திருப்பூர் மாவட்டம், தாராபுரத்தில் புகழ்பெற்ற முருகன் கோவிலில் கந்த சஷ்டி விழா கொடியேற்றத்துடன் கோலாகலமாக தொடங்கியது. திரளான பக்தர்கள் கலந்து கொண்டு முருகனை வழிபட்டனர். தாராபுரம் புதிய காவல் நிலையம் எதிரே பிரசித்தி பெற்ற பாலசுப்பிரமணிய சுவாமி திருக்கோவில் அமைந்துள்ளது.
இந்த பாலசுப்பிரமணிய சுவாமி திருக்கோவில் பக்தர்கள் தொடர்ந்து 6 வாரங்கள் நெய்தீபம் ஏற்றி விரதம் இருந்து வழிபட்டால் வேண்டுதல் நிறைவேறும் என்பது நம்பிக்கையாக இருந்து வருகிறது. குறிப்பாக, எப்போதும் செவ்வாய்க்கிழமைகளில் இந்த பாலசுப்பிரமணிய சுவாமி திருக்கோவிலில் பக்தர்கள் கூட்டம் அலைமோதும்.
முன்னதாக பாலசுப்பிரமணிய சுவாமிக்கு சிறப்பு பூஜைகள் நடத்தப்பட்டு மேளதாளங்கள் முழங்க ஆலயத்தை வலம் வந்து கொடிப்பட்டதை சிவாச்சாரியார்கள் கொடி மரத்தில் ஏற்றி வைத்தனர். தொடர்ந்து பாலசுப்பிரமணிய சுவாமிக்கு தீப தூப ஆராதனைகள் காண்பிக்கப்பட்டது. இதில் திரளான பக்தர்கள் கலந்து கொண்டு சாமி தரிசனம் செய்தனர்.
தொடர்ந்து ஆறுநாட்கள் முருகப்பெருமானுக்கு சிறப்பு வழிபாடுகள் நடைபெற உள்ளன. விழாவின் உச்சகட்டமாக வரும் 7-ஆம் தேதி சூரனை முருகப்பெருமான் வதம் செய்யும் சூரசம்ஹார விழா நடைபெற உள்ளது. விழாவின் நிறைவாக முருகப்பெருமான் வள்ளி தெய்வானை திருக்கல்யாண வைபவம் 8-ஆம் தேதி நடைபெற உள்ளது என்பது குறிப்பிடத்தக்கது.