ஒய்யாரமாக பேருந்தில் புகைபிடித்த ஓட்டுநர்…!

திண்டுக்கல் மாவட்டம் வத்தலக்குண்டுவில் இருந்து ஆடலூருக்கு தினமும் மதியம் 1½ மணிக்கு அரசு பேருந்து இயக்கப்பட்டு வருகிறது. இந்த பேருந்து பண்ணைக்காடு, ஊத்து, குப்பம்மாள்பட்டி, தாண்டிக்குடி, தடியன்குடிசை, கே.சி.பட்டி வழியாக ஆடலூருக்கு மாலை 4¾ மணிக்கு சென்றடையும். நேற்று முன்தினம் வழக்கம் போல அரசு பஸ் ஆடலூர் நோக்கி புறப்பட்டது. அந்த பேருந்து மாலை 3¾ மணி அளவில் தடியன்குடிசைக்கு வந்தது. ஆனால் பேருந்தில் ஏற ஓட்டுனரும், நடத்துனரும் அனுமதி மறுத்தனர்.

பின்னர் அந்த பேருந்து தடியன்குடிசையிலேயே திரும்பி மீண்டும் வத்தலக்குண்டுவுக்கு புறப்பட தயாரானது. இதனால் பயணிகள் அதிர்ச்சி அடைந்தனர். பேருந்திற்குள் புகைபிடித்து கொண்டிருந்த ஓட்டுனரிடம் ஆடலூருக்கு பேருந்து இயக்காதது குறித்து பயணிகள் கேட்டனர். அதற்கு அவர் ஏற்கனவே தாமதம் ஆகி விட்டதாகவும், இதனால் ஆடலூர் செல்ல முடியாது என்றும், வேறு வாகனங்களில் செல்லுமாறு தெரிவித்தார்.

இதனை ஏற்றுக்கொள்ளாத பயணிகள் வாக்குவாதத்தில் ஈடுபட்டனர். இதற்கிடையே பயணிகளுக்கு சரிவர பதில் அளிக்காத ஓட்டுநர், பேருந்தின் இருக்கையில் அமர்ந்தபடி புகைபிடித்து கொண்டிருந்ததை அங்கிருந்தவர்கள் செல்போனில் படம் பிடித்து அதனை சமூக வலைத்தளங்களில் வெளியிட்டனர். இந்த வீடியோ சமூக வலைத்தளங்களில் வெளியாகி வைரலாகி வருகிறது.