Category: தமிழகம்

Tamilnadu

தெரிந்தவர்… தெரியாதவர்களிடம் அடையாள அட்டை…மொபைல் எண்…. கொடுக்கிறீர்களா..!? உஷாரய்யா… உஷார்…!

சென்னை, ஆவடியை சேர்ந்த கௌதமி என்பவர் தனது பெயரில் யாரோ தனியார் வங்கியில் தனது மொபைல் மற்றும் முகவரியை மாற்றி கடன் அட்டை பெற்று, சுமார் ரூ.7,58,029 வரை அமேசானில் பொருட்கள் வாங்கியுள்ளதாக ஆவடி காவல் ஆணையர் கி.சங்கர் புகார் அளித்தார். இது குறித்து வழக்கு பதிவு செய்த ஆவடி காவல் ஆணையரக சைபர் கிரைம் ஆய்வாளர் மகாலஷ்மி தலைமையிலான காவல்துறை வழக்கு பதிவு செய்தனர்.

விசாரணையில் முன்னாள் ஐசிஐசிஐ வங்கி ஊழியரான சைதாப்பேட்டையை சேர்ந்த அபுபக்கர் சித்திக் என்பவர் வங்கியில் வேலை பார்த்து வந்தபோது தனது உறவினர்களின் அடையாள அட்டை, மொபைல் எண்களை பயன்படுத்தி அவற்றின் மூலம் கடன் அட்டையை வங்கி வாடிக்கையாளர்கள் பெயரில் பெற்றுள்ளார். அதன்பின்னர் அபுபக்கர் சித்திக் கடன் அட்டையை பயன்படுத்தி மோசடியில் ஈடுபட்டது அம்பலமாகி உள்ளது.

அண்ணாமலைக்கு வார்னிங் தந்த ஓபிஎஸ் அணி.. !

அதிமுக உட்கட்சி விவகாரம் பற்றி எதுவும் தெரியாத அண்ணாமலை, தேவையின்றி பேசுவதை நிறுத்திக்கொள்ள வேண்டும் என ஓ.பன்னீர்செல்வம் தரப்பு எச்சரிக்கை கொடுத்துள்ளது. ஓபிஎஸ் அணியை சேர்ந்த முக்கிய பிரமுகர்களான புகழேந்தியும், மருது அழகுராஜூம் அண்ணாமலையை வார்த்தைகளால் வெளுத்து எடுத்துள்ளனர். இதற்கு மூல காரணம் எடப்பாடி பழனிசாமியை அதிமுக பொதுச்செயலாளர் என்றும் ஓ.பன்னீர்செல்வத்தை முன்னாள் முதலமைச்சர் என்றும் அண்ணாமலை குறிப்பிட்டதே காரணமாகும்.

இதனிடையே இது குறித்து பத்திரிகையாளர் சந்திப்பில் புகழேந்தி, அண்ணாமலை இனியும் அதிமுக பொதுச்செயலாளர் எடப்பாடி பழனிசாமி என்று குறிப்பிட்டால் சட்ட நடவடிக்கை பாயும் என்றார். அண்ணாமலைக்கு நோட்டீஸ் அனுப்பி கோர்ட் கூண்டில் அவர் நிற்க வேண்டிய சூழல் வரும் எனவும் புகழேந்தி எச்சரித்தார். மேலும் தேர்தல் ஆணையம் என்ன சொல்கிறது என்று தெரியாமல் ”நீ பேசக்கூடாது” என அண்ணாமலையை புகழேந்தி சாடினார். அண்ணாமலைக்கு ஒன்றும் தெரியவில்லை என்பது தான் உண்மை என்றும் அதோடு நிறுத்திக்கொள்ள வேண்டும் எனவும் எச்சரித்துள்ளார்.

மருத்துவ கல்லூரியில் இடம் வாங்கி கொடுப்பதாக கூறி ரூ.8½ லட்சம் மோசடிசெய்த வாலிபர் கைது…!

ஈரோடு கருங்கல்பாளையம் கலைஞர் நகரை சேர்ந்த ஐஸ் உற்பத்தி செய்யும் தொழிற்சாலை வைத்து நடத்தி வரும் ஜாகீர் உசேன். இவருடைய மகள் மருத்துவ படிப்பு படிப்பதற்காக நீட் தேர்வை எழுதினார். ஆனால் மதிப்பெண் குறைவாக பெற்றதால் அவருக்கு மருத்துவ கல்லூரியில் சேர்ந்து படிப்பதற்காக இடம் கிடைக்கவில்லை.

இந்நிலையில் ஜாகீர் உசேன் செல்போனுக்கு ஒருவர் தொடர்பு கொண்டு பேசி உள்ளார். அப்போது நீட் தேர்வில் குறைந்த மதிப்பெண் பெற்று இருந்தாலும், மருத்துவ கல்லூரியில் சேர்ந்து படிப்பதற்காக ‘சீட்’ வாங்கி கொடுப்பதாக தெரிவித்தார். ஆனால் அதற்கு பணம் செலவாகும் என்றும் அவர் கூறியுள்ளார். ஏற்கனவே மகளுக்கு மருத்துவ கல்லூரியில் இடம் கிடைக்காத சோகத்தில் இருந்த ஜாகீர் உசேனுக்கு சற்று நம்பிக்கை அளித்தது. இதனால் அவரது பேச்சை நம்பி அவர் கேட்கும் பணத்தை தவணை அடிப்படையில் கொடுத்தார். மொத்தம் ரூ.8½ லட்சம் கொடுத்து உள்ளார்.

