திருப்பூர் மாவட்டம், தாராபுரத்தில் நகராட்சிக்கு உள்பட்ட பகுதிகளில் பெரும்பாலான இடங்களில் சாலையோரம் குப்பைகள் குவிந்து காணப்படுகிறது. குறிப்பாக காமராஜபுரம், இறச்சிமஸ்தான் நகர், அரசு ஊழியர் ஆகிய பகுதிகள் நகராட்சி ஒன்றாவது வார்டு பகுதியில் உள்ளது. இங்கு 3000-க்கும் மேற்பட்ட குடும்பம் வசித்து வருகின்றனர்.
இங்கு வசிக்கும் பொதுமக்கள் அன்றாட வேலைக்கும் மற்றும் இருசக்கர நான்கு சக்கர வாகனங்கள் வைத்திருப்போர் செல்லும் முக்கிய சாலையான காலனிகளுக்கும், பைபாஸ் சாலைக்கும் இணைப்பு பாதையாக உள்ள பொதுமக்கள் அதிகம் பயன்படுத்தும் சாலையில் அருகே 20-அடி சாலையில் 17-அடி அளவிற்கு சாலையை ஆக்கிரமித்து அதிக அளவில் குப்பைகள் மலை போல் குவிந்து காணப்படுகிறது.
இவ்வாறு குவிந்து கிடக்கும் குப்பைகள் காரணமாக கடும் துர்நாற்றம் வீசி காணப்படுவதோடு, அந்த பகுதி முழுவதும் சுகாதார சீர்கேடு ஏற்பட்டு காய்ச்சல் வாந்தி வயிற்றுப்போக்கு தோல் அலர்ஜி வைரஸ் ஃபீவர் போன்ற பல்வேறு உடல் உபாதைகள் அப்பகுதி மக்களுக்கு பலருக்கு ஏற்பட்டுள்ளது.
இதனால் அந்த வழியே சாலையில் பயணம் செய்யும் வாகன ஓட்டிகள், துர்நாற்றம் தாங்க முடியாமல் மூக்கை பிடித்துக் கொண்டு செல்லும் நிலையே உள்ளது. மேலும், சாலையோரம் குவிந்து கிடக்கும் குப்பைகளை அங்கு சுற்றித் திரியும் மாடுகள், நாய்கள் போன்றவை கிளறி விடுவதால் சாலை முழுவதும் குப்பைகள் சிதறி அந்த பகுதியே அலங்கோலமாக காட்சியளிக்கிறது.
இது குறித்து அப்பகுதி பொதுமக்கள் தாராபுரம் நகராட்சி அலுவலகத்தில் நகராட்சி ஆணையாளர் நகராட்சி திமுக நகர் மன்ற தலைவர் பாப்பு கண்ணன் மற்றும் திமுக ஒன்றாவது வார்டு கவுன்சிலர் ராஜேந்திரன் ஆகியோர் இடத்தில் பலமுறை புகார் தெரிவித்தனர். ஆனால் அதிகாரிகள் இதுவரை எந்தவித நடவடிக்கையும் எடுக்கவில்லை என்று கூறப்படுகிறது. மேலும் குப்பை கொட்டும் இடத்தின் அருகிலேயே
பிரபல தேவாலயம் மற்றும் வழிபாட்டு தளங்கள் அமைந்துள்ளது. அங்கு வரும் மக்களும் மற்றும் பள்ளி, கல்லூரிக்கு செல்லும் மாணவ- மாணவிகள் கடுமையாக பாதிக்கப்படுகிறார்கள். இதுபோன்று கடந்த 11 மாதமாக மலை போல் குப்பைகள் குவிந்து தொடர்ந்து சுகாதார சீர்கேடு ஏற்பட்டு வருவதால் அந்த பகுதியில் மேலும் கொடிய தொற்று நோய்கள் பரவும் அச்சத்தில் பொதுமக்கள் உள்ளனர்.
எனவே சம்மந்தப்பட்ட அதிகாரிகள் உடனடியாக தலையிட்டு, சாலையோரம் அலட்சியமாக குப்பைகளை கொட்டுவதை உடனடியாக தடுத்து நிறுத்த வேண்டும், அங்கு மலைபோல் தேங்கி கிடக்கும் குப்பைகளை உடனடியாக அப்புறப்படுத்த வேண்டும் என்று பொதுமக்கள் கோரிக்கை வைத்துள்ளனர்.
இதுகுறித்து அப்பகுதியைச் சேர்ந்த கண்ணன் என்ற ஆசிரியர் தெரிவிக்கையில், நகராட்சி நிர்வாகத்திடம் மற்றும் ஒன்றாவது வார்டு கவுன்சிலரிடம் இது பற்றி தெரிவித்தோம். ஆனால் அதிகாரிகளோ அரசியல் தலைவர்களோ எந்தவித நடவடிக்கையும் எடுப்பதில்லை, மேலும் தற்போது மழைக்காலம் என்பதால் குப்பைகளில் புழு உற்பத்தியாகி அது வீடுகளுக்குள் செல்கின்றது மேலும் பிளாஸ்டிக் கவர்களில் மழைநீர் தேங்கி டெங்கு காய்ச்சலை வர வைக்கக்கூடிய ஏ.டி.எஸ். கொசுக்கள் உற்பத்தி ஆகிறது.
மேலும் அப்பகுதியில் உள்ள காலி மனை இடங்களை கம்பி வேலி அமைக்க வேண்டும் அவ்வாறு அமைத்தால் பொதுமக்கள் குப்பை கொட்டாதவாறு தடுக்க முடியும். மேலும் அப்பகுதியில் தினந்தோறும் குப்பை எடுப்பதற்கு ஆட்கள் வரவேண்டும் குப்பை கொட்டுவதற்கு என தனி இடம் ஒதுக்கி அதற்கு மக்கும் குப்பை மக்காத குப்பை என இரண்டு குப்பை தொட்டிகள் வைக்க வேண்டும் ஆனால் விளம்பரத்திற்காக மட்டுமே செயல்படும் நகர் மன்ற தலைவர் பல்வேறு இடங்களை ஆய்வு செய்து நகராட்சி தூய்மையுள்ள நகராட்சியாக உள்ளது என தெரிவித்து வருகிறார். ஆனால் அவர் வார்டு பகுதிக்கு அருகே உள்ளது எங்களது வார்டு ஆனால் குப்பையை கூட அவரால் அகற்ற முடியவில்லை என இவ்வாறு தெரிவித்தார்.