Category: தமிழகம்

திருவள்ளூர் மாவட்டம், திருவேற்காடு நகராட்சியில் மொத்தம் 18 வார்டுகள் இருக்கின்றன. இவற்றில் காங்கிரஸ், விடுதலைச் சிறுத்தைகள் கட்சிக்கு தலா ஒரு கவுன்சிலர்; மீதமுள்ள 16 கவுன்சிலர்கள் தி.மு.க-வைச் சேர்ந்தவர்கள். தி.மு.க-வைச் சேர்ந்த திருமூர்த்தி தலைவராகவும், காங்கிரஸ் கட்சியைச் சேர்ந்த ஆனந்தி துணைத் தலைவராகவும் இருக்கின்றனர்.

திருவேற்காடு நகராட்சி கமிஷனராக, ஜஹாங்கீர் பாஷா என்பவர் கடந்த சில மாதங்களுக்கு முன்பு பணியமர்த்தப்பட்டார். அன்றிலிருந்தே கமிஷனருக்கும், பெரும்பாலான கவுன்சிலர்களுக்குமிடையே அடிக்கடி முட்டல் மோதல்கள்தான். அதன் உச்சமாக, `பெண் கவுன்சிலரின் கணவரிடம் கமிஷனர் ஜஹாங்கீர் பாஷா மாமூல் கேட்டார்; வழக்கறிஞரை ஒருமையில் பேசினார்’ என்பது போன்ற தகவல்களும் வீடியோவும் வெளியாகி, நகராட்சி நிர்வாகத்தையே ஸ்தம்பிக்க வைத்திருக்கிறது!

நகராட்சியின் 2-வது வார்டு கவுன்சிலர் ஆஷாவின் தந்தையும், முன்னாள் கவுன்சிலருமான ஆசீர்வாதம் இது குறித்துப் பேசுகையில், “நான் கவுன்சிலராக இருந்த காலகட்டத்தில், மக்கள் பிரநிதிகளிடம் அதிகாரிகள் மரியாதையாக நடந்துகொள்வார்கள். தற்போது, கமிஷனராக வந்திருக்கும் ஜஹாங்கீர் பாஷா, கவுன்சிலர்கள் தொடங்கி மனு கொடுக்க வரும் பொதுமக்கள் வரை அனைவரையும் அவமரியாதையாக நடத்தி, அலைக்கழிக்கிறார். டி.டி.எஸ் நகரில் சாலை பிரச்னை குறித்து கமிஷனரிடம் பேசினேன். என்னிடமும் அவமரியாதையாக நடந்துகொண்டார்.

நகராட்சிக் கூட்டத்திலும் ஒரு சில கவுன்சிலர்களைத் தவிர மற்றவர்கள் பேசுவதற்கு அவர் அனுமதிப்பதில்லை. கடந்த சில தினங்களுக்கு முன்பு, தி.மு.க கவுன்சிலர் உள்ளிட்ட சிலருடன் கமிஷனருக்குத் தகராறு ஏற்பட்டு, பிரச்னை காவல் நிலையம் வரை சென்றிருக்கிறது” என்றார் ஆசீர்வாதம்.

காவல் நிலையத்தில் புகாரளித்தவர்களில் சரவணனிடம் பேசுகையில் “திருவேற்காடு, சுந்தரசோழபுரத்தில் வசிக்கும் மாணிக்கம் என்பவரின் இடம் தொடர்பாக நகராட்சித் தரப்பிலிருந்து நோட்டீஸ் வந்திருந்தது. அதைப் பற்றி விசாரிக்க மாணிக்கமும் நானும் நகராட்சி அலுவலகத்துக்குச் சென்றோம். மணிக்கணக்கில் காத்திருந்த பிறகே கமிஷனர் வந்தார்.