ஆனால் அந்த நபர் பணத்தை பெற்றுக்கொண்டு மருத்துவ படிப்புக்கான இடத்தை வாங்கி கொடுக்கவில்லை. ஜாகீர் உசேன் அந்த நபரின் செல்போன் எண்ணுக்கு தொடர்பு கொண்டபோது சுவிட்ச் ஆப் என்று வந்தது. இதனால் அதிர்ச்சி அடைந்த அவர், தான் ஏமாற்றப்பட்டதையும் உணர்ந்தார். இதுகுறித்து ஜாகீர் உசேன் ஈரோடு மாவட்ட காவல் கண்காணிப்பாளர் அலுவலகத்தில் புகார் மனு கொடுத்தார். அதன்பேரில் கருங்கல்பாளையம் காவல்துறை வழக்குப்பதிவு செய்து விசாரணை நடத்தியது.

விசாரணையில், கடலூர் மாவட்டம் மஞ்ச குப்பத்தை சேர்ந்த கணேசனின் மகன் சந்திரமோகன் என்பதும், அவருடன் சேர்ந்து கோவையை சேர்ந்த பெண் உள்பட 3 பேரும் மோசடி செய்தது தெரியவந்தது. இதைத்தொடர்ந்து அவர்கள் 4 பேரையும் காவல்துறை தேடி வந்தனர். இதற்கிடையே சந்திரமோகன் கடலூரில் பதுங்கி இருப்பதாக கருங்கல்பாளையம் காவல்துறைக்கு ரகசிய தகவல் கிடைக்க, அங்கு விரைந்து சென்ற காவல்துறை, சந்திரமோகனை கைது செய்தனர். மேலும் இந்த வழக்கில் தலைமறைவாக உள்ள 3 பேரை காவல்துறை தேடி வருகின்றனர்.

மின் இணைப்பு மனுவை பரிசீலிக்க ரூ.3,500 லஞ்சம்.. ஓராண்டு சிறை தண்டனை

சென்னை எம்ஜிஆர் நகரை சேர்ந்த ஜெயபால் என்பவர் தனது வீட்டுக்கு இரண்டு மின் இணைப்பு பெற, தமிழ்நாடு மின் உற்பத்தி மற்றும் பகிர்மான கழகத்துக்கு கடந்த 2013-ல் விண்ணப்பித்தார். அவரது விண்ணப்பம் பரிசீலிக்கப்படாமல் கிடப்பில் போடப்பட்டிருந்தது. இதையடுத்து, அவர் எம்ஜிஆர் நகர் பிரிவு தமிழ்நாடு மின் உற்பத்தி மற்றும் பகிர்மான கழக அலுவலகத்துக்கு சென்று விசாரித்துள்ளார். அப்போது அங்கு பணியில் இருந்த வணிக ஆய்வாளர் விஜயகுமார் மனுவை பரிசீலனை செய்ய ரூ.3,500 தந்தால் வேலை நடக்கும் என்று தெரிவித்துள்ளார்.

இதையடுத்து, 2013 ஜூன் 6ம் தேதி லஞ்சம் கேட்ட விஜயகுமார் மீது ஊழல் தடுப்பு பிரிவில் ஜெயபால் புகார் செய்தார். காவல்துறையினரின் அறிவுறுத்தலின் அடிப்படையில் ஜெயபால் லஞ்ச பணம் ரூ.3,500-யை விஜயகுமாரிடம் கொடுக்கும்போது லஞ்ச ஒழிப்பு காவல்துறை அவரை கைது செய்தனர். அவர் மீது ஊழல் தடுப்பு சட்ட பிரிவுகளின் கீழ் வழக்கு பதிவு செய்யப்பட்டது. இந்த வழக்கு ஊழல் வழக்குகளை விசாரிக்கும் சிறப்பு நீதிமன்றத்தில் விசாரணைக்கு வந்தது. வழக்கை விசாரித்த நீதிமன்றம், குற்றச்சாட்டுகள் நிரூபிக்கப்பட்டதால் விஜயகுமாருக்கு ஓராண்டு ஆண்டு சிறை தண்டனையும் ரூ.3 ஆயிரம் அபராதமும் விதித்து தீர்ப்பளித்தது.

டிடிவி தினகரன்: இங்கே இருப்பவர்கள் தொண்டர் படை..!, அங்கே இருப்பவர்கள் குண்டர் படை…!

1996-ம் ஆண்டு பெரியகுளம் நகர்மன்ற சேர்மனாக தேர்ந்தெடுக்கப்பட்டவர் ஓ.பன்னீர்செல்வம். அப்போது முதலே டிடிவி தினகரனுக்கும் நெருக்கமானவர் ஆனார் ஓபிஎஸ். அப்போது ஓபிஎஸ்ஸை ‘சேர்மன்’ என அழைக்கத் தொடங்கிய தினகரன், ஓ.பன்னீர்செல்வம் அமைச்சர், முதலமைச்சர் என அடுத்தடுத்து பெரிய பதவிகளை அலங்கரித்த பிறகும் கூட பழைய பாசத்தோடு சேர்மன் என்று அழைப்பதையே வழக்கமாகக் கொண்டிருந்தார்.

