கொளத்தூரை சேர்ந்த கலையரசி பார்த்தசாரதி தம்பதியின் மகன் சாய் சித்தார்த். 928 Colour Cubes-ஐ கொண்டு முதலமைச்சர் அவர்களின் உருவப்படத்தை வரைந்து சாதனை படைத்துள்ளார். தம்பி சாய் சித்தார்த்தை முதல்வர் அவர்கள் நேற்று பாராட்டினார்கள்.
Category: தமிழகம்
Tamilnadu
அமைச்சர் கீதாஜீவன்: அ.தி.மு.க. ஆட்சியில் 3¼ லட்சம் திருமண நிதியுதவி மனுக்கள் நிலுவை
காஞ்சீபுரம் மாவட்ட ஆட்சியர் அலுவலக கூட்ட அரங்கில் தாலிக்கு தங்கம், திருமண நிதியுதவி உள்ளிட்ட பல்வேறு நலத்திட்ட உதவிகள் வழங்கும் விழா நடைபெற்றது. இதற்கு ஆட்சியர் ஆர்த்தி தலைமை தாங்கினார். ஊரக தொழில்துறை அமைச்சர் தா.மோ.அன்பரசன், சமூக நலன் மற்றும் மகளிர் உரிமைத்துறை அமைச்சர் கீதாஜீவன் ஆகியோர் கலந்து கொண்டு 90 பயனாளிகளுக்கு திருமண நிதியுதவி, தாலிக்கு தங்கம் போன்றவற்றை வழங்கினர்.
5 பேருக்கு இலவச தையல் எந்திரங்களும், 5 பேருக்கு 3 சக்கர வாகனங்கள் வழங்கப்பட்டது. விழாவில் அமைச்சர் கீதாஜீவன் பேசும்போது, பெண்கள் கல்வி கற்கவும், பெண் குழந்தைகளை திருமணம் செய்து கொடுக்க பெற்றோர்கள் கஷ்டப்படக்கூடாது என்பதற்காகவும் முன்னாள் முதலமைச்சர் கருணாநிதியால் அறிமுகப்படுத்தப்பட்ட திட்டமே தாலிக்கு தங்கம் வழங்கும் திட்டம்.
1989-ம் ஆண்டு இந்த திட்டம் தொடங்கப்பட்ட போது ரூ.5 ஆயிரம் வழங்கப்பட்டது.இன்று 8 கிராம் தங்கமும், திருமண நிதியுதவியாக ரூ.25 ஆயிரமும் வழங்கப்படுகிறது. தி.மு.க. ஆட்சியின் போதெல்லாம் இந்த திட்ட மனு பெறப்பட்ட 2 அல்லது 3 மாதங்களில் நிதியுதவி வழங்கப்பட்டு விடும். ஆனால் கடந்த அ.தி.மு.க. ஆட்சியில் 2018-ம் ஆண்டு செப்டம்பர் மாதத்துக்கு பிறகு மொத்தம் 3 லட்சத்து 34 ஆயிரத்து 913 மனுக்களுக்கு நிதியுதவி வழங்காமல் நிலுவையாக வைத்து விட்டு சென்றுள்ளனர் என தெரிவித்தார்.
ஈரோடு மாவட்டத்தில் 2-வது நாளாக ஜமாபந்தி முகாம்
ஈரோடு மாவட்டத்தில் நேற்று 2-வது நாளாக ஜமாபந்தி முகாம் நடந்தது. அதன்படி கொடுமுடியில் நேற்று மாவட்ட ஆட்சியர் கிருஷ்ணனுண்ணி தலைமையில் ஜமாபந்தி முகாம் நடைபெற்றது.
முகாமில் கிளாம்பாடி வருவாய் கோட்டத்தில் உள்ள புஞ்சை கிளாம்பாடி, நஞ்சை கிளாம்பாடி, ஊஞ்சலூர், கொளத்துப்பாளையம், நஞ்சை கொளாநல்லி, புஞ்சை கொளாநல்லி, பாசூர் ஆகிய கிராமங்களுக்கான வருவாய் தீர்வாயம் கோப்புகளை ஆட்சியர் ஆய்வு செய்தார்.
