வேலூர் மாவட்ட சத்துவாச்சாரி பால் உற்பத்தியாளர்கள் கூட்டுறவு ஒன்றியத்தில் உதவி பொது மேலாளராக மகேந்திரமாலி என்பவர் பணியாற்றி வருகிறார். இந்நிலையில் ஒப்பந்த ஊழியர்களுக்கு ஊதியம் வழங்க, நிலுவை தொகைக்கான காசோலையை, காட்பாடி கழிஞ்சூரை சேர்ந்த ஒப்பந்ததாரரான ஜெயச்சந்திரன் என்பவருக்கு உதவி பொது மேலாளர் வழங்கவில்லை என்று கூறப்படுகிறது. ஜெயச்சந்திரன் தொடர்ந்து கேட்கவே அவர் காலதாமதம் செய்து வந்தார்.
காசோலை வழங்க வேண்டும் என்றால் ரூ.5 ஆயிரம் லஞ்சம் கொடுக்க வேண்டும் என்று கேட்டதாக கூறப்படுகிறது. இதுகுறித்து ஜெயச்சந்திரன் வேலூர் லஞ்ச ஒழிப்பு காவல்துறையில் புகார் அளித்தார். புகாரின் பேரில் லஞ்ச ஒழிப்பு காவல்துறையினர் ஜெயச்சந்திரனிடம் ரசாயனம் தடவிய ரூ.5 ஆயிரத்தை கொடுக்க, அந்த பணத்தை நேற்று ஜெயச்சந்திரன் ஆவின் நிறுவனத்துக்கு கொண்டு சென்று மகேந்திரமாலியிடம் வழங்கினார். அப்போது அங்கு மறைந்திருந்த லஞ்ச ஒழிப்பு காவல்துறையினர் மகேந்திரமாலியை கையும், களவுமாக பிடித்தனர்.