Category: இந்தியா

பிரதமர் மோடி நேற்று முன்தினம் நாடு முழுவதும் 18 வயதுக்கு மேற்பட்டவர்களுக்கு மத்திய அரசு இலவசமாக தடுப்பூசி போடும் என அறிவித்தார். முன்னதாக காங்கிரஸ் மூத்த தலைவர் ராகுல் காந்தி மத்திய அரசையும், பிரதமர் மோடியையும் கோவிட் -19 கையாளும் முறை, தடுப்பூசி கொள்கையிலும் கடுமையாக விமர்சித்து இருந்தார். பொது மக்களுக்கு அதிகளவில் தடுப்பூசி போட்டு இருந்தால், 2-வது அலையால் நாடு இந்தநிலைக்கு மோசமாகி இருக்காது எனவும் அவர் கூறியிருந்தார்.

இந்நிலையில் ராகுல் காந்தியின் விமர்சனங்கள், கருத்துகள் சரியாக உள்ளதா என்பது குறித்து சிவசேனா செய்தி தொடர்பாளர் சஞ்சய் ராவத் எம்.பி.யிடம் கேட்கப்பட்டது. இதற்கு, ராகுல் காந்தி கூறிய பல விஷயங்கள் சரியாக இருந்து உள்ளன. சில அல்ல, அவரது பல கோரிக்கைகளை மத்திய அரசு நிறைவேற்றி உள்ளது. அவர் கோவிட் -19 அல்லது தடுப்பூசி குறித்து பேசியவை உண்மையாகி உள்ளன. அவரது வார்த்தைகளில் வலு உள்ளது என சஞ்சய் ராவத் தெரிவித்தார் .

மகாராஷ்டிரா மாநிலம், விதர்பாவை சேர்ந்த நவீன் பால் கருப்பு பூஞ்சை நோயால் பாதிக்கப்பட்ட முதல் நோயாளி. கடந்தாண்டு செப்டம்பரில் இவருக்கு கோவிட் -19 தொற்று ஏற்பட்டது. மருத்துவமனையில் சிகிச்சை பெற்று குணமாகி வீடு திரும்பினார். பின்னர், அவரது பற்கள் மற்றும் கண்களில் பாதிப்பு ஏற்பட்டது. அப்போதே, இந்த அறிகுறிகள் குறித்து மருத்துவர்களிடம் நவீன் தெரிவித்துள்ளார். அதை அவர்கள் பெரிதாக எடுத்துக் கொள்ளவில்லை.

நாளடைவில் இந்த நோய் அதிகமாகி, இந்தாண்டு பிப்ரவரியில் அவருக்கு ஒரு கண் அகற்றப்பட்டது. பின்னர், 10 நாட்கள் இடைவெளியில் மற்றொரு கண்ணையும் மருத்துவர்கள் அகற்றி உள்ளனர். 6 மருத்துவமனைகளில் அவருக்கு சிகிச்சை அளித்து, முகத்தில் 13 அறுவை சிகிச்சைகள் செய்யப்பட்டு ஒட்டு மொத்த நவீன் இதுவரையில் ரூ.1.5 கோடி செலவு செய்துள்ளார்.

டெல்லியில், ரேஷன் பொருட்களை வீடு தேடிச்சென்று வழங்கும் திட்டத்தை மாநில அரசு அறிவித்து இருந்தது. ஆனால், அத்திட்டத்தை கவர்னர் நேற்று முன்தினம் நிராகரித்தார். மத்திய அரசின் ஒப்புதலை பெறவில்லை என்றும், திட்டத்துக்கு எதிரான வழக்கு ஐகோர்ட்டில் நிலுவையில் இருப்பதாகவும் அவர் கூறினார்.

இந்நிலையில் இதற்கு கண்டனம் தெரிவித்து முதலமைச்சர் அரவிந்த் கெஜ்ரிவால் செய்தியாளர்களிடம் பேசுகையில், ரேஷன் பொருட்களை வீட்டுக்கே சென்று வழங்கும் திட்டத்துக்கு மத்திய அரசின் ஒப்புதலை பெற தேவையில்லை. ஏதேனும் சர்ச்சை எழக்கூடாது என்பதால்தான், மத்திய அரசிடம் அனுமதி கேட்டோம். அப்படி இருந்தும் டெல்லியில் இத்திட்டத்தை நிறுத்தியது ஏன்? ரேஷன் கடைகள், கோவிட் -19 யை பரப்பும் இடங்களாக மாறிவிடக்கூடாது.