வால்பாறையில் தடுப்பூசி பற்றாக்குறை பொதுமக்கள் வாக்குவாதம்
கோயம்புத்தூர் மாவட்டம், வால்பாறை நகர் மற்றும் எஸ்டேட் பகுதிகளில் கொரோனா பரவலை தடுக்க தீவிர நடவடிக்கை மேற்கொள்ளப்பட்டு வருகிறது. அதன் ஒரு பகுதியாக இங்கு வசிக்கும் பொதுமக்களுக்கு அரசு மேல்நிலைப்பள்ளி, முடீஸ், சோலையார் நகரில் உள்ள ஆரம்ப சுகாதார நிலையங்கள் மற்றும் அந்தந்த எஸ்டேட் பகுதியில் உள்ள மருத்துவமனைகளில் கொரோனா தடுப்பூசி போடப்பட்டு வருகின்றது.
இந்நிலையில் வால்பாறை அரசு மேல்நிலைப்பள்ளியில் தடுப்பூசி போடும் சிறப்பு முகாம் நடந்தது. இதில் ஏராளமான பொதுமக்கள் நீண்ட வரிசையில் காத்து நின்று தடுப்பூசி போட்டுக் கொண்டனர். இறுதியில் 50-க்கும் மேற்பட்டவர்கள் காத்து நிற்கும்போது பற்றாக்குறை காரணமாக தடுப்பூசி போடுவது நிறுத்தப்பட்டது. உடனே அங்கு காத்திருந்த பொதுமக்கள் ஏன் தடுப்பூசி போடவில்லை என்று சுகாதாரத்துறை அதிகாரிகளிடம் கேட்டனர்.
அதற்கு அவர்கள், குறைந்தளவில் மட்டுமே தடுப்பூசி வந்ததாகவும், அது தீர்ந்து விட்ட தால் வந்த பின்னர் போடப்படும் என்றும் தெரிவித்தனர். இதனால் ஆத்திரம் அடைந்த பொதுமக்கள் அதிகாரிகளிடம் கடுமையான வாக்கு வாதத்தில் ஈடுபட்டனர்.
அ.தி.மு.க. சார்பில் நலத்திட்ட உதவிகள்
செங்கல்பட்டு மாவட்டம் சிங்கப்பெருமாள் கோவில் ஊராட்சியை சேர்ந்த எஸ்.கவுஸ் பாஷா. காட்டாங்கொளத்தூர் மேற்கு ஒன்றிய அ.தி.மு.க. செயலாளராக பதவி வகித்து வந்த இவர் கடந்த மே மாதம் 16-ந்தேதியன்று கொரோனா தொற்றால் உயிரிழந்தார். அவரது படத்திறப்பு விழா சிங்கப்பெருமாள் கோவில் அ.தி.மு.க. கட்சி அலுவலகம் அருகே நடந்தது.
இதில் கவுஸ் பாஷா மகன்களான டாக்டர்கள் சாதிக்பாஷா, ஷாக்திர் பாஷா தலைமை தாங்கினார்கள். சிறப்பு விருந்தினர்களாக முன்னாள் அமைச்சர்கள் வளர்மதி, 15 தையல் இயந்திரங்கள், 300 பேருக்கு சேலை, 1000 பேருக்கு அன்னதானங்களை வழங்கினார்.
இலவச தையல் எந்திரம் பெற விண்ணப்பிக்கலாம்
அரியலூர் மாவட்டம், சமூக நலன் மற்றும் மகளிர் உரிமைத்துறையின் மூலம் 2021-22-ம் நிதி ஆண்டிற்கு சத்தியவாணி முத்து அம்மையார் நினைவு இலவச தையல் இயந்திரம் வழங்கும் திட்டத்தின் கீழ் விதவை, கணவனால் கைவிடப்பட்டவர், ஆதரவற்றோர், மாற்றுத்திறனாளி மற்றும் நலிவுற்ற மகளிர் ஆகியோருக்கு தையல் எந்திரம் வழங்கப்பட உள்ளது.