ஓபிஎஸ்ஸின் சொந்த ஊரான பெரியகுளத்தில் நின்று எம்.பி ஆனவர் டிடிவி தினகரன். இதனால் இருவருக்கும் இடையே நீண்டகாலமாக நல்ல நட்பு உண்டு. எனினும், ஜெயலலிதா – சசிகலா குடும்பத்தினர் இடையே சில ஆண்டுகள் இருந்து வந்த பிணக்கு, ஜெயலலிதா மறைவுக்குப் பிறகு ஓபிஎஸ் மேற்கொண்ட தர்ம யுத்தம் ஆகியவை காரணமாக பல ஆண்டுகளாகவே இருவரும் பேசிக்கொள்ளவில்லை. இந்தச் சூழலில் தான் கடந்த ஆண்டு, அதிமுகவில் எடப்பாடி பழனிசாமி – ஓ.பன்னீர்செல்வம் இடையே ஏற்பட்ட அதிகார மோதலைத் தொடர்ந்து, ஓபிஎஸ் தனித்து இயங்கி வருகிறார்.

அப்போது முதல், டிடிவி தினகரனை வாய்ப்பு கிடைத்தால் சந்திப்பேன் எனக் கூறி வந்தார். தினகரனும் அவ்வாறே கூறினாலும், பல மாதங்களாக அதற்கான சூழல் அமையவில்லை. அண்மையில் தான் இருவரும் சந்தித்து பேசிக்கொண்டனர். 2024 தேர்தலைக் குறிவைத்து, அதிமுக கூட்டணியில் இணையும் முடிவில் தினகரன் இருந்து வரும் நிலையில், ஓபிஎஸ் உடன் பரஸ்பர நல்லுறவைக் கடைபிடித்து வருகிறார். இந்த நட்பு பாலத்திற்கு ஃபெவிகால் போடும் வகையிலேயே இன்று தேனியில் ஓபிஎஸ் நடத்திய ஆர்ப்பாட்டத்தில், ஓபிஎஸ் உடன் ஒரே மேடையில் பங்கேற்றுப் பேசினார் அமமுக பொதுச் செயலாளர் டிடிவி தினகரன். அதே இடத்தில் 24 ஆண்டுகளுக்குப் பிறகு: டி.டி.வி.தினகரன் 1999-ல் பெரியகுளம் நாடாளுமன்றத் தொகுதியில் போட்டியிட்டபோது, முதல் அறிமுகக் கூட்ட​ம் தேனி பங்களாமேடு பகுதியில் நடைபெற்றது.

அப்போது ஓ.பன்னீர்செல்வம், டி.டி.வி.தினகரன் இருவரும் ஒரே மேடையில் தோன்றினர். அத​ன் பிறகு அதே பங்களாமேடு பகுதியில் 24 ஆண்டுகளுக்குப் பின்னர் இன்று நடைபெற்ற ஆர்ப்பாட்டத்தில் இருவரும் ஒரே மேடையில் இணைந்து பேசியுள்ளனர். இந்த ஆர்ப்பாட்டத்தில் அமமுகவைச் சேர்ந்த நிர்வாகிகள் மற்றும் ஓபிஎஸ் ஆதரவாளர்கள் என சுமார் ஆயிரத்திற்கும் மேற்பட்ட தொண்டர்கள் பங்கேற்றனர். இந்த ஆர்ப்பாட்டத்தில் ஓ.பன்னீர்செல்வம் பேசுகையில், “கோடநாடு கொலை கொள்ளை வழக்கில் குற்றவாளிகளை கைது செய்ய வலியுறுத்தி தேனியில் நடைபெறும் இந்த ஆர்ப்பாட்டத்தில் கலந்துகொண்டு, ஆதரவு தெரிவித்துள்ள நெஞ்சம் நிறைந்த அருமை அண்ணன் நாமெல்லாம் இதய பூர்வமாக மக்கள் செல்வன் என்று அன்போடு அழைக்கும் டிடிவி தினகரன் சார் இங்கு வந்து கலந்துகொண்டு சிறப்பித்தமைக்கு நெஞ்சார்ந்த நன்றியை தெரிவித்துக் கொள்கிறோம்.” என்றார்.

மேலும், “மறைந்த முதல்வர் ஜெயலலிதா வாழ்ந்த கோடநாடு இல்லத்தில் நடந்த கொலை, கொள்ளை வழக்கை துரிதமாக விசாரணை செய்ய வேண்டும். இதுகுறித்து தேர்தல் சமயத்தில் கொடுத்த வாக்குறுதியை நிறைவேற்றும் வகையில் முதலமைச்சர் மு.க. ஸ்டாலின் உரிய தண்டனையை கோடநாடு கொள்ளைக் கூட்டத்துக்கும், கொலையாளிகளுக்கும் பெற்றுத்தர வேண்டும்.” என்றார்.

