Category: தமிழகம்

கள்ளக்குறிச்சி மாவட்டம் உளுந்தூர்பேட்டை ஈஸ்வரன் கோயில் தெருவை சேர்ந்த அதிமுக மாவட்ட எம்ஜிஆர் இளைஞர் அணி செயலாளர் வழக்கறிஞர் கிருஷ்ணன். இவர் மனைவி மற்றும் நண்பர்களுடன் காவல் கண்காணிப்பாளர் அலுவலகத்தில் புகார் மனு கொடுத்துள்ளார். அதில், அதிமுகவில் கடந்த 20 ஆண்டுகளாக இருக்கிறேன்.

அதிமுக மாவட்ட செயலாளர் குமரகுரு மீது போடப்பட்ட 9 வழக்குகள் மற்றும் 2022-ல் உளுந்தூர்பேட்டையில் அமையவுள்ள திருப்பதி தேவஸ்தான போர்டு சார்பில் கட்டப்பட்டு வரும் வெங்கடேசபெருமாள் கோயில் வழக்குவரை அனைத்து வழக்கிலும் ஆஜராகி பணம் வாங்காமல் வழக்கை முடித்து கொடுத்தேன்.

இந்நிலையில், கடந்த 22.1.2024-ஆம் தேதி மாவட்ட செயலாளர் குமரகுரு 2024 நாடாளுமன்ற தேர்தலில் விழுப்புரம் தனி தொகுதிக்கு உன்னை வேட்பாளராக தேர்வு செய்ய கட்சி தலைமைக்கு பரிந்துரைத்து சீட் வாங்கி தருகிறேன் என்றும், அதற்கு ரூ.2 கோடி தயார் செய்யும் படியும் தெரிவித்தார். அதன்படி 3 தவணையாக மொத்தம் ரூ.1.60 கோடி கொடுத்தேன். விழுப்புரம் எம்பி சீட் உறுதி செய்யப்பட்டால் மீதமுள்ள ரூ.40 லட்சம் கொடுக்கிறேன் என தெரிவித்து இருந்தேன்.

மார்ச் 20-ஆம் தேதி அறிவிக்கப்பட்ட வேட்பாளர் பட்டியலில் எனது பெயர் இல்லாமல் வேறு நபர் பெயர் அறிவிக்கப்பட்டது. இதனால் குமரகுரு திட்டமிட்டு நம்பவைத்து ஏமாற்றியது தெரியவந்தது. சீட் வாங்கி கொடுப்பதாக கூறி வாங்கிய பணத்தை திருப்பி கேட்டதற்கு என்னை தாக்கினார். எனது ரூ.1.60 கோடி பணத்தை பெற்று தர வேண்டும். என் குடும்பத்தினருக்கு ஆபத்து ஏற்பட்டால் குமரகுரு மற்றும் அவரது மகன் சதீஷ் நமச்சிவாயமும் தான் பொறுப்பாவார்கள் என அந்த புகாரில் தெரிவித்துள்ளார்.

திருச்சி மாவட்டம் ஜீயபுரம் அடுத்த அல்லூர் அக்ரஹாரத்தை சேர்ந்த பாஜக முன்னாள் மண்டல தலைவர் பிரகாஷ், அதே ஊரை சேர்ந்த ஜெயராமன் மனைவி புவனேஸ்வரியும் வேளாண் கடன் பெறுவதற்காக அந்தநல்லூர் தொடக்க வேளாண் கூட்டுறவு கடன் சங்கத்தில் கடந்த 5-ஆம்தேதி மனு கொடுத்தனர். அதில் அடங்கல் சான்றிதழில் வி.ஏ.ஓ கையொப்பத்தை தாமாகவே போட்டதுடன், அலுவலக முத்திரையையும் போலியாக தயாரித்து பயன்படுத்தியது தெரியவந்தது.

தொடக்க வேளாண் கூட்டுறவு கடன் சங்கத்தினர் விஏஓ தரப்பில் விசாரித்த போது சான்றிதழ் வழங்கியது உண்மையல்ல என தெரிவித்தார். இதையடுத்து மனுவை நிராகரித்த கூட்டுறவு கடன் சங்க செயலாளர் பரமேஸ்வரன், ஜீயபுரம் காவல் நிலையத்தில் புகார் அளித்தார். இதுகுறித்து காவல்துறை வழக்கு பதிந்து பிரகாஷ், புவனேஸ்வரி ஆகியோரை கைது செய்தனர்.

சேலம் மாவட்டம் மேட்டூர் அருகே குஞ்சாண்டியூரை சேர்ந்த முனியப்பன் மகன் விஜய். கொங்கணாபுரம் அருகே பாலப்பட்டி பகுதியை சேர்ந்த திருச்செங்கோடு தனியார் கல்லூரியில் 2-ஆம் ஆண்டு படித்து வரும் 19 வயது மாணவி. அந்த மாணவிக்கும், விஜய்க்கும் கடந்த இரண்டு ஆண்டுகளுக்கு முன்பு பழக்கம் ஏற்பட்டு காதலாக மாறியுள்ளது. இந்நிலையில், மாணவியின் வீட்டிற்கு போதையில் நேற்று முன்தினம் சென்ற விஜய், திருமணம் செய்து கொள்ளலாம் வா எனக்கூறி மாணவியை அழைக்க, மாணவி குடும்பத்தினர் கடும் எதிர்ப்பு தெரிவித்துள்ளனர்.

இதனால் மாணவியிடம் நீ வராவிட்டால் கிணற்றில் குதித்து தற்கொலை செய்வேன் எனக்கூறிவிட்டு, பாலப்பட்டி அருகே விவசாய கிணற்றில் விஜய் குதித்துள்ளார். அவருக்கு நீந்த தெரியும் என்பதால் மேலே எழுந்து வந்தவர் மீண்டும் குதித்தார். இப்படியாக 4 முறை குதித்து மேலே எழுந்து வந்தவர் 5-வது முறையாக குதித்தபோது மேலே வர முடியவில்லை.

விஜய் கிணற்றில் குதித்தது, மாணவியின் உறவினர்கள், கொங்கணாபுரம் காவல் நிலையத்தில் புகார் கொடுக்க, காவல்துறை இடைப்பாடி தீயணைப்புத்துறைக்கும் தகவல் கொடுத்தனர். சம்பவ இடத்திற்கு விரைந்து வந்த தீயணைப்புத்துறையினர், சுமார் ஒரு மணி நேரம் போராடி விஜய்யை உயிருடன் மீட்டு, காவல்துறையினரிடம் ஒப்படைத்தனர். மேலும் இது போன்ற செயல்களில் ஈடுபடக்கூடாது என விஜய்யை காவல்துறை எச்சரித்து அனுப்பினர். அப்போது, மாணவி காவல்துறையினரிடம் தான் விஜய்யுடன் செல்வதாக கூற அவரது உறவினர்கள் மாணவிக்கு அறிவுரை கூறி வீட்டிற்கு அழைத்துச் சென்றனர்.