எனவே, அரியலூர் மாவட்டத்தில் உள்ள தகுதி வாய்ந்த விண்ணப்பதாரர்கள் தாசில்தாரிடம் இருந்து பெற்ற அசல் குடும்ப ஆண்டு வருமான சான்று (ரூ.72 ஆயிரத்துக்குள் இருக்க வேண்டும்), இருப்பிட சான்று அல்லது குடும்ப அட்டை நகல், குறைந்தபட்சம் ஆறு மாத கால தையல் பயிற்சி பெற்ற சான்றின் நகல், வயதுக்கான சான்று (20 முதல் 40 வயது வரை), சாதி சான்று நகல், ஆதார் அட்டை நகல், இரண்டு பாஸ்போர்ட்டு அளவுள்ள புகைப்படங்கள் மற்றும் முன்னுரிமை கோருவதற்கு சான்றுகள் இருப்பின், அதன் நகல் ஆகியவைகளுடன் விண்ணப்பத்தை அரியலூர் மாவட்ட ஆட்சியர் அலுவலக தரைத்தளத்தில் அறை எண் 20-ல் இயங்கும் மாவட்ட சமூக நல அலுவலகத்தில் வருகிற 28-ந்தேதி மாலை 5 மணிக்குள் சமர்ப்பிக்க வேண்டும் என்று ஆட்சியர் ரமண சரஸ்வதி கேட்டுக்கொண்டுள்ளார்.
‘என் தலைமையில் செயல்பட்டிருந்தால் மீண்டும் ஆட்சியை பிடித்திருக்க முடியும்’’
வி. கே. சசிகலா தினந்தோறும் தொண்டர்களுடன் தொலைபேசியில் பேசி வருகிறார். அந்த வகையி்ல் ஈரோட்டை சேர்ந்த சிதம்பரம் என்ற தொண்டரிடம் வி. கே. சசிகலா பேசுகையில், கொரோனா தாக்கம் முழுசா ஓயட்டும். கட்டாயம் நான் வந்துருவேன். கட்சியே இப்போ வேற மாதிரி போய்க்கிட்டு இருக்கு. விரைவில் வந்து இந்த கட்சியை காப்பாற்றுவேன்.
அம்மா இருக்கும்போது நம்ம கட்சி நாட்டிலேயே 3-வது பெரிய கட்சினு நமக்கு அந்தஸ்து கிடைச்சது. ஆனா இன்னைக்கு நம்ம எம்.பி.க்களை நாமே இழந்திருக்கிறோம். இருந்த எம்.பி.க்களையும், அவங்களோட தவறான முடிவுகளால் வேற கட்சிக்கு தாரை வார்த்திருக்கிறோம். எந்த பிரச்சினையும் ஏற்படாம என்னோட தலைமையில ஒற்றுமையாக இருந்துருந்தா நிச்சயம் ஆட்சி அமைச்சிருக்கலாம் என வி. கே. சசிகலா தெரிவித்தார்.
காவல்துறை அத்துமீறல்களை மு.க.ஸ்டாலின் தடுக்க வேண்டும்
பொதுமக்களின் நண்பனாக விளங்க வேண்டிய காவல்துறை பொதுமக்களை அடித்து துன்புறுத்தும் நிலைக்கு சென்று கொண்டிருப்பதை பார்க்கும்போது, முந்தைய தி.மு.க. ஆட்சியில் நடைபெற்ற சம்பவங்கள்தான் பொதுமக்களின் நினைவுக்கு வருகின்றன.
சில நாட்களுக்கு முன்பு, விருதுநகர் மாவட்டம் மலையடிப்பட்டி குறிஞ்சி நகரை சேர்ந்த கட்டிட தொழிலாளி பாலமுருகனை காவல்துறை தாக்கிய வீடியோ சமூகவலைத் தளங்களில் பரவியதன் காரணமாக தொடர்புடைய போலீசார் மீது நடவடிக்கை எடுக்கப்பட்டு இருப்பதாக செய்திகள் வெளிவந்தன.