மாணிக்கத்தையும் என்னையும் கமிஷனர் அலுவலக ஊழியர் ஒருவர் செல்போனில் வீடியோ எடுத்தார். `ஏன் வீடியோ எடுக்கிறீர்கள்?’ என்று கேட்டேன். இதனால் எனக்கும் கமிஷனருக்குமிடையே வாக்குவாதம் ஏற்பட்டது. ‘நீ வெளியே போ, நீ பெரிய வெங்காயமா…’ என்று என்னைத் திட்டினார். அதை வீடியோவாகப் பதிவுசெய்த நான், திருவேற்காடு காவல் நிலையத்தில் கமிஷனர், வீடியோ எடுத்த ஊழியர்கள் ஆகியோர்மீது புகாரளித்தேன். மறுநாள், கமிஷனர் தரப்பில் அரசு ஊழியரைப் பணிபுரிய விடாமல் தடுத்ததாக எங்கள்மீது காவல் நிலையத்தில் புகாரளிக்கப்பட்டிருக்கிறது” என்றார்.

தி.மு.க கவுன்சிலர் நளினியின் கணவர் குரு பேசுகையில், “நகராட்சியில் குப்பை அள்ளும் பணியை ஒப்பந்த அடிப்படையில் மேற்கொண்டு வருகிறேன். அதற்கான பில்லை பாஸ் செய்யாமல் கமிஷனர் இழுத்தடித்து வந்தார். அது குறித்துக் கேட்டபோது, ஓப்பனாகவே என்னிடம் மாமூல் கேட்டார். கட்சிக்குக் கெட்ட பெயர் ஏற்படும் என்பதால் கமிஷனர்மீது எந்தவித நடவடிக்கையும் நான் எடுக்கவில்லை. அவரின் செயல்பாடுகள் அனைத்தும் மக்கள் விரோதமானவையாகவே இருக்கின்றன” என தெரிவித்தார்.

செங்கல்பட்டு மாவட்டம், கூடுவாஞ்சேரி அனைத்து மகளிர் காவல் நிலைய ஆய்வாளராக இருந்த மகிதா அன்ன கிறிஸ்டி. இவர் கூடுவாஞ்சேரி அனைத்து மகளிர் காவல் நிலையத்தில் இருந்தபோது, காட்டாங்குளத்தூரை சேர்ந்த ஒரு பெண், ‘தனது 17வயது மகளை திரிசூலம் பகுதியை சேர்ந்த ரஞ்சித், என்பவர் ஆசை வார்த்தை கூறி கர்ப்பமாக்கினார்’ என கடந்த ஜூலை 2-ம் தேதி புகார் அளித்துள்ளார்.

அந்த பெண் கொடுத்த புகாரின் அடிப்படையில் கூடுவாஞ்சேரி மகளிர் காவல் நிலைய காவல்துறை போக்சோ சட்டத்தின் வழக்குப் பதிவு செய்து ரஞ்சித்தை கைது செய்து, சிறையில் அடைத்தனர். முன்னதாக, கூடுவாஞ்சேரி அனைத்து மகளிர் காவல் நிலைய ஆய்வாளராக இருந்த மகிதா அன்ன கிறிஸ்டி, சிறுமியின் தாயாரிடம் விசாரித்தபோது சிறுமிக்கு ஏற்கனவே இரண்டு‌முறை கருக்கலைப்பு செய்துள்ள அதிர்ச்சி தகவலை தெரிவித்தார். அதில் மறைமலை நகர் மற்றும் சிங்கபெருமாள் கோவிலில் உள்ள இரண்டு தனியார் மருத்துவமனைகளில் கருகலைப்பு செய்ததை கூறியுள்ளார்.

குறிப்பாக மலைமறைநகரில் உள்ள மருத்துவமனையில் சிறுமி கருவுற்றபோது மாத்திரைகள் வாங்கி கருக்கலைப்பு செய்ததாக கூறி உள்ளார். இதனைத் தொடர்ந்து கூடுவாஞ்சேரி காவல் நிலைய ஆய்வாளர் மகிதா அன்ன கிறிஸ்டி, மறைமலை நகரில் உள்ள தனியார் மருத்துவமனைக்கு நேரில் சென்று மருத்துவர் உமா மகேஸ்வரியிடம் விசாரணை நடத்தி உள்ளார். மேலும், சிறுமியின் தாய் அளித்த வாக்குமூலத்தில் சிங்கபெருமாள் கோவிலில் உள்ள தனியார் மருத்துவமனையிலும் மாத்திரைகள் வாங்கி கருக்கலைப்பு செய்ததாக கூறினார். இதனைத் தொடர்ந்து தனியார் மருத்துவமனைக்குச் சென்ற ஆய்வாளர் மகிதா அன்ன கிறிஸ்டி, அரசு மருத்துவர் பராசக்தியிடம் விசாரணை மேற்கொண்டு உள்ளார்.