டிடிவி தினகரன் பேசுகையில், “அருமை நண்பர் முன்னாள் முதலமைச்சர் ஓபிஎஸ் தலைமையில் இந்த கூட்டம் நடைபெறுகிறது. ஜெயலலிதாவின் உண்மையான தொண்டர்கள் எங்கள் பக்கம் நிற்கின்றனர். இங்கே இருப்பவர்கள் தொண்டர் படை, அங்கே இருப்பவர்கள் குண்டர் படை. விசுவாசம் என்றால் என்ன என்பது அவர்களின் கண்களுக்கு தெரியாது. ஏனெனில் அவர்கள் துரோகத்தை தவிர, வேறு எதையும் அறியாதவர்கள். ஓபிஎஸ்ஸும் நானும் பதவிக்காக இணையவில்லை. நாங்கள் இணைந்தது இயற்கையாக நடந்திருக்கிறது. துரோகிகள் அபகரித்துள்ள எம்ஜிஆர், ஜெயலலிதா கண்ட சின்னத்தை மீட்டெடுத்து ஜெயலலிதாவின் தொண்டர்களிடம் ஒப்படைக்க வேண்டும் என்பதுதான் எங்கள் நோக்கம்” எனப் பேசினார்.

ரூ.50,000.. முதலமைச்சர் பெண் குழந்தைகள் பாதுகாப்பு திட்டம்..

மகளிர் முன்னேற்றத்திற்காகவும், பெண் குழந்தைகளின் பாதுகாப்புக்காகவும், முதலமைச்சர் மு.க. ஸ்டாலினின் தலைமையிலான தமிழக அரசு பல்வேறு நடவடிக்கைகளையும், அறிவிப்புகளையும் முன்னெடுத்து வருகிறது.. அதில் ஒன்றுதான், பெண்கள் பாதுகாப்புத் திட்டமாகும். அதாவது, அரசின் நேரடி முதலீட்டின் மூலம், பெண் குழந்தைகளின் உரிமைகளை பாதுகாத்தல் மற்றும் அதிகாரம் அளித்தல் மூலம் பாலின பாகுபாட்டை தடுப்பதே இந்த திட்டத்தின் முக்கிய நோக்கமாகும்.

குறிப்பாக, பெண் குழந்தைகள் பள்ளியில் சேர்க்கை மற்றும் குறைந்தபட்சம் இடைநிலை வரையிலான கல்வியை உறுதி செய்தல், பெண் குழந்தைகளை 18 வயதுக்கு பிறகே திருமணம் செய்ய ஊக்குவித்தல், 2 பெண் குழந்தைகளுடன் குடும்பக் கட்டுப்பாடு நெறிமுறையை பின்பற்ற பெற்றோர்களை ஊக்குவித்தல், பெண் குழந்தைகளின் உரிமைகளைப் பாதுகாத்தல் மற்றும் பெண் குழந்தைகளுக்கு சமூக மற்றும் நிதி அதிகாரம் அளித்தல் போன்றவற்றை அடிப்படையாக கொண்டது.

ஒரு குடும்பத்தில் ஒரு பெண் குழந்தை மட்டுமே பிறந்திருந்தால், அந்த பெண் குழந்தையின் பெயரில் நிலையான வைப்புத்தொகையான ரூ.50,000/- தமிழ்நாடு மின்விசை நிதி மற்றும் அடிப்படை வசதி மேம்பாட்டு நிறுவனத்தில் முதலீடு செய்யப்படுகிறது. இந்த வைப்புத்தொகை ரசீது நகல் பெண் குழந்தையின் குடும்பத்திற்கு வழங்கப்படுகிறது.

ஒருவேளை, ஒரு குடும்பத்தில் 2 பெண் குழந்தைகள் மட்டுமே பிறந்திருந்தால், அந்த பெண் குழந்தைகளின் பெயரில் நிலையான வைப்புத்தொகையான தலா ரூ.25,000/- தமிழ்நாடு மின்விசை நிதி மற்றும் அடிப்படை வசதி மேம்பாட்டு நிறுவனத்தில் முதலீடு செய்யப்படுகிறது. இந்த வைப்புத்தொகை ரசீது நகல் பெண் குழந்தைகளின் குடும்பத்திற்கு வழங்கப்படுகிறது.

இந்த வைப்புத்தொகை ஒவ்வொரு 5 வருடங்களுக்கு ஒருமுறை புதுப்பிக்கப்பட்டு, 18 வயது நிறைவடைந்தவுடன், வட்டியுடன் சேர்த்து முதிர்வுத்தொகை பெண் குழந்தைக்கு வழங்கப்படும். ஆனால், இந்த பலனை பெற வேண்டுமானால், பெண் குழந்தைகள் 10-ம் வகுப்பு பொதுத்தேர்வெழுத வேண்டும். அப்போதுதான், முதிர்வு தொகையானது, பெண் குழந்தைகளின் உயர்கல்வியைத்தொடர உதவும். பெண் குழந்தைகளுக்கு கல்விச் செலவுகளை ஈடுகட்ட 6-வது ஆண்டு முதல் ஆண்டு ஊக்கத் தொகையாக ரூ.1800/- வழங்கப்படுகிறது.

