திருவள்ளூர் மாவட்டம் பள்ளிப்பட்டு தாலுகா கோணசமுத்திரம் கிராமத்தில் வசிக்கும் ஏழை மூதாட்டி சியாமளம்மாள் தனது நிலத்தில் ஊராட்சி மன்ற தலைவி தங்கம்மாளின் கணவர் கோவிந்தசாமி ரூ.3 லட்சம் மதிப்புள்ள மண்ணை திருடியது மடடுமின்றி தனது நிலத்திலேயே சாலை அமைத்ததாக திருத்தணி ஆர்.டி.ஓ. சத்யாவிடம் மனு அளித்தார்.
அந்த மனுவில் தான் இது குறித்து பொதட்டூர்பேட்டை காவல் நிலையத்தில் ஆகஸ்டு மாதம் 2-ந்தேதி புகார் மனு அளித்தும் எந்த வித நடவடிக்கையும் எடுக்கவில்லை என்று குறிப்பிட்டிருந்தார். இதுகுறித்து கிடைத்த தகவலில் பொதட்டூர்பேட்டை காவல்துறை துணை ஆய்வாளர் ராக்கி குமாரி கடந்த செப்டம்பர் மாதம் 20-ந் தேதி மண் எடுத்த இடத்தின் உரிமையாளர் யார் என்ற விவரத்தை எழுத்துப்பூர்வமாக தெரிவிக்க கேட்டு பள்ளிப்பட்டு தாசில்தாருக்கு கடிதம் அனுப்பி இருந்தார்.
ஆனால் அங்கிருந்து பொதட்டூர்பேட்டை காவல் நிலையத்திற்கு எந்த வித பதிலும் நேற்று வரை கிடைக்காததால் எந்தவித நடவடிக்கையும் காவல்துறை சார்பில் எடுக்க முடியவில்லை என்பது தெரிகிறது. இதுகுறித்து திருத்தணி ஆர்.டி.ஓ. சத்யாவை தொடர்புகொண்டு கேட்ட போது மண் இருந்த இடம் சாலை அமைத்த இடத்தின் உரிமையாளர் யார் என்று நில அளவை செய்து உடனடியாக பொதட்டூர்பேட்டை காவல் நிலைய துணை ஆய்வாளருக்கு பள்ளிப்பட்டு தாசில்தார் அறிக்கை அனுப்ப ஆவன செய்யப்படும் என தெரிவித்தார்.