அப்போது சட்ட விரோதமாக 17-வயது சிறுமிக்கு கருக்கலைப்பு செய்ததற்கு வழக்குப்பதிவு செய்ய உள்ளதாக கூறியுள்ளார். வழக்கு பதிவதை தடுக்க மறைமலைநகர் மருத்துவர் உமா மகேஸ்வரியிடம் இருந்து 2-லட்சம் பணத்தை பெற்றுக் கொண்டுள்ளார். இந்த விவகாரம் வெளியில் கசிந்து தாம்பரம் காவல் ஆணையரகத்துக்கு புகாராக சென்றுள்ளது. உடனடியாக தாம்பரம் காவல் ஆணையர் அமல்ராஜ் ஆய்வாளர் மகிதா அன்ன கிறிஸ்டியை அழைத்து விசாரணை செய்துள்ளார். அப்போது மகிதா அன்ன கிறிஸ்டி பணம் பெற்றது உறுதியானதால் அவரை பணியிடை நீக்கம் செய்து, வாங்கிய பணத்தை திருப்பி அளிக்கவும் தாம்பரம் காவல் ஆணையர் அமல்ராஜ் உத்தரவிட்டிருந்தார்.

மேலும் இது தொடர்பாக அரசு மருத்துவர் பராசக்தி மறைமலைநகர் காவல் நிலையத்தில், தன்னை காவல் ஆய்வாளர் மகிதா அன்ன கிறிஸ்டி மிரட்டி பணம் பறித்ததாகவும், அவர் மீது உரிய நடவடிக்கை எடுக்க வேண்டும் என புகார் அளித்தார். இது தொடர்பாக ஆய்வாளர் மகிதா அன்ன கிறிஸ்டி மீது பணம் பறித்தல், மிரட்டல் உள்ளிட்ட பிரிவுகளில் கீழ் வழக்குப் பதிவு செய்யப்பட்டு காவல்துறை அவரை தேடி வந்தனர். இந்நிலையில், தலைமறைவாக இருந்த ஆய்வாளர் மகிதா அன்ன கிறிஸ்டியை பொன்னேரி அருகே கைது செய்து, விசாரணை நடத்தி வருகின்றனர்.

தேனி மருத்துவக்கல்லூரி மருத்துவமனை முதல்வர் மீனாட்சி சுந்தரம், மருத்துவமனையில் உள்ள உணவக உரிமையாளர் மாரிசாமியிடம் லஞ்சம் கேட்டு பெற்றதாக புகார் எழுந்தது. இது தொடர்பான வீடியோ பரவியது. இதனையடுத்து அமைச்சர் மா. சுப்பிரமணியன் உத்தரவின்பேரில், மாவட்ட இணை மருத்துவ இணை இயக்குநர் நேரில் சென்று, உணவக உரிமையரிடம் விசாரணை நடத்தினர்.

அதன் அடிப்படையில், தேனி மருத்துவக் கல்லூரி மருத்துவமனையின் முதல்வர் மீனாட்சி சுந்தரம் லஞ்சம் வாங்கியது உண்மையென தெரியவந்ததாக மருத்துவத்துறை தெரிவித்துள்ளது. இதனையடுத்து மீனாட்சி சுந்தரம் மீது துறை ரீதியான நடவடிக்கை மேற்கொள்ள, பணியிடை நீக்கம் செய்து அமைச்சர் மா.சுப்பிரமணியன் உத்தரவிட்டுள்ளார்.

