நாமக்கல் குமாரபாளையம் தபஸ்வினி இந்திய ஃபிஸ்ட் பால் ஜூனியர் அணி வீராங்கனை ஆஸ்த்ரியாவில் நடக்கும் போட்டியில் பங்கேற்க நிதியுதவி செய்யுமாறு உதயநிதி ஸ்டாலின் கோயம்புத்தூர் பயணத்தின்போது சந்தித்து கோரிக்கை வைத்திருந்தார். தபஸ்வினியின் கோரிக்கை ஏற்று நேற்று உதயநிதி ஸ்டாலின் ரூ.1.70 லட்சம் நிதியுதவி வழங்கினார்.
சென்னை, பெசண்ட் நகர், திருவான்மியூர் – குப்பம், திருவீதி அம்மன் கோவில் தெரு, திருவள்ளுவர் நகர் ஆகிய பகுதிகளில், கோவிட் -19 சிறப்பு நிவாரண இரண்டாம் தவணை உதவித்தொகை ரூ.2000 மற்றும் 14 மளிகைப் பொருட்கள் அடங்கிய தொகுப்பு வழங்கும் நிகழ்ச்சியை நேற்று நாடாளுமன்ற உறுப்பினர் தமிழச்சி தங்கப்பாண்டியன் தொடங்கி வைத்தார்.
இந்தநிகழ்ச்சியில், பகுதிச் செயலாளர் திரு.துரைகபிலன், வட்டச் செயலாளர்கள், திரு.ராஜு, திரு.ஜெய்குமார், திரு.ராஜாராமன், திரு.கணேஷ்குமார், கழக நிர்வாகிகள், முன்னணியினர் கலந்துகொண்டனர்.
சென்னை – நந்தனத்தில், வெளி மாநிலத் தொழிலாளர்களுக்கு உணவுப்பொருட்கள் வழங்குதல் மற்றும் கட்டிடத் தொழிலாளர்களுக்கு, தடுப்பூசி செலுத்தும் பணியினை, தமிழ்நாடு முதலமைச்சர் ஸ்டாலின் அவர்கள் தொடங்கி வைத்த நிகழ்வில் தமிழச்சி தங்கப்பாண்டியன் கலந்துகொண்டார்.
உலகையே இன்று கொரோனா ஆட்டிப்படைத்து கொண்டுள்ள நிலையில், கொரோனாவுக்கு எதிரான ஒரே பேராயுதம் தடுப்பூசிதான் என்பது அனைத்து மருத்துவ நிபுணர்களும் ஒத்துக்கொண்ட உண்மை. அதனால்தான் விரைவாகவும், அதிகபட்ச பேருக்கும் தடுப்பூசி போடுவதில் மத்திய, மாநில அரசுகள் ஆர்வம் காட்டுகின்றன.
அதன்வரிசையில் தமிழச்சி தங்கப்பாண்டியன் முன்னிலையில் சைதாபேட்டையிலுள்ள அன்னபூரணி அம்மாள் பள்ளி வளாகத்தில் ன் தடுப்பூசி முகாம்” அமைச்சர் ம. சுப்பிரமணியன் அவர்கள் துவக்கி வைத்தார்.
கோயம்புத்தூர் கிழக்கு மாவட்ட திமுக சார்பாக அனைத்து ஒன்றிய பகுதி பேரூர் கழக நிர்வாகிகளுடன் கோயம்புத்தூர் மாவட்ட ஆட்சியர் அவர்களை சந்தித்து கோயம்புத்தூர் கிழக்கு மாவட்டத்திற்கு உட்பட்ட கிணத்துக்கடவு மற்றும் சூலூர் சட்டமன்ற தொகுதிகளில் மக்கள் அடர்த்தி அதிகம் உள்ள பகுதிகளில் கூடுதலான தடுப்பூசி மையங்களை அமைத்து தருமாறு மாவட்ட ஆட்சியரிடம் கோரிக்கை மனு கிழக்கு மாவட்ட பொறுப்பாளர் மருதமலை சேனாதிபதி தலைமையில் வழங்கப்பட்டது.
சென்னை சத்தியமூர்த்தி பவனில், காங்கிரஸ் சட்டமன்ற உறுப்பினர்கள் கூட்டம் நடைபெற்றது. அதில் காங்கிரஸ் மாநிலத் தலைவர் கே.எஸ்.அழகிரி பங்கேற்றார். அதன்பின் செய்தியாளர்களிடம் பேசுகையில், கவர்னர் உரை மூலம், தமிழகத்தில் புதிய வெளிச்சம் பாய்ச்சி இருப்பதாகவும், பொருளாதார வளர்ச்சி மேம்படும் என்றும் கூறினார்.
