2006 சட்டமன்ற தேர்தலுக்கு முன்னர் ஜெயலலிதா ஆட்சியில் இருந்தபோது அதாவது 2005-ல் எடப்பாடி நகர அரசு மருத்துவமனை கட்டுமான பணி துவங்கிய போது, அந்த இடத்தில் குடிசை அமைத்து வாழ்ந்து வந்த சுமார் 18 குடும்பங்களை, அன்றைய அரசு நிர்வாகம் அப்புறப்படுத்தி அவர்களுக்கு மாற்று இடம் தருவதாக அரசு உறுதியளித்தது.
அதனைத்தொடர்ந்து விளிம்பு நிலையில் வாழும் அந்த மக்கள், கைத்தறி மற்றும் இதர பகுதிகளில் தினக்கூலி வேலை செய்து வருபவர்கள் என அடையாளம் கண்டு, அந்த 18 குடும்பங்கள் உட்பட சுமார் 130 பயனாளிகளுக்கு அன்று ஆட்சியில் இருந்த கலைஞர் கருணாநிதி 17.11.2006 அன்று, சேலம் நேரு கலையரங்கத்தில் நடைபெற்ற விழாவில் அப்போதைய வேளாண்மைத்துறை அமைச்சர் வீரபாண்டி ஆறுமுகம் கலந்து கொண்டு பட்டாவையும், அதற்குறிய லேஅவுட்டும் பயனாளிகளுக்கு வழங்கினார்.
ஆனால் அரசு பட்டா கிடைத்தும் அங்கு குடியேற முடியாமலும், மாற்று இடம் கிடைக்காமலும், சுமார் 16 ஆண்டுகளாக, இன்று வரை தெருவோரமாகவே வாழ்ந்து வருகின்றனர். அதாவது பட்டா கிடைத்த 130 பயனாளிகளில் சுமார் 30 பயனாளிகள் தொடக்கத்தில் தங்களுக்கு ஒதுக்கப்பட்ட, பட்டா நிலத்தில் வீடு கட்ட முயன்றனர். ஆனால் ஒரு நபர் முழு நிலத்திற்கும் உரிமை கோரியது மடடுமல்லாமல் அந்த நபர் இது தொடர்பாக நீதிமன்றத்தை நாட, நீதிமன்றம் அவருக்கு சாதகமாக தீர்ப்பளித்ததாக தெரிகிறது.
இதனால், அரசிடம் இருந்து பட்டா கிடைத்தும் உரிய நிலம் கிடைக்காமல் 130 பயனாளிகளும் மீண்டும் நிலமற்றவர்களாக மாறினர். இதற்கிடையில், பயனாளிகளுக்கு மாற்று நிலம் ஏற்பாடு செய்து தருவதாக ஆட்சியர் மூலம் உறுதியளித்தனர். அதற்காக சேலம், ஆவணி பேரூர் கீழ்முகம் கிராமத்தில், இந்து சமய அறநிலையத் துறையின் கட்டுப்பாட்டின் கீழ் வரும், அருள்மிகு கோட்டை மாரியம்மன் & சின்ன மாரியம்மன் திருக்கோவிலுக்குச் சொந்தமான 6.30 ஏக்கர் நிலம் கண்டறியப்பட்டு, அந்த நிலத்திற்கு சந்தை மதிப்பைவிட சுமார் 150% அதிகம் செலுத்த ஒப்புதல் தெரிவித்து மாவட்ட ஆட்சியர் கடிதம் வழங்கினார் .
ஏறக்குறைய 9 ஆண்டுகள் கடந்தும், இந்த விவகாரத்தில் எந்த முன்னேற்றமும் ஏற்படவில்லை. ஆகையால், எடப்பாடி தாலுகா மற்றும் ஆட்சியர் அலுவலகத்தின் பல்வேறு அதிகாரிகள் அலட்சிய போக்கை கடைபிடித்து வந்ததால் கடந்த 16 ஆண்டுகளாக அப்பாவி மக்கள் பாதிக்கப்பட்டுள்ளனர். இந்த நீண்ட கால பிரச்சனைக்கு உடனடி தீர்வு காணுமாறும், 130 பயனாளிகளுக்கும் மேற்கண்ட இடத்திலோ அல்லது அருகிலுள்ள வேறு இடத்திலோ உடனடியாக பட்டா மற்றும் உரிய நிலம் வழங்க வேண்டும்.” என்று குறிப்பிடப்பட்ட 130 குடும்பங்களை சேர்ந்தவர்கள் அறப்போர் இயக்கத்தினருடன் சேலம் மாவட்ட ஆட்சியரை சந்தித்து கோரிக்கை மனு கொடுத்துள்ளனர்.
ஆகவே “தாமதமான நீதி என்பது மறுக்கப்பட்ட நீதியாகும்” என்பதை உணர்ந்து ஆட்சியர்கள் உடனடியாக பாதிக்க பட்ட மக்களுக்கு அதிகாரிகள் அவர்களின் தவறுகளை உணர்ந்து மாற்று இடம் வழங்க வேண்டும் என்பதே ஒவ்வொரு சமூக ஆர்வலர்களின் ஆசை.