World
அமெரிக்க தொழிலதிபர் எலான் மஸ்க் செயற்கை நுண்ணறிவு தொழில் நுட்பத்துடன் குழந்தைகளை கவனிப்பது முதல் வீட்டில் அனைத்து வேலைகளையும் செய்யக்கூடியது மனித உருவ ரோபோவை அறிமுகம் செய்துள்ளார்.
நாளை பொது இடங்களில் மனிதர்களுடன், மனித உருவ ரோபோக்களும் நடமாடும் வகையில் தான் எதிர்காலம் இருக்கும் எனவே எலான் மஸ்க். அதற்கான விதையை விதைத்திருக்கிறார். செயற்கை நுண்ணறிவு தொழில்நுட்ப வளர்ச்சியை தொடர்ந்து தற்போது அவர் ரோபோ, தானியங்கி வாகனங்களில் தனது கவனத்தை செலுத்தியிருக்கிறார்.
இதுதொடர்பாக கலிபோர்னியா மாகாணம் லாஸ் ஏஞ்சல்ஸ் ‘வீ ரோபோ’ எனும் நிகழ்ச்சியில் அதிநவீன மனித உருவ ரோபோவை மஸ்க் அறிமுகம் செய்து வைத்துள்ளார். ‘ஆப்டிமஸ்’ எனப்படும் இந்த ரோபோ எதிர்காலத்தில் நமது குடும்பத்தில் ஒரு உறுப்பினராக இருக்கப் போகிறார் என மஸ்க் தெரிவித்தார். ஏற்கனவே மனிதனுக்கு உதவ பல ரோபோக்கள் இருந்தாலும், ஆப்டிமஸ் அசாத்திய வேகத்தில் சிந்தித்து செயல்படக் கூடிய ரோபோவாக இருக்கும் என மஸ்க் தெரிவித்தார்.
வீட்டிலுள்ள புற்களை வெட்டுவது, செடிகளுக்கு தண்ணீர் பாய்ச்சுவது, நாயை வாக்கிங் அழைத்துச் செல்வது, வீட்டில் குழந்தைகளை கவனித்துக் கொள்வது, சமையல் செய்வது, பரிமாறுவது என அனைத்து வேலைகளையும் இந்த ரோபோ செய்யக் கூடிய திறமை வாய்ந்தது. இதன் அறிமுக நிகழ்ச்சியில் ஆப்டிமஸ் மனித உருவ ரோபோக்கள் கண்ணாடி கிளாசில் குளிர்பானங்களை நிரப்பி பார்வையாளர்களுக்கு பரிமாறி அசத்தின.
மேலும், மக்களிடம் உரையாடிய ஆப்டிமஸ், பிறந்தநாள் வாழ்த்து பாடல்களையும் பாடி பிரமிக்க வைத்தன. பார்வையாளர்களின் பல கேள்விகளுக்கு செயற்கை நுண்ணறிவை பயன்படுத்தி பதிலளித்து பாராட்டுகளையும் பெற்றன. இந்த ரோபா 20,000 அமெரிக்க டாலரில் தொடங்கி 30,000 டாலர் வரையிலும் இருக்கும் என மஸ்க் கூறி உள்ளார்.
ஐ.நா அமைதிப்படை வீரர்கள் தெற்கு லெபனானிலிருந்து உடனடியாக வெளியேற்றப்பட வேண்டுமென இஸ்ரேல் பிரதமர் பெஞ்சமின் நெதன்யாகு கூறியிருக்கிறார். காசாவில் ஹமாஸ் மற்றும் லெபனானில் ஹிஸ்புல்லா போராளிகளுக்கு எதிராக இஸ்ரேல் ராணுவம் தொடர்ச்சியாக சண்டையிட்டு வருகிறது.
