அரியலூர் மாவட்ட ஆட்சியர் அலுவலகங்களில் நேற்று மீண்டும் குறைதீர் கூட்டம் நடைபெற்றது. அதில் அரியலூர் மாவட்டம் எருத்துக்காரன்பட்டி ஊராட்சியில் ஆர்.சி. நிர்மலா காந்தி நடுநிலைப் பள்ளியில் ஆறாம் வகுப்பு பயின்று வரும் இளந்தென்றல் என்ற மாணவி பள்ளி அருகே இயங்கி வரும் டாஸ்மாக் கடையை அகற்ற கோரி மனு அளித்தார். அந்த மனுவில் சுமார் 500க்கும் மேற்பட்ட மாணவ, மாணவிகள் படித்து வரும் அரசு உதவி பள்ளிக்கு அருகிலேயே டாஸ்மாக் மது கடை செயல்பட்டு வருகிறது. மேலும் இரவு நேரங்களில் மர்ம நபர்கள் மது பாட்டில்களை குடித்துவிட்டு பள்ளியில் உள்ளே தூக்கி எறிந்து விடுகின்றனர்.
இதனால் பாட்டிலில் உடைந்து காணப்படுவதாகவும் மதுக்கடை அருகே அமர்ந்து குடிப்பதாலும் கூட்டமாக நிற்பதாலும் அடிக்கடி சண்டை நிகழ்வதாகவும் பள்ளி வந்து செல்வதற்கு அச்சப்படும் சூழ்நிலை உள்ளதாகவும் மேலும் வரும் 1ஆம் தேதி பள்ளிகள் திறக்கப்பட உள்ளதால் மதுக் கடைகளை அகற்றி மாணவர்கள் அச்சமின்றி பள்ளிக்கு வரவும் படிக்கும் சூழ்நிலையை ஏற்படுத்தி தருமாறு மாவட்ட ஆட்சியரிடம் அப்பள்ளியில் ஆறாவது படிக்கும் மாணவி இளந்தென்றல் மற்றும் அவரது சகோதரர் மனு அளித்தனர்.