பாகிஸ்தான் வரலாற்றில் முதல் முறையாக அந்நாட்டின் உச்ச நீதிமன்ற நீதிபதியாக பெண் ஒருவர் நியமிக்கப்பட உள்ளார். பாகிஸ்தானின் லாகூர் நீதிமன்ற நீதிபதி ஆயிஷா மாலிக்கை உச்ச நீதிமன்ற நீதிபதியாக நியமிப்பது தொடர்பாக கடந்த ஆண்டு செப்டம்பர் 9 ஆம் தேதி முதன் முதலாக பரிந்துரைக்கப்பட்டது.
ஆனால் இந்த பரிந்துரைக்கு பாகிஸ்தான் பார் கவுன்சில் கடும் எதிர்ப்பு தெரிவித்தது. ஆயிஷா மாலிக் உச்ச நீதிமன்ற நீதிபதியாக நியமிக்கப்பட்டால், நாட்டில் உள்ள அனைத்து நீதிமன்றங்களும் மூடப்படும் என பாகிஸ்தான் உச்ச நீதிமன்ற பார் கவுன்சிலின் தலைவர் லாதிஃப் அப்ரிடி மிரட்டல் விடுத்தார்.
இந்நிலையில் பாகிஸ்தான் நீதித்துறை ஆணையத்தின் கூட்டத்தில், நீதிபதி ஆயிஷாவை உச்ச நீதிமன்ற நீதிபதியாக உயர்த்த ஒப்புதல் அளிக்கப்பட்டது. இதன் மூலம் பாகிஸ்தான் வரலாற்றில் உச்ச நீதிமன்றத்தில் முதல் பெண் நீதிபதி என்ற பெருமையை நீதிபதி ஆயிஷா மாலிக் பெற்றுள்ளார்.