ஓட்டேரி காவல் நிலையத்தில் தலைமைக் காவலராக பணியாற்றுபவர் கோதண்டபாணி ஆவடியில் உள்ள காவலர் குடியிருப்பில் குடும்பத்துடன் வசிக்கிறார். இவர் தனது 10 வயது மகள் பிரதிக்ஷாவுடன் டிஜிபி அலுவலகம் வந்தார். காவல் சீருடையுடன் கையில் தேசியக் கொடியை பிடித்தபடி வந்த அவர் திடீரென மகளுடன் சாலையில் அமர்ந்து தர்ணாவில் ஈடுபட்டார்.
அப்போது, எனது மகளுக்கு 3 வயது இருக்கும்போது சிறுநீரக பிரச்சினை ஏற்பட்டு எழும்பூரில் குழந்தைகள் நல மருத்துவமனையில் மகளைச் சேர்த்து மருத்துவர்கள் பரிந்துரைத்த மாத்திரைகளை 5 ஆண்டுகளாக மகளுக்கு தொடர்ந்து கொடுத்தேன். இந்த மாத்திரைகளின் எதிர்விளைவு காரணமாக எனது மகளுக்கு வலதுகால் பாதத்தில் அரிப்பு ஏற்பட்டது.
இதையடுத்து அதே மருத்துவமனையில் மீண்டும் சேர்த்தேன். மீண்டும் மருத்துவர்கள் நோயை சரியாகக் கண்டறியாமல் சிகிச்சை அளித்தனர். இதனால், மகளின் வலது கால் பாதம் சூம்பிப்போனது. மேலும் உடலில் பல்வேறு பிரச்சினைகளும் ஏற்பட்டன. மருத்துவர்களின் அலட்சியப் போக்கு, மெத்தனமே இதற்கு காரணம்.
சிறுநீரக பிரச்சனை காரணமாக சென்னை எழும்பூர் குழந்தைகள் நல மருத்துவமனையில் தனது 10 வயது மகள் சிகிச்சை பெற்றுவந்த நிலையில் மருத்துவமனை நிர்வாகத்தின் தவறான சிகிச்சை காரணமாக மகளின் கால் பாதிக்கப்பட்டதாக ஏப்ரல் மாதம் தலைமைச் செயலகம் முன்பு ஓட்டேரி காவல் நிலையத்தைச் சேர்ந்த தலைமைக் காவலர் கோதண்டபாணி என்பவர் சாலை மறியலில் ஈடுபட்டார்.
அப்போது தேசிய குழந்தைகள் ஆணையம் சார்பில் விசாரணை நடத்தப்பட்டது. அதன் பிறகு நான்கு மாதங்களுக்கு பிறகு தற்போது அவருடைய மகளுக்கு மாற்றுத்திறனாளி சான்றிதழ் வழங்குவதாக குழந்தைகள் நல ஆணையம் தெரிவித்துள்ளது. ஆனால் தனக்கு மருத்துவமனை நிர்வாகம் தவறான சிகிச்சை அளித்தது குறித்து எந்த ஒரு விளக்கமும் இதுவரை கொடுக்கவில்லை. அந்த விளக்கம்தான் தனக்கு வேண்டுமே தவிர மாற்றுத்திறனாளிகள் சான்றிதழ் தேவையில்லை எனக் கூறி காமராஜர் சாலையில் டிஜிபி அலுவலகம் முன்பு இன்று மகளுடன் தர்ணாவில் ஈடுபட்டுள்ளார்.