கருணாநிதியின் நூற்றாண்டு விழாவினை முன்னிட்டு முதலமைச்சரின் பெண் குழந்தைகள் பாதுகாப்பு திட்டம் குறித்து ஆகஸ்ட் 2023 முதல் 2024 ஜூன் வரை சிறப்பு முகாம்கள் ஒவ்வொரு மாதம் 2-வது செவ்வாய்க்கிழமைகளில் நடக்கவுள்ளது. இந்நிலையில், இதுகுறித்து மேலும் சில தகவல்கள் வெளியாகி உள்ளன.. அதாவது, சம்பந்தப்பட்ட குழந்தைகள், 10-ம் வகுப்பு தேர்வு எழுதி, 18 வயது வரை திருமணம் புரியாமல் இருக்கும்போது, அவர்களுக்கு வட்டியுடன் கூடிய வைப்பு தொகை, “முதிர்வு தொகை”யாக வழங்கப்படுகிறது.

கடந்த 2001 முதல் 2005ம் ஆண்டு வரை பதிவு செய்த, 1.40 லட்சம் பேருக்கு 350.28 கோடி ரூபாய் வழங்கப்பட்டு உள்ளது. மேலும், 1.50 லட்சத்துக்கும் மேற்பட்டவர்கள், 18 வயது நிறைவடைந்தும், முதிர்வு தொகை பெற விண்ணப்பிக்காமல் இருக்கிறார்களாம். அவர்களுக்காக, கருணாநிதி நுாற்றாண்டு விழாவையொட்டி, அனைத்து மாவட்ட சமூக நலத்துறை அலுவலகங்களிலும், மாதந்தோறும் இரண்டாம் செவ்வாய்க்கிழமை, பெண் குழந்தைகள் பாதுகாப்பு திட்ட சிறப்பு முகாம் நடத்தப்படுகிறது. தகுதியான அனைவரும், ஒரு மாதத்துக்குள் முதிர்வு தொகையை பெற்றுக்கொள்ளலாம் என்று தமிழக அரசு மீண்டும் அறிவித்துள்ளது. விண்ணப்பிக்க தகுதிகள்:

1. பெண் குழந்தை பாதுகாப்பு திட்டத்தின் கீழ் பயனடைய குடும்ப ஆண்டு வருமானம் ரூ.72,000/- க்குள் இருக்க வேண்டும்.

2. இரண்டாவது பெண் குழந்தை பிறந்து

3. வருடங்களுக்குள் விண்ணப்பிக்க வேண்டும்.

3. தமிழ்நாட்டில் பத்து வருடங்களுக்கு மேல் வசிப்பவராக இருக்க வேண்டும். 4

. பெற்றோரில் ஒருவர் 40 வயதுக்குள் குடும்ப கட்டுப்பாடு செய்து இருக்க வேண்டும்.

* இணையதளத்தின் வாயிலாக இ-சேவை மையத்தில் விண்ணப்பிக்க வேண்டும். கூடுதல் தகவல்களுக்கு: https://www.tnsocialwelfare.tn.gov.in/en/specilisationschild-welfare/chief-ministers-girl-child-protection-scheme

கிராமப்புற பெண்கள் பெரிய அளவில் பயன்பெறும் …. ’தோழி விடுதி’ ஹைலைட்ஸ்?

பெண்களுக்குச் சொத்துரிமைக்கொடுத்த மாநிலம், மருத்துவக் காப்பீட்டுத் திட்டங்களை வழங்கியது, வண்ணத் தொலைக்காட்சி கொடுத்தது தொடங்கி மாநிலம் தமிழ்நாடுதான் முன்னோடி மாநிலம். அதன் வரிசையில் இன்றைக்கு இந்தியாவிலேயே பெண்கள் தங்குவதற்கான ‘விடுதி’களை அரசு சார்பில் கட்டிக் கொடுத்திருப்பது தமிழ்நாடுதான். பெண்கள் தங்குவதற்காகத் திருச்சி, திருநெல்வேலி, சேலம், பெரம்பலூர், விழுப்புரம், வேலூர், தஞ்சாவூர், செங்கல்பட்டு ஆகிய 9 மாவட்டங்களில் 11 தங்கும் விடுதிகளைத் தமிழ்நாடு அரசு தொடங்கி உள்ளது. அதற்கு அழகாக ‘தோழி விடுதிகள்’ என்று பெயரையும் அரசு சூட்டி உள்ளது.

இந்த விடுதிகளில் அறையை புக் செய்ய நேரில் வரவேண்டும் என்பதில்லை. https://www.tnwwhcl.in/ இணைய தளத்தின் மூலமாக ஆன்லைன் புக்கிங் செய்துகொள்ளலாம். சமூக நலத்துறையின் கீழ் செயல்பட்டுவரும் தமிழ்நாடு பணிபுரியும் மகளிர் விடுதிகள்’ என்ற நிறுவனத்தின் சார்பில், சென்னையில் மட்டும் 16 கோடியே 49 லட்சம் ரூபாய் செலவில் இந்த விடுதிகளை அரசு கட்டித் தந்துள்ளது. இதில் 7 புனரமைக்கப்பட்ட விடுதிகள், 2 புதிய விடுதிகள் எனச் சேர்த்து மொத்தம் 9 ‘தோழி விடுதிகள்’ சென்னையில் மட்டும் கட்டப்பட்டுள்ளன. “இதற்காக இந்தியாவிலேயே ‘TamilNadu Working Women’s Hostels Corporation’ என்ற நிறுவனத்தினை முதன்முறையாகத் தமிழ்நாடுதான் தொடங்கியுள்ளது.