நாமக்கல் மாவட்டம், குமாரபாளையம் காட்டூர் விட்டலபுரி பகுதியில் ஒரு வீட்டில் துர்நாற்றம் வீசுவதாக குமாரபாளையம் காவல் நிலையத்திற்கு தகவல் வந்தது. அதன் பேரில் குமாரபாளையம் காவல்துறை மற்றும் கிராம நிர்வாக அதிகாரிகள் அந்த வீட்டுக்கு சென்று சோதனை நடத்தினர். அப்போது உள்ளே தாழ்ப்பாள் போடப்பட்டு இருந்தது. பின்னர் வீட்டின் கதவை உடைத்து உள்ளே சென்று பார்த்தனர். அங்கு சுமார் 42 வயது மதிக்கத்தக்க ஒரு ஆண் பிணம் அழுகிய நிலையில் கிடந்தது.

இதுகுறித்து காவல்துறை அந்த பகுதி பொது மக்களிடம் விசாரணை செய்தபோது, அந்த வீட்டிற்கு 5 மாதங்களுக்கு முன்பு ஒரு தம்பதியினர் குடிவந்தனர். அந்த ஆண் குடிப்பழக்கம் உள்ளவர் என்றும், அவரது மனைவி வெளியூர் சென்று விட்டதாகவும் தெரிகிறது. மேலும் கடந்த 5 நாட்களுக்கு முன்பு அவர் ரத்த காயங்களுடன் வீட்டுக்கு வந்தார். அப்போது வாலிபரிடம் அக்கம் பக்கத்தினர் மருத்துவமனைக்கு செல்லுமாறு கூறினர். அதற்கு அவர் நான் காலையில் போகிறேன் என்று கூறிவிட்டு வீட்டுக்குள் சென்றார்.

இதையடுத்து அந்த வீட்டில் இருந்து உடல் துர்நாற்றம் வீசியது. இதுபற்றி அருகில் இருந்தவா்கள் காவல்துறைக்கு தகவல் தெரிவித்தனர். இதைத்தொடர்ந்து கொலை செய்யப்பட்டாரா? என்பது குறித்து காவல்துறை விசாரணை நடத்தி வரும் நிலையில், அப்பகுதி மக்கள் கொலை செய்யப்பட்டாரா… என சந்தேக படுகின்றனர்.

கோவை ஓம்நகர் சிவாஜி காலணியைச் சேர்ந்த தீபக் என்பவர் கார், பைக்கிற்கு வாட்டர் வாஸ் செய்யும் தொழில் செய்து வருகிறார். இவரது வாட்ஸ் ஆப் எண்ணிற்குக் கடந்த மாதம் குறுந்தகவல் வந்தது. அதில், பகுதி நேர வேலை இருப்பதாகத் தெரிவிக்கப்பட்டிருந்தது. இதனையடுத்து தீபக் அதில் உள்ள லிங்க் கிளிக் செய்து டெலிகிராம் குழுவில் இணைந்தார்.

அதில் தனது விவரங்களைப் பதிவிட்டார். பின்னர் அவரை தொடர்பு கொண்ட நபர் ஆன்லைனில் தாங்கள் கொடுக்கும் பணிகளைச் செய்து கொடுத்தால் அதிகம் சம்பாதிக்கலாம் எனவும், கமிஷன் கிடைக்கும் எனவும் ஆசைவார்த்தை கூறினார். இதனையடுத்து தீபக் அந்த நபர் கூறிய வங்கிக் கணக்கிற்கு முதலில் சிறிய தொகையை அனுப்பி அவர்களின் பணிகளை ஆன்லைனில் செய்து கொடுத்தார்.

அப்போது அவருக்குக் குறிப்பிட்ட தொகை லாபம் கிடைத்தது. பின்னர் தீபக்கைத் தொடர்பு கொண்ட நபர் அதிகளவில் முதலீடு செய்தால் இதனை விட அதிக லாபம் கிடைக்கும் எனத் தெரிவித்தார். இதனைத் தொடர்ந்து தீபக் சிறிது, சிறிதாக ரூ. 14,12,500 முதலீடு செய்தார். ஆனால் அதன்பின்னர் அவருக்கு எந்த விதமான கமிஷனும், லாப தொகையும் கிடைக்கவில்லை.