ஆகவே, டெல்லியில் மட்டுமின்றி நாடு முழுவதும் இத்திட்டத்தை அமல்படுத்த வேண்டும். பீட்சா, பர்கர், ஸ்மார்ட்போன், ஆடைகள் போன்றவற்றை வீடு தேடிச்சென்று கொடுக்கும்போது, ரேஷன் பொருட்களை வீடு தேடிச்சென்று கொடுக்கக்கூடாதா? இதனால், டெல்லியில் 72 லட்சம் பேர் பலன் அடைவார்கள். ரேஷன் மாபியாவையும் ஒழிக்க முடியும்.

மேற்கு வங்காளம், மராட்டியம், ஜார்கண்ட், டெல்லி என மாநில அரசுகளுடனும், விவசாயிகளுடனும், லட்சத்தீவு மக்களுடனும் மத்திய அரசு மோதி வருகிறது. இதனால் மக்கள் கவலை அடைந்துள்ளனர். இப்படி இருந்தால், கோவிட் -19 யை எப்படி வீழ்த்த முடியும்? என கேள்வி எழுப்பினர்.

சுவேந்து அதிகாரியின்  நெருங்கிய உதவியாளரை மோசடி வழக்கில் கொல்கத்தா காவல்துறை நேற்று கைது செய்த நிலையில் கொல்கத்தாவில் இருந்து 150 கி.மீட்டர் தொலைவில் உள்ள மெதினிபூர் மாவட்டத்தின்  உள்ள கந்தி நகராட்சி அலுவலகத்தில் இருந்து நிவாரண பொருட்களை திருடியதாக சுவேந்து அதிகாரி மற்றும் அவரது சகோதரர் மீது காவல்துறை வழக்குப்பதிவு செய்துள்ளார்.

கர்நாடக காங்கிரஸ் தலைவர் டி.கே.சிவக்குமார் பெங்களூருவில் நிருபர்களிடம் பேசுகையில், கர்நாடகத்தில் கோவிட் -19 தடுப்பூசி போடும் பணி மந்தகதியில் நடந்து வருகிறது. நாங்கள் ரூ.100 கோடியில் தடுப்பூசி போட திட்டமிட்டுள்ளோம். இதற்கு அரசு அனுமதி வழங்கினால் அனைத்து தரப்பு மக்களுக்கும் இலவசமாக தடுப்பூசி போடுவோம். மக்களின் உயிர்களை காக்க எங்கள் கட்சி தலைவர்கள் சக்தி மீறி பணியாற்றி வருகிறார்கள்.

தடுப்பூசி வழங்குவதுடன் பல்வேறு பிரிவுகளை சேர்ந்த ஏழை மக்களுக்கு உணவு தானிய தொகுப்புகளையும் வழங்கி வருகிறோம். கோவிட் -19 வைரஸ் பரவலை தடுப்பதில் மத்திய-மாநில அரசுகள் முழுமையாக தோல்வி அடைந்துவிட்டன. இத்தகைய நெருக்கடியான நேரத்திலும் மக்களை ஏமாற்றும் பொருட்டு, தடுப்பூசிகளை தலா ரூ.900-க்கு விற்பனை செய்கிறார்கள்.

ஆனால் போஸ்டர்களில் பா.ஜனதாவினர் தங்களின் புகைப்படங்களை போட்டுக் கொண்டு மின்னுகிறார்கள். ஆனால் எங்கள் கட்சி தலைவர்கள் பொதுமக்களுக்கு இலவசமாக தடுப்பூசி கிடைக்க சிறப்பு முகாம்களை ஏற்பாடு செய்கிறார்கள். கர்நாடகத்தில் பா.ஜனதா ஆட்சியின் இறுதி நாட்கள் நெருங்குகின்றன என டி.கே.சிவக்குமார் தெரிவித்தார்.

மம்தா பானர்ஜி தலைமையில் திரிணமூல் காங்கிரஸ் கட்சி நிர்வாகிகள் கூட்டம் கொல்கத்தாவில் நேற்று நடை பெற்றது. இந்தக் கூட்டத்துக்கு பிறகு மூத்த தலைவர் பார்த்தா சாட்டர்ஜி செய்தியாளர்களிடம் பேசுகையில், “ஒருவருக்கு ஒருபதவி கொள்கையை பின்பற்ற கூட்டத்தில் முடிவு செய்யப்பட்டது. எனவே கட்சியில் நிர்வாகிகள் பட்டியலில் மாற்றம் மேற்கொள்ளப்படும். கட்சியின் இளைஞரணி தலைவர் அபிஷேக் பானர்ஜியை, தேசிய பொதுச் செயலாளராக மம்தா பானர்ஜி நியமித்துள்ளார்.