பெண்களின் பாதுகாப்பை உறுதி செய்யும் புதிய முயற்சியை இதன்மூலம் தமிழ்நாடு அரசு கையில் எடுத்துள்ளது” என்கிறார் சமூக நலத்துறை செயலாளர் அமுதவல்லி. இவர் சொல்வதை உறுதி செய்கிறார் சென்னை உள்ள தோழி விடுதி ஒன்றின் மேலாளர் கங்காதேவி. அவர், “விடுதியில் சிசிடிவி வசதி, கை ரேகை மூலம் இயங்கக் கூடிய கதவுகள், காவல்துறை தினந்தோறும் வந்து பாதுகாப்பை உறுதி செய்யும் நடைமுறை, 24X7 செக்யூரிட்டி வசதி, துணிகளைத் துவைப்பதற்கான சலவை எந்திர வசதி, குளிர்சாதன வசதி, ஆர்.ஓ. முறையில் குடிநீர் வசதி, குளிர்சாதனப் பெட்டி வசதி, இலவச வை ஃபை வசதி, பார்கிங் வசதி, நடைப்பயிற்சி மேற்கொள்வதற்கான வசதி என இன்றைய தலைமுறை விரும்பக் கூடிய சகல வசதிகளையும் அரசு உருவாக்கி தந்துள்ளது” என்கிறார்.

இது குறித்து சமூகநலம் மற்றும் மகளிர் உரிமைத்துறை அமைச்சர் கீதாஜீவன், “இந்த அரசு விடுதியில் தனியார் விடுதிகளைவிடக் கட்டணம் குறைவு. அதேசமயம் தனியார் விடுதியில் உள்ள அதே வசதிகள் இங்கே வழங்கப்பட்டுள்ளன. கட்டணம் குறைவது என்பது பெண்கள் சேமிப்பதற்கு உதவும். அதைவிட அரசு விடுதி என்பதால் பாதுகாப்பு உத்தரவாதம் கிடைக்கிறது. ஒருவர் 5 நாள்கள் தங்கலாம். 15 நாள்கள் கூட தங்கலாம். 5 வருடங்கள் கூட தங்கலாம். அது அவரது விருப்பத்திற்கு ஏற்ப செய்துதரப்பட்டுள்ளது. ஆன்லைனிலேயே பதவி செய்து கொள்ளலாம். ஒருவர் ஊரிலிருந்து கிளம்பும் போதே பதிவுசெய்து வரலாம்” என்கிறார்.

திமுக செய்தி தொடர்பாளர் ஆண்டாள் பிரியதர்ஷினி, “பெண்களுக்கு என்று சில நாசூக்கான பிரச்சினைகள் இருக்கின்றன. அதைப் புரிந்து செயல்படுவதற்கு ஒரு தனித் தலைமைப் பண்பு வேண்டும். அதோடு தனி மனதும் வேண்டும். இவை இரண்டு நம் முதலமைச்சர் மு.க. ஸ்டாலினிடம் இருக்கின்றன. தமிழ்நாட்டில் பெண்களுக்கு இருக்கின்ற கல்வி சுதந்திரம், பொருளாதார சுதந்திரம், சிந்தனைச் சுதந்திரம் என்பது இந்தியாவில் வேறு மாநிலங்களில் எங்கேயும் இல்லை. அந்தளவுக்குப் பெண்களுக்குச் சுதந்திரம் கொடுத்து வருகிறது தமிழ்நாடு. அதில் நாம்தான் முன்னோடி. ஏறக்குறை பெண் சுதந்திரம் என்பது நீதிக்கட்சி காலத்திலேயே தொடங்கியாயிற்று. அதன் தொடர்ச்சியாக முதலமைச்சர் மு.க. ஸ்டாலின் அதை மேலும் விரிவுபடுத்தி வருகிறார்.

அதுதான் உண்மை. ‘பேட்டி படாவ், பேட்டி பச்சாவ்’ என்று சிலர் உதட்டளவில் சொல்லி வருகிறார்கள். ஆனால், பெண்களைப் படிக்கவைக்க வேண்டும் என்றால் தடுக்கிறார்கள். பெண்களை நிர்வாணப்படுத்தி மானபங்கம் செய்கிறார்கள். அப்படி பிறமாநிலங்களைப் போல் இல்லாமல், தமிழ்நாடு தனித்துத் தெரிகிறது. பெண் கல்விக்கு ஊக்கத்தொகை முதலமைச்சர் மு.க. ஸ்டாலின் கொடுக்கிறார். குடும்ப பெண்களுக்கு உரிமைத் தொகைமுதலமைச்சர் மு.க. ஸ்டாலின் கொடுக்கிறார். பெண்களுக்குக் கட்டணம் இல்லாத பேருந்து வசதியை ஏற்படுத்திக் கொடுத்துள்ளது அவர்தான். அதன் தொடர்ச்சியாக இப்போது ‘தோழி விடுதிகளை’ திறந்துள்ளார். இதனால் கிராமப்புற பெண்கள் பெரிய அளவில் பயன்பெறுவார்கள். நகரங்களில் உள்ள பெண்களுக்குப் பிரச்சினை இல்லை.