பின்னர் அந்த நபரைத் தொடர்பு கொள்ள முயன்றும் முடியவில்லை. ஆன்லைன் வேலை எனக் கூறி மொத்தமாக ரூ. 14,12,500 சுருட்டி விட்டார். இதனால் அதிர்ச்சியடைந்த தீபக் கோவை மாநகர காவல் நிலையத்தில் புகார் அளித்தார். புகாரின் பேரில், காவல்துறை வழக்குப்பதிவு செய்து விசாரணை நடத்தி வருகின்றனர்.

சேலம் தெற்கு தாலுகாவில் முதியோர் உதவித்தொகையில், 89.18 லட்சம் ரூபாய் மோசடி நடந்துள்ளது. இதுதொடர்பாக மாநகர் மத்திய குற்றப்பிரிவு காவல்துறை வழக்குப்பதிந்து, சேலம் பஞ்சந்தாங்கி ஏரியை சேர்ந்த திருநங்கையர் சாந்தி, மாதம்மாள், வீராணம் அடுத்த பாலப்பட்டியை சேர்ந்த பவித்ரா, ஆகியோரை கைது செய்தனர்.

கடந்த, 2020 அக்டோபரில் இருந்து, இந்த மோசடி நடந்திருப்பதால் அப்போது, சமூக பாதுகாப்பு திட்ட தனி தாசில்தாராக பணியாற்றிய முத்துலட்சுமி, அறிவுடை நம்பி, உதவியாளர் கிரிஜாவிடம், நேற்று, தனித்தனியே விசாரணை நடந்தது. குற்றப்பிரிவு உதவி கண்காணிப்பாளர் சூர்யா விசாரணை நடத்தினார். தற்போது முத்துலட்சுமி, சேலம் மைய தாலுகா வட்ட வழங்கல் அலுவலராகவும், அறிவுடை நம்பி சங்ககிரி ரெகுலர் தாசில்தாராகவும், கிரிஜா சேலம் ஆட்சியர் அலுவலக நில எடுப்பு பிரிவிலும் வேலை செய்து வருகின்றனர்.

இதுகுறித்து தாசில்தார்கள் கூறுகையில், தெற்கு தாலுகாவில், 29,000 பேர் உதவித்தொகை பெறுகின்றனர். உரிய பயனாளிக்கு, உதவித்தொகை பட்டுவாடா செய்ய, வங்கிக்கு கட்டணம் தலா, 30 ரூபாய், அஞ்சல்துறைக்கு, தலா, 50 ரூபாயை மாதந்தோறும் தனி தாசில்தார் மூலம் செலுத்த வேண்டும்.

இதில் வங்கிக்கு செலுத்த வேண்டிய கட்டணத்தில் முறைகேடு நடந்துள்ளது. இதுதொடர்பாக வங்கி நிர்வாகம் கேள்வி கேட்காதது சந்தேகத்தை ஏற்படுத்தி உள்ளது. 2021 மார்ச், 31-ல் நடந்த தணிக்கையில் இந்த மோசடி சுட்டிக்காட்டப்பட்டும், சமூக பாதுகாப்பு திட்ட அலுவலர்கள் கண்டுகொள்ளாததும் சந்தேகத்தை ஏற்படுத்தியுள்ளது. அதனால் கைதானவர்களை, நீதிமன்ற காவலில் எடுத்து காவல்துறை விசாரித்தால் மட்டும் மோசடி நடந்த விதம் வெளிச்சத்துக்கு வரும் என தெரிவித்தனர்.

திருவள்ளூர் மாவட்டம், கும்மிடிப்பூண்டி அடுத்த ஆரம்பாக்கம் கிராமத்தைச் சேர்ந்த பிரகாஷ் இவருடைய மனைவி சரிதா. இதில் பிரகாஷ், அதிமுக கட்சியின் அம்மா பேரவை ஒன்றிய செயலாளராக பதவி வகித்து வருகிறார். மேலும், டிராவல்ஸ் நிறுவனம் நடத்தியும் வருகிறார். இந்நிலையில், நேற்று அதிகாலை 1 மணி அளவில் தன் மனைவியுடன் காரை எடுத்துக் கொண்டு எளாவூர் ஒருங்கணைந்த சோதனைச் சாவடி அருகே சென்றுள்ளார். பின்னர், காரை நிறுத்திவிட்டு இருவரும் தாங்கள் வைத்திருந்த பூச்சி மருந்தை குடித்துள்ளனர்.