காசாவில் கடந்த 9 நாட்களாக இஸ்ரேல் மீண்டும் தாக்குதலை தீவிரமாக்கி இருக்கிறது. குறிப்பாக, வடக்கு காசாவில் கடந்த 9 நாளில் 300 பாலஸ்தீனர்கள் கொல்லப்பட்டுள்ளனர். அங்கு ஹமாசின் ஆதிக்கம் முற்றிலும் முடிவுக்கு கொண்டு வரப்பட்டிருப்பதாக இஸ்ரேல் பிரதமர் நெதன்யாகு கூறி உள்ளார். இதே போல, லெபனானின் நபாதியா நகரில் இஸ்ரேல் ராணுவத்தின் வான்வழி தாக்குதலில் 1910-ஆம் ஆண்டு முதல் செயல்பட்டு வந்த மார்க்கெட் கட்டிடம் தரைமட்டமாக்கப்பட்டது. 12 குடியிருப்பு கட்டிடங்கள் 40 கடைகள் மற்றும் அஹெல் எல் குரான் மசூதி மற்றும் அதை சுற்றியுள்ள கட்டிடங்களும் தரைமட்டமாகின.
லெபனான் ராணுவத்திற்கு உதவ, தெற்கு லெபனான் எல்லையில் பாதுகாப்பு பணி மேற்கொண்டு வரும் ஐ.நா அமைதிப்படை வீரர்கள் மீதும் இஸ்ரேல் ராணுவம் துப்பாக்கி சண்டையிட்டு தாக்குதல் நடத்துகிறது. 2-வது முறையாக நேற்றும் ஐ.நா அமைதிப்படை வீரர்கள் தாக்கப்பட்டுள்ளனர்.
லெபனானில் ஹிஸ்புல்லா படையினர் ஐ.நா அமைதிப்படை வீரர்களை பிணைக்கைதிகளாக பிடித்துச் செல்லும் அச்சுறுத்தல் இருப்பதால் உடனடியாக அவர்களை அங்கிருந்து வெளியேற்ற வேண்டுமென ஐ.நா பொதுச் செயலாளர் கட்டரசிடம் இஸ்ரேல் பிரதமர் பெஞ்சமின் நெதன்யாகு வலியுறுத்தி உள்ளார்.
அமெரிக்க அதிபர் தேர்தல் வேட்பாளாராக கமலா ஹாரிஸ் தேர்வு செய்யப்பட்டதைக் கொண்டாடும் விழாவில், இசையமைப்பாளர் ஏ.ஆர்.ரஹ்மான் நேரடி இசை நிகழ்ச்சி நடத்துகிறார் என்று இந்தியன் – அமெரிக்கன் நிதிதிரட்டும் அமைப்பு அறிவித்துள்ளது.
இதுகுறித்து ஆசிய, அமெரிக்க, பசிபிக் தீவுவாசிகளின் வெற்றி நிதியம்(AAPI), நேற்று அதன் எக்ஸ் பக்கத்தில் வெளியிட்டுள்ள பதிவில், “விரைவில்: ஏ.ஆர். ரஹ்மானுடன் இரு சிறப்பான மாலைப் பொழுது. அமெரிக்க அதிபர் தேர்தல் வேட்பாளராக கமலா ஹாரிஸ் அறிவிக்கப்பட்ட வரலாற்று சிறப்பு தருணத்தை ஏ.ஆர். ரஹ்மானுடன், உலகத்தரம் வாய்ந்த நேரடி இசை நிகழ்ச்சியுடன் இணைந்து கொண்டாடுங்கள்” என பசிபிக் தீவுவாசிகளின் வெற்றி நிதியம் தெரிவித்துள்ளது.
இந்த நிகழ்ச்சி நடக்க இருக்கும் தேதி குறித்து எந்த அறிவிப்பும் வெளியிடப்படவில்லை. மேலும் இதுகுறித்து ரஹ்மான் தனது சமூக வலைதள பக்கத்தில் பதிவு ஏதுமிடவில்லை. என்றாலும், நிகழ்ச்சிக்கான பதிவில் நேரடி இசை நிகழ்ச்சியில் பங்கேற்க பதிவு செய்வதற்கான இணைப்பை ஏஏபிஐ வழங்கியுள்ளது.
ஆசிய, அமெரிக்க, பசிபிக் தீவுவாசிகளின் வெற்றி நிதியம் அமெரிக்க அதிபருக்கான இந்தத் தேர்தலில் துணை அதிபர் கமலா ஹாரிஸை ஆதரித்தது. மேலும் நாடு முழுவதுமான காங்கிரஸ் மற்றும் பிற அரசு பதவிகளுக்கு போட்டியிடும் ஏஏபிஐ வேட்பாளர்களையும் ஆதரித்தது என்பது குறிப்பிடத்தக்கது.