ஆனால், கிராமத்திலிருந்து நகரம் நோக்கி வேலை பார்க்க வருகின்ற பெண்களுக்குப் பல்வேறு தடைகள் உள்ளன. அதில் குறிப்பாகத் தங்குவதற்குப் பாதுகாப்பான இடங்கள் கிடைப்பதில்லை. ஆகவே அவர்கள் மனதில் ஒரு அச்சம் ஏற்படுகிறது. முதன்முறையாகப் பெரிய நகரங்களுக்கு வேலை செய்ய வருகின்ற பெண்களுக்குப் பயம் இருக்கும். எங்கே செல்வது? எங்கே தங்குவது? பாதுகாப்பு இருக்குமா? போன்ற பல்வேறு அச்சங்கள் ஏற்படுகின்றன. அதற்காகவே பல பெண்கள் இன்றைக்கும் நகரங்களுக்கு வேலை செய்ய வருவதைத் தவிர்க்கிறார்கள். அந்த அச்சங்களுக்கு எல்லாம் தீர்வு கொடுக்கின்ற விதமாக இந்தத் தோழி விடுதிகளைத் தமிழக அரசு ஏற்படுத்தித் தந்துள்ளது. இதன்மூலம் பெண்களுக்குக் கூடுதல் தைரியம்,நம்பிக்கைப் பிறக்கும்.

டிடிவி தினகரன் நாடாளுமன்ற தேர்தலுக்கு பின் அதிமுக உடைந்து சிதறி விடும்

திருநெல்வேலி ஒருங்கிணைந்த மாவட்ட அமமுகவின் செயல்வீரர்கள் கூட்டம் பாளை கிருஷ்ணாபுரத்தில் நேற்று மாலை நடந்தது. இதில் டிடிவி தினகரன் பேசுகையில், எடப்பாடி பழனிச்சாமி தலைமையிலான அதிமுக நாடாளுமன்ற தேர்தலுக்கு பின் நெல்லிக்காய் மூட்டை போன்று சிதறி விடும். எடப்பாடி பழனிச்சாமி என்ன செய்ய போகிறார் என்று தெரியவில்லை.

கொடநாடு பங்களாவில் நடந்த கொலை, கொள்ளைகளில் உண்மை குற்றவாளிகளை கைது செய்து நடவடிக்கை எடுக்க வேண்டும் என்று தமிழக அரசை வலியுறுத்தி வருகிறோம். சினிமா பாணியில் நடந்த மர்ம மரணம் குறித்து உரிய விசாரணை நடத்த வலியுறுத்தி ஓ.பி.எஸ்.சுடன் இணைந்து நாளை அனைத்து மாவட்ட தலைநகரங்களில் ஆர்ப்பாட்டம் நடக்கிறது. தேர்தலில் தனித்து போட்டியிடுவதற்கும் நாம் தயாராக வேண்டும். இவ்வாறு அவர் பேசினார்.

கோடநாடு வழக்கில் கைகோர்த்த ஓபிஎஸ், தினகரன்..

கடந்த 2017 ஏப்ரல் மாதத்தில் மறைந்த முன்னாள் முதலமைச்சர் ஜெயலலிதாவின் கோடநாடு பங்களாவில் நடந்த காவலர் கொலை, மற்றும் கொள்ளை சம்பவம் பெரும் அதிர்ச்சியை ஏற்படுத்தின. தொடர்ந்து கோடநாடு விவகாரத்தில் சம்பந்தப்பட்ட சிலர் அடுத்தடுத்து மர்மமான முறையில் உயிரிழந்தனர். இது தொடர்பாக கடந்த அதிமுக ஆட்சியிலேயே விசாரணை தொடங்கியது. ஆனால், விசாரணை முழுவீச்சில் நடைபெறவில்லை.

பின்னர் ஆட்சி மாற்றம் ஏற்பட்டு திமுக ஆட்சிக்கு வந்தது. தற்போது, கோடநாடு கொலை கொள்ளை வழக்கில் மறு விசாரணை தீவிரமாக நடந்து வருகிறது. இந்நிலையில் கொடநாடு கொலை வழக்கில் உண்மை குற்றவாளிகள் யார் என்பதை மக்களுக்கு தெரியப்படுத்த வேண்டும். கொடநாடு கொலை, கொள்ளை மற்றும் அதன் தொடர்ச்சியாக நடைபெற்ற மர்ம நிகழ்வுகள் குறித்த வழக்கு விசாரணையை விரைந்து முடித்து குற்றவாளிகளுக்கு தண்டனை பெற்று தர வேண்டும் என முன்னாள் முதலமைச்சர் ஓ.பன்னீர்செல்வம் வலியுறுத்தினார்.