பின்னர், பிரகாஷ் தனது அண்ணனுக்கு தொலைபேசியில் தொடர்பு கொண்டு தானும் தனது மனைவி சரிதா இருவரும் விஷம் குடித்ததை சொல்லிவிட்டு, தோட்டக்கரை அரசு மருத்துவமனைக்கு வந்துள்ளார். அங்கிருந்த மருத்துவர்கள் இருவருக்கும் முதலுதவி செய்து சென்னை ஸ்டான்லி மருத்துவமனைக்கு அனுப்பி வைத்தனர். அங்கு இருவரும் தீவிர சிகிச்சை பிரிவில் அனுமதிக்கப்பட்டனர். இது குறித்து ஆரம்பாக்கம் காவல்துறை வழக்கு பதிவு செய்து விசாரணை நடத்தினர். அப்போது, பிரகாஷ்-ன் மரண வாக்கு மூல கடிதம் மற்றும் வீடியோ காவல்துறையினருக்கு கிடைத்துள்ளது.

அதில், 2017-ம் ஆண்டு சொந்தமாக கார் ஒன்று ஃபைனான்ஸ் மூலமாக வாங்கினேன். அதற்கு முதல் டியூ கட்டுவதற்காக கந்துவட்டிக்கு பணம் கொடுக்கும் ஆரம்பாக்கம் பகுதியைச் சேர்ந்த தசரதனுடைய மகன் ராஜா (எ) முனுசாமியிடம் முதலில் ரூ.30,000 வட்டிக்கு வாங்கினேன். அப்படியே, ஒரு ஆண்டுகளாக சிறுக சிறு மொத்தம் ரூ.1,10,000 வட்டிக்கு வாங்கினேன். இதில், 2020 வரை மாதந்தோறும் ரூ.11,000 வட்டி கட்டி வந்தேன். அதைத்தொடர்ந்து 2020 ஏப்ரல் மாதம் கொரோனா தொடங்கியவுடன் என்னால் வட்டி கட்ட முடியவில்லை.

இதனையடுத்து ராஜா அக்கம்பக்கத்தினர் மற்றும் கட்டபஞ்சாயத்து செய்பவர்களுடன் சேர்ந்து என்னை அசிங்கப்படுத்தினார். இதனால், நான் பல முறை அவரால் மனஉழைச்சலுக்கு ஆளானேன். கொலை மிரட்டல் விடுத்தும் என்னை துன்புறுத்தினார். இதனால் மனமுடைந்த நான் என்னுடைய மனைவி ஆகிய இருவரும் விஷம் அருந்தி தற்கொலை செய்து கொள்கிறோம். எங்கள் சாவிற்கு ராஜா (எ) முனுசாமி என்பவர் தான் காரணம் என அந்த வீடியோ மற்றும் கடிதத்தில் குறிப்பிடப்பட்டிருந்தது. இதில், சிகிச்சை பெற்று வந்த பிரகாஷ் நேற்று மாலை 5 மணி அளவில் சிகிச்சை பலனின்றி உயிரிழந்தார். மேலும் அவருடைய மனைவி சரிதா உயிருக்கு போராடிய நிலையில் சிகிச்சை பெற்று வருகிறார் என்பது குறிப்பிடத்தக்கது.

கிருஷ்ணகிரி மாவட்டம் பழையபேட்டையில் இயங்கி வந்த பட்டாசு குடோனில் இன்று பயங்கர வெடி விபத்து ஏற்பட்டது. இதில் 8 பேர் பரிதாபமாக உயிரிழந்தனர். 3 வீடுகள் இடிந்ததுடன், 10 க்கு அதிகமானோர் மருத்துவமனையில் சிகிச்சை பெற்று வருகிறார்கள். மீட்புப் பணிகள் தொடர்ந்து நடைபெற்று வருகின்றன.

