கோத்தகிரி 13-வது காய்கறி கண்காட்சியை ஆட்சியர் லட்சுமி பவ்யா தண்ணீரு ரிப்பன் வெட்டி தொடங்கி வைத்தார். ஏப்ரல்- மே ஆகிய 2 மாதங்கள் கோடை சீசன் ஆதலால் நீலகிரி மாவட்டத்தில் நிலவும் இதமான காலநிலையை அனுபவிப்பதற்காகவும், சுற்றுலா தலங்களை கண்டு ரசிக்கவும் லட்சக்கணக்காக சுற்றுலாப் பயணிகள் படையெடுத்து வருவது வழக்கம். அப்படி வரும் சுற்றுலாப் பயணிகளை மகிழ்விப்பதற்காக மாவட்ட நிர்வாகம் சார்பில் ஆண்டுதோறும் கோடை விழா கொண்டாடப்பட்டு வருகிறது.
அதன்படி,இந்தாண்டுக்கான கோடை விழா கோத்தகிரி நேரு பூங்காவில் 13-வது காய்கறி கண்காட்சியை மாவட்ட ஆட்சியர் லட்சுமி பவ்யா தண்ணீரு ரிப்பன் வெட்டி தொடங்கி வைத்தார். இந்த கண்காட்சியில் தமிழர் பண்பாட்டை போற்றும் விதமாக கத்தரிக்காய், உருளைக்கிழங்கு, முள்ளங்கி, கேரட் உள்பட 2 ½ டன் காய்கறிகளை கொண்டு வாடிவாசலில் இருந்து சீறி பாயும் காளை உள்பட பல்வேறு அலங்காரங்கள் தத்ரூபமாக அமைக்கப்பட்டு உள்ளன.
காஞ்சிபுரம், திருவண்ணாமலை, விழுப்புரம், ஈரோடு, திருப்பூர், தேனி, கோவை உள்பட பல்வேறு மாவட்ட தோட்டக்கலைத்துறை சார்பில் பல்வேறு காய்கறிகளால் ஆன இருவாச்சி பறவை, பாண்டா கரடி, புலி, மாட்டு வண்டி, சிங்கம், கழுகு, திருவள்ளுவர், பூவில் இருந்து தேன் எடுக்கும் தேனீ, ஆகிய அலங்காரங்களும் கோத்தகிரி கண்காட்சியில் இடம்பெற்று உள்ளன. நேற்று வார விடுமுறை நாள் என்பதால் ஏராளமான சுற்றுலாப் பயணிகள் காய்கறி கண்காட்சிக்கு வந்து அங்கு காட்சிப்படுத்தப்பட்டு உள்ள அலங்கார வடிவமைப்புகளை கண்டு ரசித்தனர். இந்நிலையில் 2-வது நாளாக இன்றும் கோத்தகிரி பூங்காவில் சுற்றுலாப் பயணிகள் கூட்டம் அலைமோதி கொண்டுள்ளனர்.
