நாமக்கல் மாவட்ட ஆட்சியர் அலுவலகத்தில் தமிழக மக்கள் நல்வாழ்வுத்துறை அமைச்சர் மா.சுப்பிரமணியன் நேற்று கோவிட் -19 தடுப்பு நடவடிக்கைள் குறித்து ஆய்வு மேற்கொண்டார். பின்னர் செய்தியாளர்களிடம் பேசுகையில், முதலமைச்சர் மு.க.ஸ்டாலினின் தீவிர நடவடிக்கையால் நாமக்கல் மாவட்டத்தில் தினந்தோறும் கோவிட் -19 பாதிப்பு குறைந்து வருகிறது. இதே நிலைதான் தமிழகம் முழுவதும் உள்ளது.
கோவிட் -19 னால் பாதிக்கப்படும் குழந்தைகளுக்கு சிகிச்சை அளிக்க தமிழகம் முழுவதும் அரசு மருத்துவமனைகளில் தனிவார்டு தொடங்க முதலமைச்சர் அறிவுறுத்தி உள்ளார். அதன் அடிப்படையில் நாமக்கல் அரசு மருத்துவமனையில் 10 படுக்கைகள் கொண்ட சிறப்பு வார்டை நான் தொடங்கி வைத்து உள்ளேன். இங்கு பிறந்த பச்சிளம் குழந்தைகளுக்கு பாதிப்பு ஏற்பட்டாலும் சிகிச்சை அளிக்கும் வகையில் 2 படுக்கைகள் கொண்ட வார்டும் தொடங்கப்பட்டு உள்ளது.
கோவிட் -19 தடுப்பூசி வாங்க உலகளாவிய டெண்டர் விடப்பட்டது. அதில் யாரும் பங்கேற்காத நிலையில், அடுத்து என்ன செய்வது என்பதை முதலமைச்சர் முடிவு செய்வார். நீலகிரி மாவட்டம் குன்னூரில் 1907-ம் ஆண்டு தொடங்கப்பட்ட தடுப்பூசி தயாரிப்பு நிறுவனம் உள்ளது. இந்த நிறுவனத்தில் முதலில் வெறிநாய் கடிக்கு மட்டுமே தடுப்பூசி தயாரிக்கப்பட்டது. இந்த தடுப்பூசி நிறுவனம் மத்திய அரசின் சுகாதாரத்துறை கட்டுப்பாட்டில் இயங்கி வருகிறது. கடந்த 2013-ம் ஆண்டு தி.மு.க. நிர்வாகிகள் மத்திய அமைச்சரவையில் இடம்பெற்று இருந்தபோது, இந்த நிறுவனத்தை மேம்படுத்த ரூ.137 கோடி நிதிபெற்று கொடுத்தனர்.
அந்த பணிகள் 2019-ம் ஆண்டே முடிவுற்று அந்த நிறுவனம் தடுப்பூசி தயாரிக்க தயார் நிலையில் உள்ளது. இந்த நிறுவனத்தில் நானும், சுகாதாரத்துறை செயலாளரும் ஆய்வு செய்தோம். கோவிட் -19 தடுப்பூசிக்கான மூலப்பொருட்களை மத்திய அரசு கொடுத்தால் அங்கு மாதம் ஒன்றுக்கு 1 கோடி தடுப்பூசிகளை தயாரிக்க முடியும். இதற்கு மத்திய அரசு உரிய அனுமதி தர வேண்டும் என தெரிவித்தார்.
