நாமக்கல் மாவட்டம், எருமப்பட்டி அருகே வரகூரில் அரசு மேல்நிலைப்பள்ளி ஒன்று செயல்பட்டு வருகிறது. இந்த பள்ளியில் 11-ம் வகுப்பு படித்து வரும் இரு மாணவர்களுக்கு இடையே கடுமையான மோதல் ஏற்பட்டுள்ளது. இருவரும் ஒருவரையொருவர் மாறி மாறி தாக்கிக்கொண்டதாக சொல்லப்படுகிறது. இந்த மோதல் சம்பவத்தில் ஒரு மாணவர் பலத்த காயமடைந்து மயங்கி விழுந்த நிலையில், ஆசிரியர்கள் அவரை அருகில் இருந்த மருத்துவமனைக்கு சிகிச்சைக்காக கொண்டு சென்றுள்ளனர். ஆனால், மற்றொரு மாணவர் தாக்கியதில் மயக்கமடைந்த மாணவன் மருத்துவமனை செல்லும் வழியிலேயே உயிரிழந்தார்.
இதுகுறித்து வழக்கு பதிவு செய்த காவல்துறை தீவிர விசாரணை மேற்கொண்டனர். இந்த மோதல் சம்பவத்தில் உயிரிழந்த மாணவன் ஓட்டுநர் ரமேஷ் என்பவரின் மகன் ஆகாஷ் என்பதும், அவர் அருகில் உள்ள நவலடிப்பட்டி பகுதியை சேர்ந்தவர் என்பது தெரியவந்துள்ளது. அதேபோல், ஆகாஷை தாக்கி கொலை செய்த மாணவர், அருகில் உள்ள செல்லிபாளையத்தைச் சேர்ந்த கூலித்தொழிலாளி ஒருவரின் மகன் என்றும் சொல்லப்படுகிறது.
வகுப்பறையில் சுவர் ஓரமாக வைக்கப்பட்டிருந்த ஆகாஷின் செருப்பை மாணவர்கள் யாரோ எடுத்து ஒளித்து வைக்க, அதனால் எழுத்த சந்தேகத்தில் சக மாணவர் ஒருவரோடு ஆகாஷ் வாக்குவாதம் செய்துள்ளார். அதனைத்தொடர்ந்து, மாணவர்களுக்குள் எழுந்த மோதலில், ஆகாஷ் அடித்துக் கொலை செய்யப்பட்டிருப்பதாக சொல்லப்படுகிறது. மரணமடைந்த ஆகாஷின் உடல் உடற்கூராய்வுக்காக நாமக்கல் அரசு மருத்துவமனையில் வைக்கப்பட்டுள்ளது. ஆகாஷை அடித்துக் கொலை செய்ய அந்த மாணவரை காவல்துறை பிடித்து விசாரித்து வருகின்றனர். பள்ளி மாணவர்களுக்கு இடையே ஏற்பட்ட மோதலில் ஒரு மாணவன் உயிரிழந்த சம்பவம் அந்தப் பகுதியில் பரபரப்பை ஏற்படுத்தி உள்ளது.