திமுக அரசு உரிய நடவடிக்கையை எடுத்து குற்றவாளிகளை தண்டிக்க வேண்டும் என வலியுறுத்தி தமிழ்நாடு முழுவதும் உள்ள வருவாய் மாவட்டங்களில் ஆகஸ்ட் 1-ம் தேதி கண்டன ஆர்ப்பாட்டம் நடத்தப்படும் என ஓபிஎஸ் அறிவித்தார். இந்த ஆர்ப்பாட்டத்திற்கு அமமுக பொதுச்செயலாளர் டி.டி.வி.தினகரனும் ஆதரவு அளித்து, ஓபிஎஸ் நடத்தும் ஆர்ப்பாட்டத்தில் அமமுகவினரும் கலந்து கொள்வார்கள் என அறிவித்தார்.

\

எடப்பாடி பழனிசாமிக்கு எதிராக ஓ.பன்னீர்செல்வம், டி.டி.வி.தினகரன் இருவரும் கை கோர்த்துள்ள நிலையில், இரு தரப்பும் ஒன்றாகப் பங்கேற்கும் முதல் போராட்டம் என்பதால் இதனை தமிழ்நாடு முழுவதும் சிறப்பாக நடத்த வேண்டும் என இரு தரப்பினரும் தீவிர ஏற்பாடுகளை மேற்கொண்டுள்ளனர். அனைத்து மாவட்ட தலைநகரங்களிலும் இரு தரப்பு நிர்வாகிகளும் தீவிரமாக பணிகளை மேற்கொண்டுள்ளனர்.

எடப்பாடி ஆட்சியில் கொடநாடு கொலை, கொள்ளை வழக்கில் தடயங்கள் அழிப்பு.. டிடிவி தினகரன் பகீர் தகவல் இந்நிலையில், அதிமுகவின் கொடி மற்றும் இரட்டை இலை சின்னத்தை ஓ.பன்னீர்செல்வம், டிடிவி தினகரன் தரப்பு பயன்படுத்த அனுமதிக்கக் கூடாது எனக் கோரி அதிமுகவினர் எஸ்.பி.யிடம் மனு அளித்துள்ளனர்.

கோடநாடு வழக்கில் குற்றவாளிகளை விரைந்து கைது செய்யக் கோரி ஓபிஎஸ், டிடிவி தினகரன் தரப்பு நாளை நடத்தும் ஆர்ப்பாட்டத்தின்போது அதிமுக கொடி மற்றும் கட்சி சின்னத்தை பயன்படுத்த அனுமதிக்கக் கூடாது என நீலகிரி மாவட்ட எஸ்.பி.யிடம் அதிமுகவினர் மனு அளித்துள்ளனர். அரசியல் ரீதியாக எடப்பாடி பழனிசாமிக்கு பலம் பெருகி வரும் சூழலில், அவரது தரப்புக்கு நெருக்கடி கொடுக்கும் வகையில் ஓபிஎஸ் – டிடிவி தினகரன் இருவரும் கை கோர்த்துள்ள சூழலில் அதிமுக சின்னம், கொடியை பயன்படுத்தக்கூடாது என ஈபிஸ் தரப்பு முறையிட்டுள்ளது பரபரப்பை ஏற்படுத்தியுள்ளது.

ரூ.5 கோடி மோசடி செய்த அரசு பள்ளி ஆசிரியர் கைது… மனைவி தலைமறைவு…

திருவண்ணாமலை மாவட்டம், ஆரணி அடுத்த களம்பூர் பகுதியைச் சேர்ந்த அரசு பள்ளி ஆசிரியர் சங்கர் மற்றும் அவரது மனைவி மாதவி ஆகியோர் கடந்த சில ஆண்டுகளாக ரூ.1 லட்சம் முதல் ரூ.10 லட்சம் வரை மாத ஏலச்சீட்டு நடத்தியுள்ளனர். அதில், களம்பூர், ஆரணி உள்ளிட்ட பகுதிகளை சேர்ந்த 100-க்கும் மேற்பட்டோர் பணத்தை செலுத்தியுள்ளனர். முறையாக நடத்தாததால், பணம் செலுத்தியவர்களுக்கு உரிய காலத்தில் தொகையை வழங்க முடியாமல் சிக்கல் ஏற்பட்டுள்ளது.

பலரும் பணத்தை கேட்டு நெருக்கடி கொடுத்துள்ளனர். இதனால் மாதவி சங்கர் தம்பதியர் தலைமறைவாகினர். பணம் செலுத்தி ஏமாற்றம் அடைந்தவர்கள், திருவண்ணாமலையில் உள்ள பொருளாதார குற்றப்பிரிவு அலுவலகத்தை கடந்த மே மாதம் முற்றுகையிட்டு ரூ.5 கோடிக்கும் அதிகமான தொகையை சீட்டு நடத்தியவர்கள் ஏமாற்றிவிட்டதாக குற்றம் சாட்டினர். இந்நிலையில், புதுக்கோட்டை மாவட்டத்தில் ஆசிரியர் சங்கர் தலைமறைவாக இருப்பது தெரியவர, திருவண்ணாமலை மாவட்ட பொருளாதார குற்றப்பிரிவு காவல்துறை நேற்று அதிகாலை சங்கரை கைது செய்தனர். மேலும் அவரது மனைவி மாதவியை தேடி வருகின்றனர் என்பது குறிப்பிடத்தக்கது.