வரியை எதில் குறைப்பது, எதில் வரியை கூட்டுவது, எப்படி மாநில அரசின் பொருளாதாரத்தை மேம்படுத்துவது என்பதற்காக தான் ரகுராம் ராஜன் போன்ற மிகச் சிறந்த பொருளாதார மேதைகளை இந்த ஆய்வு குழுவில் சேர்த்துள்ளார்கள். வாக்குறுதிகளை நிறைவேற்ற திமுக அரசுக்கு மூச்சுவிட நேரம் வழங்க வேண்டும். திமுக அரசுக்கு கால அவகாசம் கொடுங்கள், நம்பிக்கையோடு இருங்கள் நிச்சயம் நல்லாட்சி தருவார்கள் என தெரிவித்தார்.
தமிழகத்தில் நடந்து முடிந்த 16-வது சட்டசபை தேர்தலில் தி.மு.க. அறுதி பெரும்பான்மையுடன் வெற்றி பெற்று ஆட்சி அமைத்தது. இந்நிலையில், புதிய சட்டசபையின் முதல் கூட்டம் சென்னை கலைவாணர் அரங்கத்தில் நேற்று நடைபெற்றது. அதில் கவர்னர் பன்வாரிலால் புரோகித் உரையாற்றினார். முதலில் சில வார்த்தைகள் தமிழில் பேசினார். அப்போது, “காலை வணக்கம். எளிமையான வாழ்க்கை வாழுங்கள். அது ஊழலை அகற்றிவிடும். இது எனது செய்தி. தமிழ் இனிமையான மொழி” என்றார்.
மேலும் அவரது உரையில் வேளாண்மைக்கு தனி பட்ஜெட் போடப்படும், உழவர் சந்தைக்கு புத்துயிர், அரசு வேலை வாய்ப்பில் தமிழில் படித்தவர்களுக்கு முன்னுரிமை போன்ற முக்கிய சிறப்பம்சங்கள் இடம்பெற்றன. தமிழக சட்டசபை கூட்டத்தொடர் வரும் 24ஆம் தேதி வரை 3 நாட்கள் நடத்த அலுவல் ஆய்வுக்குழு கூட்டத்தில் முடிவு செய்துள்ளது. இந்நிலையில், தமிழக சட்டசபை கூட்டத் தொடரின், 2 வது நாளான சட்டசபை கூட்டம் தொடங்கியது.
நடிகர் விவேக், எழுத்தாளர் கி.ராஜநாராயணன், துளசி அய்யா வாண்டையார், காளியண்ணன் மறைவுக்கு இரங்கல் தீர்மானங்கள் நிறைவேற்றப்பட்டது. எம்.எல்.ஏக்கள் அன்பழகன், ராமகிருஷ்ணன், உதயசூரியன், எஸ்.ஆர்.ராஜா, டி.ஆர்.பி.ராஜா ஆகியோரை சட்டப்பேரவையின் மாற்றுத்தலைவர்களாக அறிவித்தார் சபாநாயர் அப்பாவு! சட்டமன்றத்தில் கவர்னர் உரைக்கு நன்றி தெரிவிக்கும் தீர்மானத்தை முன்மொழிந்தார்.
கோயம்புத்தூர் மாவட்டம், பொள்ளாச்சி நெகமம் அருகே உள்ள மெட்டுவாவி பகுதியில் கும்பல் பணம் வைத்து சூதாட்டத்தில் ஈடுபடுவதாக நெகமம் காவல்துறைக்கு தகவல் கிடைத்தது. இதையடுத்து, அங்கு சென்ற சிறப்பு துணை ஆய்வாளர்., ஏசு பாலன் சூதாட்டம் நடப்பதை உறுதி செய்தார். தொடர்ந்து சூதாட்டத்தில் ஈடுபட்டவர்கள் மீது வழக்கு பதியாமல் இருக்க அவர்களிடம், ரூ.7,000 பணம் பெற்றுள்ளார்.
இது குறித்து காவல் கண்காணிப்பாளரிடம் புகார் தெரிவிக்கப்பட்டது. காவல் கண்காணிப்பாளர் உத்தரவையடுத்து, நெகமம் காவல் ஆய்வாளர் வெற்றிவேல் ராஜன் விசாரித்தார். இதில், ஏசு பாலன் பணம் பெற்றது உறுதியானது. இதையடுத்து, ரூரல் எஸ்.பி., செல்வநாகரத்தினம், எஸ்.எஸ்.ஐ., ஏசுபாலனை சஸ்பெண்ட் செய்து உத்தரவிட்டார்.
ஊரடங்கு அமலில் இருப்பதால் ஆட்சியர் அலுவலகத்தில் திங்கட்கிழமை தோறும் நடைபெறும் பொதுமக்கள் குறைதீர்க்கும் கூட்டம் தற்காலிகமாக ரத்து செய்யப்பட்டுள்ளது. ஆனாலும் பொதுமக்கள் கோரிக்கை மனுக்களை போடுவதற்காக ஆட்சியர் அலுவலகத்தில் ஒரு பெட்டி வைக்கப்பட்டுள்ளது. அதன்படி நேற்று ஆட்சியர் அலுவலகத்துக்கு வந்த பொதுமக்கள் அந்த பெட்டியில் கோரிக்கை மனுக்களை போட்டு சென்றனர்.
