மார்க்சிஸ்ட் கம்யூனிஸ்ட் கட்சியின் புதுக்கோட்டை மாவட்டத்தில் முதல் பெண் ஒன்றியச் செயலாளர் தேர்வு செய்யப்பட்டுள்ளார். புதுக்கோட்டை மாவட்டத்தில் 19 ஒன்றியங்களாக பிரிக்கப்பட்டு சுமார் 458 கிளைகள் மார்க்சிஸ்ட் கம்யூனிஸ்ட் கட்சியில் உள்ளன. நிகழாண்டு கட்சி மாநாடு தற்போது நடைபெற்று வருகிறது. இதையொட்டி, கிளை மாநாடுகள் முடிந்து, பல்வேறு இடங்களில் ஒன்றிய மாநாடு நடத்தப்பட்டு வருகிறது. அதன் அடிப்படையில், அண்மையில் நடைபெற்று முடிந்த திருமயம் ஒன்றிய மாநாட்டில் மாவட்டத்தின் முதல் பெண் ஒன்றியச் செயலாளராக ஜெ.வைகைராணி தேர்வு செய்யப்பட்டுள்ளார்.
இதுகுறித்து ஜெ.வைகைராணி பேசுகையில், “கம்யூனிஸ்ட் குடும்பத்தில் பிறந்த எனக்கு சிறுவயதிலிருந்தே மார்க்சிஸ்ட் கம்யூனிஸ்ட் கட்சியின் மீது ஈடுபாடு உண்டு. ஜனநாயக வாலிபர் சங்கம், மாதர் சங்கத்தில் பணியாற்றியதோடு, கட்சியில் ஒன்றியக் குழு உறுப்பினராக இருந்தேன். இப்போது திருமயம் ஒன்றிய மாநாட்டில் தேர்தல் மூலம் ஒன்றியச் செயலாளராக வெற்றி பெற்றுள்ளேன். இதன் மூலம் மாவட்டத்தில் பெயர் சொல்லும் அளவுக்கு இந்த ஒன்றியத்தில் கட்சியை வளர்ப்பதோடு, ஏழை, எளியோரின் வாழ்க்கைத் தரத்தையும் உயர்த்தப் பாடுபடுவேன்” என ஜெ.வைகைராணி தெரிவித்தார்.