தூத்துக்குடி மாவட்டம், இன்னாசியர்புரத்தில் உள்ள நீம் பவுண்டேஷன் நிறுவனத்தின் உரிமையாளர் லூயிஸ் ராஜ்குமார் அவரது மனைவி கவிதா ஆகியோர் கடந்த 2022-ஆம் ஆண்டு நவம்பர் மாதத்திலிருந்து நீம் பவுண்டேசன் சார்பில் பள்ளி இடைநிற்றல் குழந்தைகளை மீண்டும் பள்ளியில் சேர்க்கும் பணிக்காக தன்னார்வ ஆசிரியர்களுக்கு பயிற்சிகள் மில்லர்புரம் புனித மரியன்னை மேல்நிலைப் பள்ளி உட்பட பல பள்ளிகளில் நடைபெற்றது. மேலும் ஆசிரியர்களிடம் நீம் பவுண்டேசனில் உறுப்பினராக சேருவதற்கும், சிறப்பு பயிற்சி எடுப்பதற்கும் ரூ. 50,000 கட்டினால், மாதம் ரூ. 15,000 சம்பளத்துடன் வேலை கிடைக்கும் என்று கூறியுள்ளனர். இதனை நம்பி ஏராளமான ஆசிரியர்கள் சேர்ந்துள்ளனர்.
இந்நிலையில் ராஜபாளையத்தை சேர்ந்த மரிய சில்வியா மைக்கேல் அண்டோ ஜீனியஸ் தம்பதி்யினரிடம் தங்கள் நிறுவனத்தின் மூலம் அரசு உதவி பெறும் பள்ளிகளில் ஆசிரியர்களாக பணி செய்ய ரூ.50 ஆயிரம் முன்பணம் செலுத்த வேண்டும் என்றும், அவ்வாறு முன்பணம் செலுத்தினால் மாதம் தோறும் ரூ.15 ஆயிரம் சம்பளம் தருவதாகவும், 15 ஆண்டுகள் வேலை செய்யலாம் என்றும், அரசு வேலை கிடைத்து சென்றாலோ அல்லது இடையில் வேலையை விட்டு நின்றுவிட்டாலோ முன்பணத்தை திருப்பித் தந்து விடுவதாக ஆசை வார்த்தைகள் கூறி உள்ளனர்.
இதனை நம்பிய மரிய சில்வியா ரூ.50 ஆயிரம் கொடுத்து உள்ளார். அதன்பிறகு அரசின் எவ்வித வழிகாட்டு முறைகளும் இல்லாமல், முறைகேடாக சிலுவைப்பட்டி, பகுதியில் உள்ள ஒரு உயர்நிலைப் பள்ளியில் ஆசிரியராக நியமித்து உள்ளனர். ஆனால் 4 மாதங்களாக எந்தவித சம்பளமும் வழங்கப்படவில்லை இதனால் தான் ஏமாற்றப்பட்டதை உணர்ந்த மரியசில்வியா மாவட்ட காவல் கண்காணிப்பாளர் அலுவலகத்தில் புகார் அளித்தார். இதனை தொடர்ந்து மாவட்ட குற்றப்பிரிவு காவல்துறை வழக்கு பதிவு செய்து லூயிஸ் ராஜ்குமார், கவிதா ஆகிய 2 பேரையும் கைது செய்து விசாரணை நடத்தி வருகின்றனர்.