இதுகுறித்து வி.கே. சசிகலா பேசுகையில், “கிருஷ்ணகிரியில் பழையபேட்டையில் உள்ள பட்டாசு குடோனில் ஏற்பட்ட பயங்கர வெடி விபத்தில் 8 நபர்கள் உயிரிழந்திருப்பதாகவும் 3 வீடுகள் இடிந்து தரைமட்டமாகியிருப்பதாகவும், 10-க்கு மேற்பட்டோர் பலத்த காயமடைந்து மருத்துவமனையில் சேர்க்கப்பட்டு இருப்பதாகவும் வரும் செய்திகள் மிகவும் அதிர்ச்சியையும், கவலையையும் அளிக்கின்றன.

மேலும் சிலர் இடிபாடுகளில் சிக்கியிருக்கலாம் என்று தொலைக்காட்சிகளில் செய்திகள் வருவது கூடுதல் கவலையை அளிக்கிறது. தமிழ்நாட்டில் பட்டாசு தயாரிக்கும் தொழில் நிறுவனங்கள், குடோன்கள் ஆகியவற்றில் விபத்து ஏற்பட்டு அதில் ஏழை எளிய சாமானிய தொழிலாளர்கள் உயிரிழப்பது தொடர்ந்து நடந்து வருவது கவலையை அளிக்கிறது.

திமுக தலைமையிலான அரசு இது போன்ற உயிரிழப்புகளை தடுக்க எந்தவித நடவடிக்கைகளையும் எடுக்காமல் வேடிக்கை பார்த்து வருவது மிகவும் கணடனத்திற்குரியது. பட்டாசு தொழில் நிறுவனங்கள் உரிய பாதுகாப்பு வழிமுறைகளை கடைபிடிக்கின்றனவா? என்பது குறித்து தமிழக அரசு தொடர்ந்து ஆய்வு மேற்கொள்ளவேண்டும்.

தமிழக அரசு அவ்வாறு முறையான ஆய்வுகளையும், கண்காணிப்புகளையும் சரிவர செய்து இருந்தால் இன்றைக்கு இந்த விபத்து ஏற்பட்டு இத்தனை உயிர்களை இழந்து இருக்க மாட்டோம். திமுக தலைமையிலான அரசின் அலட்சியப்போக்கினால், மக்களின் நலனைக் கருத்தில் கொள்ளாமல் தூக்கத்தில் இருப்பதாலும்தான் எந்த பணிகளையும் சரியாக செய்ய முடியாமல் தமிழக மக்கள் பாதிப்படைந்து வருகிறார்கள்.

சென்னை காவல் கண்காணிப்பாளர் அலுவலகத்தில் காஞ்சிபுரம் பி.எஸ்.கே.தெருவை சேர்ந்த லட்சுமி பாய் மற்றும் அவரது சகோதரி பத்மா பாய் ஆகியோர் புகார் ஒன்று அளித்தனர். அதில், எங்களுக்கு சென்னை சிந்தாதிரிப்பேட்டை காக்ஸ் தெருவில் தலா 1083 சதுரடி கொண்ட இரண்டு வீடுகள் உள்ளது. இந்த வீட்டை கலைச்செல்வி மற்றும் சுசீலா ஆகியோர் போலி ஆவணம் மூலம் அபகரித்து விட்டனர். எனவே அவர்களிடம் இருந்து எங்கள் வீட்டை மீட்டு தர வேண்டும் என்று புகார் அளித்தனர்.

அந்த புகாரின் படி மத்திய குற்றப்பிரிவு கூடுதல் கண்காணிப்பாளர் மகேஸ்வரி உத்தரவுப்படி மத்திய குற்றப்பிரிவு ஆய்வாளர் முருகேஸ்வரி குழுவினர் விசாரணை நடத்தினர். அதில், கலைச்செல்வி, சுசீலா மற்றும் அன்பு ஆகியோர் தங்களது பெயரில் போலியாக ஆவணங்கள் உருவாக்கி மோசடி செய்து ரூ.3 கோடி மதிப்புள்ள வீடுகளை அபகரித்தது தெரியவந்தது. அதைதொடர்ந்து, இவர்கள் மீது மோசடி உள்ளிட்ட 9 சட்டப்பிரிவுகளின் கீழ் வழக்கு பதிவு செய்து கைது செய்தனர்.