இந்நிலையில் பழனியை அடுத்த ஆண்டிப்பட்டியை சேர்ந்த நெசவு தொழிலாளியான எல்லத்துரை என்பவர் தனது மனைவியுடன் ஆட்சியர் அலுவலகம் வந்தார். அவர்களின் கைகளில் தறி மற்றும் ராட்டை இருந்தது. இதையடுத்து அவர்களிடம் காவல்துறை விசாரணை நடத்தினர். அப்போது ஆண்டிப்பட்டி பகுதியில் அரசு புறம்போக்கு நிலத்தில் குடிசை அமைக்க முயன்ற போது அந்த பகுதியில் இருந்தவர்களுடன் பிரச்சினை ஏற்பட்டது.
இதுதொடர்பான விசாரணைக்கு வந்த காவல்துறை துணை ஆய்வாளர் எங்களுக்கு வாழ்வாதாரமாக இருந்த தறி, ராட்டையை சேதப்படுத்திவிட்டார். அவர் மீது உரிய நடவடிக்கை எடுக்க வேண்டும் என்று ஆட்சியரிடம் மனு கொடுக்க வந்ததாக தெரிவித்தனர்.
திருப்பூர் மாவட்டம், வேடப்பட்டியை சேர்ந்த பொதுமக்கள் மடத்துக்குளம் தாசில்தாரிடம் கொடுத்துள்ள அந்த மனுவில், வேடபட்டியிலுள்ள கல் குவாரியில் அதிக சக்தி வாய்ந்த வெடி பொருட்களைப் பயன்படுத்தி பாறைகள் உடைக்கப்படுகிறது. இவ்வாறு உடைத்த கற்களை கனரக வாகனங்களில் ஏற்றி இரவு பகல் இடைவெளியின்றி வெளியே கொண்டு செல்கின்றனர்.
இதனால் இரவு நேரங்களில் நிம்மதியாக தூங்க முடிவதில்லை. மேலும் இந்த கல் குவாரி அரசு சட்ட விதிகளை பின்பற்றாமல் செயல்பட்டு வருகிறது. இந்த குவாரியில் சக்தி வாய்ந்த வெடிகளை வெடிக்க செய்வதால் அதிர்வு ஏற்பட்டு வீடுகளின் சுவர்களில் விரிசல் ஏற்படுவதுடன் ஓடுகள் உடைந்து சேதமடைகிறது. எனவே தினம் தினம் பயந்து பயந்து வாழ்க்கை நடத்தவேண்டிய நிலை உள்ளது. இதனால் இதய நோயாளிகள், ரத்த அழுத்த நோயாளிகள், முதியவர்கள், குழந்தைகள் மற்றும் கர்ப்பிணிகள் பாதிக்கப்படுகிறார்கள்.
இங்கு அதிக ஆழத்தில் வெடிகள் வெடிக்கப்படுவதால் நிலத்தடி நீர்மட்டம் பாதிக்கப்படுகிறது. சுற்றுவட்டாரத்தில் உள்ள விவசாயக் கிணறுகள், ஆழ்துளைக் கிணறுகள், பொதுமக்களுக்கு குடிநீர் வினியோகிக்கப் பயன்படும் ஆழ்துளைக் கிணறுகளில் நீர்மட்டம் குறைந்து வறண்டு விடுகிறது. இதனால் தண்ணீர் தேவைக்கு அவதிப்படும் நிலைக்கு தள்ளப்பட்டுள்ளோம்.அத்துடன் கல் குவாரியிலிருந்து வெளியேறும் வெடிபொருட்களின் நச்சுக்களும், பாறைக் கழிவுகளும் விவசாயப் பயிர்களில் படிந்து மலட்டுத் தன்மை ஏற்படுவதால் மகசூல் இழப்பை ஏற்படுத்தி விவசாயிகளுக்கு கடும் பாதிப்பை உண்டாக்கி வருகிறது.
இதுகுறித்து சம்பந்தப்பட்ட அதிகாரிகளுக்கு பல முறை முறையிட்டும் எந்த நடவடிக்கையும் எடுக்கவில்லை.எனவே அரசு சட்ட விதிகளுக்குப் புறம்பாக செயல்பட்டு வரும் கல்குவாரியின் உரிமத்தை ரத்து செய்யவும், பொதுமக்களுக்கும், விவசாயிகளுக்கும் இடையூறு விளைவிக்கும் வகையில் செயல்பட்டு வரும் கல் குவாரி உரிமையாளர் மீது நடவடிக்கை எடுக்கவும் வேண்டும் என தெவிரித்துள்ளனர்.