இதேபோன்று தென்காசி மாவட்டம் செங்கோட்டையை அடுத்த புளியரை தாட்கோ நகரை சேர்ந்த மாற்றுத்திறனாளியான பிரான்சிஸ் அந்தோணியை தாக்கிய காவல்துறை மீது நடவடிக்கை எடுக்க வேண்டும் என்று அவரது மகள் போராட்டத்தில் ஈடுபட்டதையடுத்து, காவல்துறை மீது 3 பிரிவுகளில் வழக்குப்பதிவு செய்யப்பட்டுள்ளது.
இந்த சூழ்நிலையில் சேலம் மாவட்டம் பெத்தநாயக்கன் பாளையம் அருகே இடையப்பட்டி வில்வனூர் மேற்கு காட்டை சேர்ந்த முருகேசன் என்பவர் காவல்துறையினர் தாக்குதலுக்கு ஆளாகி மரணம் அடைந்துள்ள நிலையில் தொடர்புடைய காவல்துறை அதிகாரி கைது செய்யப்பட்டு இருக்கிறார்.
தவறு செய்வோர் தண்டிக்கப்பட வேண்டும் என்பதில் யாருக்கும் மாற்று கருத்து இருக்க முடியாது. எனவே தவறு செய்திருந்தால், தொடர்புடைய நபர்களிடம் உரிய விசாரணை நடத்தி, அதற்கான ஆதாரங்களை திரட்ட வேண்டும். அவர்களை சட்டத்தின் முன்பு நிறுத்தி தண்டனை பெற்றுத்தர வேண்டுமே தவிர, காவல்துறை தாக்குதல் நடத்துவது என்பது ஏற்றுக்கொள்ள கூடியதல்ல.
இது மனித உரிமையை மீறும் செயல். எனவே முதலமைச்சர் இதில் தனிக்கவனம் செலுத்தி, இதுபோன்ற போலீஸ் அத்துமீறல்கள் இனி நடைபெறாவண்ணம் பார்த்துக்கொள்ள வேண்டும். சட்டத்துக்குட்பட்டு செயல்படுமாறு காவல்துறைக்கு அறிவுறுத்த வேண்டும் என தெரிவித்தார்.
ரிப்பன் மாளிகையில் ஆய்வுக்கூட்டம்
சென்னை மாநகராட்சி பகுதிகளில் மேற்கொள்ளப்பட்டு வரும் வளர்ச்சிப்பணிகள் தொடர்பான ஆய்வுக்கூட்டம் ரிப்பன் மாளிகையில் நடந்தது.
கே.என். நேரு தலைமையில் நடந்த இக்கூட்டத்தில், வளர்ச்சிப் பணிகளின் தற்போதைய நிலைக் குறித்து அதிகாரிகளிடம் கேட்டறிந்தார். அத்துடன் பணிகளை விரைவாக முடிக்கவும் உத்தரவிட்டார்.
திருநங்கையர்களுக்கான தமிழ்நாடு அரசின் நலத்திட்ட உதவிகள் வழங்கல்
சென்னை – தியாகராய நகரில், சமூக நலன் மற்றும் மகளிர் உரிமைத்துறை சார்பில், திருநங்கையர்களுக்கான தமிழ்நாடு அரசின் நலத்திட்ட உதவிகளை, நாடாளுமன்ற உறுப்பினர் தமிழச்சி தங்கப்பாண்டியன், உதயநிதி ஸ்டாலின், அமைச்சர்கள் கீதா ஜீவன், பி.கே.சேகர்பாபு மற்றும் மா. சுப்பிரமணியன் ஆகியோர் வழங்கினார்கள்.
இந்தநிகழ்ச்சியில் சென்னைக்குட்பட்ட நாடாளுமன்ற, சட்டமன்ற உறுப்பினர்கள் கலந்துகொண்டனர். இந்நிகழ்வில், சமூக நலன் மற்றும் மகளிர் உரிமைத்துறையின் உயர் அதிகாரிகள் கலந்து கொண்டனர்.