில் போதிய அடிப்படை வசதிகள் இல்லை எனவும், நகராட்சி ஊழியர்களுக்கு எண்ணற்ற வேலைகள், நகரம் முழுவதும் உள்ள நிலையில், அவர்களை அப்பணி செய்வதற்காக, நகராட்சி நிர்வாகம் பயன்படுத்தாமல், தற்காலிக ஊழியராக பணியாற்றும் அன்னலட்சுமிக்காக, நகராட்சி ஊழியர்களை விவசாய வேலைக்கு அனுப்பியது, அனைத்து தரப்பு மக்களும் கடும் கண்டனம் தெரிவித்து வருகின்றனர்.
இதுகுறித்து சம்பந்தப்பட்ட வடலூர் திமுக நகராட்சி சேர்மன் சிவகுமார் கண்டுகொள்ளவில்லை எனவும், நகராட்சி ஊழியர்களை விவசாய வேலை செய்ய வைத்த, தற்காலிக ஊழியர் அன்னலட்சுமி மீது உரிய நடவடிக்கை எடுக்க வேண்டும் எனவும், அவருக்கு உறுதுணையாக இருந்த நகராட்சி அதிகாரிகள் மீது கடும் நடவடிக்கையை மாவட்ட நிர்வாகம் எடுக்க வேண்டும் என வடலூர் நகரப் பகுதி வாழ் மக்கள் கோரிக்கை வைத்துள்ளனர்.