பிஹார் மாநிலத்தில் ஐக்கிய ஜனதா தளம், காங்கிரஸ், ராஷ்டிரிய ஜனதா தளம், இடதுசாரி கட்சிகள் இணைந்த நிதிஷ் குமார் தலைமையிலான ஆட்சி நடைபெற்று வருகின்து. இந்நிலையில் சமீபத்தில் நிதிஷ் குமார், இக்கூட்டணியிலிருந்து விலகி பாஜகவில் இணைந்தார். இது தேசிய அளவில் பெரும் அதிர்வலையை ஏற்படுத்தியது. இந்நிலையில் நேற்று முன்தினம் பிஹார் சட்டப் பேரவையில் நம்பிக்கை வாக்கெடுப்பு நடைபெற்றது. 243 உறுப்பினர்களைக் கொண்ட சட்டப் பேரவையில் 129 உறுப்பினர்கள் நிதிஷ் குமார் தலைமையிலான ஜக்கிய ஜனதா தள – பாஜக கூட்டணி ஆட்சிக்கு ஆதரவு தெரிவித்தனர்.
இந்நிலையில், நிதிஷ் குமார் அரசுக்கு எதிராக வாக்களிக்க தனக்கு ரூ.10 கோடி பேரம் பேசியதாக ஐக்கிய ஜனதா தள எம்எல்ஏ சுதன்ஷு சேகர் புகார் அளித்துள்ளார். “நிதிஷ்குமார் அரசுக்கு ஆதரவாக வாக்களிக்காமல், ராஷ்டிரிய ஜனதா தளத்துக்கு வாக்களிக்கும்படி எங்கள் கட்சி எம்எல்ஏ சஞ்சீவ் குமார், எங்கள் கட்சியில் உள்ள மற்ற எம்எல்ஏக்களிடம் பேரம் பேசினார். எனக்கு ரூ.10 கோடி அல்லது அமைச்சர் பதவி தருவதாக பேரம் பேசினர். இது தொடர்பாக பொறியாளர் சுனில் என்னை கடந்த 10-ம் தேதி தொடர்புகொண்டார். முதற்கட்டமாக ரூ.5 கோடி தருவதாகவும் வாக்கெடுப்பு முடிந்த பிறகு ரூ.5 கோடி தருவதாகவும் கூறினார்.