இளைஞர்கள் கொலை செய்த கள்ளசாராய வியாபாரிகளளின் வீடுகள் சூறை..!!

இளைஞர்கள் கொலை செய்யப்பட்ட சம்பவத்தில் குற்றம் சாட்டப்பட்ட கள்ளசாராய வியாபாரிகளளின்வீடுகள் சூறையாடப்பட்ட சம்பவம் பெரும் பரபரப்பை ஏற்படுத்தியுள்ளது. மயிலாடுதுறை அருகே முட்டம் கிராமத்தில் கள்ளசாராய வியாபாரிகள் ராஜ்குமார், தங்கதுரை, மூவேந்தன் உள்ளிட்டோர் கள்ளசாராய விற்பனை செய்து வந்துள்ளனர். இதனை கல்லூரி மாணவர் ஹரிசக்தி மற்றும் அவரது நண்பர் ஹரிஷ் ஆகிய இருவரும் தட்டிக்கேட்டதாக கூறப்படுகிறது.

மேலும் சாராய விற்பனை தொடர்பாக அந்த இளைஞர்கள் காவல் நிலையத்திலும் தகவல் தெரிவித்ததாக் கூறப்படுகிறது. இதனால் ஆத்திரம் அடைந்த கள்ளசாராய வியாபாரிகள் இரண்டு இளைஞர்களையும் கொலை செய்ததாக தகவல் வெளியானது. கள்ளசாராய வியாபாரிகள் ராஜ்குமார், தங்கதுரை கைது செய்யப்பட்ட நிலையில் மூவேந்தனை காவல்துறை தேடி வருகின்றனர்.

இருவர் கொலை செய்யப்பட்ட விவகாரத்திற்கு கள்ளசாராய விற்பனை காரணம் அல்ல எனவும், முன்விரோதம் தான் காரணம் எனவும் மாவட்ட காவல்துறை விளக்கம் அளித்துள்ளது. இருதரப்பிற்கும் இடையே ஏற்கெனவே முன்விரோதம் இருந்து வந்துள்ளது எனவும் தெரிவிக்கப்பட்டுள்ளது. இந்நிலையில், இளைஞர்கள் கொலை செய்யப்பட்ட சம்பவத்தில் குற்றம் சாட்டப்பட்ட ராஜ்குமார், தங்கதுரை, மூவேந்தன் ஆகிய 3 பேரின் வீடுகளை பொதுமக்கள் சூறையாடியதால் பெரும் பரபரப்பு ஏற்பட்டது.