பூந்தமல்லி அருகே ‘செயின்ட் ஜான்ஸ் இன்டர்நேஷனல் ரெசிடென்சி’ பள்ளி ஆக்கிரமிப்பில் இருந்த ரூ.500 கோடி மதிப்பு அரசு நிலம் மீட்கப்பட்டு பள்ளி வளாகம் முழுவதையும் சீல் வைக்கப்பட்டது.
பூந்தமல்லி அடுத்த செம்பரம்பாக்கம் ஊராட்சிக்கு உட்பட்ட பழஞ்சூர் பகுதியில் ‘செயின்ட் ஜான்ஸ் இன்டர்நேஷனல் ரெசிடென்சி ‘ சர்வதேச உண்டு உறைவிட பள்ளி செயல்பட்டு வந்தது. சென்னை அடுத்த, பூந்தமல்லி ஒன்றியம் செம்பரம்பாக்கம் ஊராட்சி பழஞ்சூரில், சென்னை-பெங்களூரு தேசிய நெடுஞ்சாலையோரம், அரசுக்கு சொந்தமான புஞ்சை அனாதீனம் நிலம் 25 ஏக்கர் உள்ளது. இதில் சர்வே எண்: 371/1ல் 5 ஏக்கர் நிலத்தை, செயின்ட் ஜான்ஸ் கல்வி அறக்கட்டளை, 1993 முதல் 2013-ஆம் ஆண்டு வரை, 20 ஆண்டு குத்தகைக்கு பெற்றது.
குத்தகையாக பெற்ற நிலத்தில் ‘செயின்ட் ஜான்ஸ் இன்டர்நேஷனல் ரெசிடென்சி ‘ பள்ளியை துவக்கியது. பல மாநிலங்களில் இருந்து 1,000 க்கும் மேற்பட்ட மாணவ – மாணவியர் இங்குள்ள விடுதிகளில் தங்கி பயின்று வந்தனர். இந்நிலையில், கொரோனா பெருந்தொற்று பரவல் காரணமாக, பள்ளி மூடப்பட்டது. மாணவர்கள், வெளி மாநிலங்களைச் சேர்ந்தோர் என்பதால், இப்பள்ளியில் மீண்டும் பயில தயக்கம் காட்டினர்.
அதேசமயம், குத்தகை தொகை 23 கோடி ரூபாய் நிலுவை இருப்பதும், குத்தகை காலம் முடிந்ததும், மாவட்ட வருவாய் துறையினருக்கு தெரியவந்தது. இதையடுத்து விதிமுறைகளை மீறி அதனை சுற்றியுள்ள சுமார் 20 ஏக்கர் இடம் என மொத்தம் 25 ஏக்கர் நிலத்தை தனியார் பள்ளி ஆக்கிரமிப்பு செய்து செயல்பட்டு வந்தது கண்டு பிடிக்கப்பட்டது. இந்நிலையில் அரசு நிலத்தையும் அதிக அளவில் ஆக்கிரமிப்பு செய்து தெரியவந்தது. இதுகுறித்து வருவாய் துறை அதிகாரிகள் நீதிமன்றத்தில் வழக்கு தொடர்ந்த நிலையில் ஆக்கிரமிப்பு நிலங்களை மீட்க நீதிமன்றம் உத்தரவிட்டது.
இதனை தொடர்ந்து, திருவள்ளூர் மாவட்ட ஆட்சியர் அறிவுறுத்தலின் பேரில் பூந்தமல்லி தாசில்தார் கோவிந்தராஜ் தலைமையில் நேற்று வருவாய்த்துறை அதிகாரிகள் மற்றும் நசரத்பேட்டை காவல்துறை தனியார் பள்ளி செயல்பட்டு வந்த இடத்திற்கு சென்றனர். தனியார் பள்ளியின் ஒவ்வொரு அறைகளையும் பூட்டி வைக்கப்பட்டிருந்த பூட்டுகளை உடைத்து அதில் இருக்கும் ஆவணங்களை எடுத்து வைத்துவிட்டு வீடியோ பதிவு செய்து பள்ளி வளாகம் முழுவதையும் சீல் வைத்தனர்.