அபிஷேக் பானர்ஜி, டைமண்ட் ஹார்பர் தொகுதியில் இருந்து 2-வது முறை எம்.பி.யாக தேர்வு செய்யப்பட்டுள்ளார். அவர் இது வரை வகித்த இளைஞரணி தலைவர் பதவிக்கு, நடிகராக இருந்து அரசியல்வாதியாக மாறிய சயோனி கோஷ் நியமிக்கப்பட் டுள்ளார். இதுபோல் பத்திரிகையாளர் குணால் கோஷ், மாநிலச்செயலாளராக நியமிக்கப்பட் டுள்ளார் என தெரிவித்தார்.

மகாராஷ்டிர முதலமைச்சர் உத்தவ் தாக்கரே இணைய வழியாக பத்திரிகையாளர்களுக்கு பேட்டியளித்த்தார். அப்போது, கோவிட் -19 காலத்தில் உயிர்களை காப்பாற்றுவது தான் முக்கியம். மகாராஷ்டிர மாநிலம் கோவிட் -19 னால் கடுமையான பாதிப்பை சந்தித்து தற்போது மீண்டு வருகிறது. மக்களை கோவிட் -19 ல் இருந்து காப்பாற்ற நாங்கள் பாடுபட்டுக் கொண்டிருக்கிறோம்.

ஆனால் சில கட்சிகள் இந்த கோவிட் -19 காலத்திலும் அதிகாரத்திற்கு வர நினைக்கிறார்கள். இந்த அரசுக்கு நெருக்கடி கொடுத்து ஆட்சியை கவிழ்க்க வேண்டும் என செயலாற்றுகிறார்கள். ஆனால் அவர்கள் எண்ணம் ஈடேறப்போவதில்லை. மக்கள் அவர்களை ஒருபோதும் மன்னிக்கமாட்டார்கள். இந்த கோவிட் -19 காலத்திலும் கூட அதிகார வெறிப்பிடித்து அலைவது, சட்ட ஒழுங்கை பாதிக்க வழிவகுக்கும். முதலமைச்சராக வேண்டும் என்பது எப்போதும் எனது இலக்காக இருந்து இல்லை.
சிவசேனாவை சேர்ந்த தொண்டனை முதலமைச்சராக்குவேன் என எனது தந்தைக்கு செய்து கொடுத்த சத்தியத்தை நான் இன்னும் நிறைவேற்றவில்லை. நான் அரசியலில் ஈடுபாடு கொண்டு வரவில்லை. தந்தைக்கு உதவியாக இருக்கவே அரசியலுக்கு வந்தேன். எனது ஆட்சியின் போது நோய் தொற்று ஏற்பட்டுள்ளது. பொறுப்புகளை விட்டு நான் ஓடியது கிடையாது. முதலமைச்சராக என்னால் செய்ய முடிந்ததை செய்து கொண்டு இருக்கிறேன் என தெரிவித்தார்.

மத்திய அரசின் புதிய வேளாண் சட்டங்களுக்கு எதிராக டெல்லியில் விவசாயிகள் கடந்த ஆண்டு நவம்பர் 26 முதல் போராடி வருகின்றனர். கடும் குளிர், வெயில், கொரோனா தொற்றுக்கு மத்தியிலும் 6 மாதங்களுக்கும் மேலாக அவர்களது போராட்டம் தொடர்ந்து வருகிறது.

இந்நிலையில் நேற்று விவசாயிகள் கூட்டத்தில் பேசிய பாரதிய கிசான் யூனியன் தலைவர் ராகேஷ் டிக்கைட், மத்திய அரசு இந்த போராட்டத்தை டெல்லியில் இருந்து அரியானாவுக்கு மாற்ற முயற்சிக்கிறது. ஆனால் இதனை நாங்கள் அனுமதிக்கமாட்டோம். அரசு அதனுடைய சூழ்ச்சியில் வெற்றிபெற விடமாட்டோம். புதிய வேளாண் சட்டங்கள் ரத்து செய்யப்படும் வரை நாங்கள் டெல்லியை விட்டு வெளியேற மாட்டோம் என்று கூறியுள்ளார்.

மத்திய பிரதேசத்தில் கோவிட் -19 சிகிச்சை அளிக்கும் பணியில் ஈடுபட்டு வரும் இளநிலை பயிற்சி மருத்துவர்களுடன் சேர்ந்து, மூத்த பயிற்சி மருத்துவர்களும் அரசுக்கு எதிரான போராட்டத்தில் ஈடுபட்டுள்ளனர்.